Mơng anun, đah kơmơi hăng čơđai muai djuai ania ƀiă hmâo laih, amăng ƀrư̆ pơđĭ tui tơlơi pơmin, bruă mă, gum hơgôp pơdŏng phrâo anih anom pơhlôm kơ drơi pô.

Amai Y Hương, djuai ania Hơdang ƀơi tơring čar Kontum brơi thâo, hơdôm thun jê̆ hăng anai dưi hmâo Khul pơlir hơbit đah kơmơi tơring čar Kontum pơphun lu bruă pơplông kah hăng: Mơnuih lăi pơhing rơgơi kơ pơdŏng khul adơi amai phrâo rơnuk anai kual djuai ania ƀiă, tui đăo; Pơhlôm brơi đah kơmơi hăng čơđai muai ... anun drơi pô hăng lu đah kơmơi thâo hluh bôh thâo kơ hơdôm tơlơi djuai ania, tơlơi đăo, Tơlơi phiăn ƀu kah pha bơnai hăng rơkơi, Tơlơi phiăn pơdô̆ rơkơi bơnai hăng sang anô̆...:

 “Rơgao kơ pơplông kâo dưi prăp brơi lu bôh thâo gah đah kơmơi, hơdôm bôh yôm gah Jơlan hơdră pơkă mơng dêh čar kual neh wa djuai ania ƀiă kual čư̆ siăng rơwang 2021-2030. Hơdôm bôh thâo kơ tơlơi ngă yang, tui đăo. Bruă djuai ania mơng Ping gah hăng Kơnuk kơna dêh čar ta. Ngă tui bruă mă mơng đah kơmơi, phing pran jua hloh lĕ lu biă amăng bruă bơkơtuai, pơhiăp tlao, amăng hơdôm bruă mă mơnuih mơnam gum hrom glông bruă kơđi čar”.

Biă ñu ƀơi Kontum thun anai, ƀing čơđai djuai ania ƀiă ăt dưi gum hrom mơn Jơlan hơdră bơkơtuai kơplah wah Khul čơđai muai hăng Khul pơ ala mơnuih ƀôn sang tơring čar Kontum. Anai lĕ jơlan tô nao rai yôm phăn pioh ƀing čơđai mơng tơring čar dưi pơdah tơlơi pơmin tơlơi čang rơmang pioh Khul pơ ala mơnuih ƀôn sang tơring čar ăt kah hăng hơdôm gưl gong gai pơdah tơlơi lăng ba, bơwih brơi, hmư̆ lăng tơlơi pơhiăp mơng čơđai muai. Adơi Phan Phúc Phú, čơđai sang hră anih 8C2, Sang hră gưl 2 - gưl 3 Liên Việt Kontum, brơi thâo:

 “Kâo hmâo tơña 3 mơta tơlơi bơdjơ̆ nao tơlơi plăng mơnuih mơnam internet, tơlơi mă pơgô̆ čơđai muai hăng tơlơi bơpơtaih amăng sang hră hăng sang juă dlai ƀơi sang hră răm tui. Hluai tui hơdôm tơlơi lăi glăi mơng ƀing neh, ƀing met kâo thâo hluh lĕ, mă yua plăng internet hă khom hmâo tơlơi pơkă, thâo hluh. Tơlơi mă pơgô̆ ƀudah tơlơi taih amang lĕ kâo ăt thâo mơn, hơdôm gơnong bruă ăt hmâo laih tơlơi lăng ba. Hluai tui bruă bơkơtuai anai kâo ƀuh tŭ yua biă”.

Hơdôm thun rơgao, hrom hăng hơdôm bruă mă djru ĕp ƀong ĕp huă pioh adơi amai pơđi kyar bơwih ƀong, hơdôm gưl khul đah kơmơi ƀơi Daklak dô̆ pok pơhai klă hơdôm bruă mă pơjing keh prăk pioh blơi hră pơgang gah ia jrao brơi kơ mơnuih amăng khul tơnap tap. Bruă mă anai hmâo djru dong lu adơi amai hmâo tơhnal gal ngă juăt hăng bruă ia jrao, bơwih brơi tơlơi suaih pral, hrŏ trun kơdrâ̆o kơ bruă bơwih ƀong lom ƀu bưng duam ruă. Kah hăng amai Đặng Thị Bình, ƀơi thôn 1, să Ea Kpam, tơring glông Čư̆ Mgar lom čơkă mă hră pơgang gah ia jrao yua kơ Khul pơlir hơbit đah kơmơi să ƀơk brơi, lăng ƀuh hơđong pran jua ƀơƀiă.

 “Tơlơi hơdip mơda sang anô̆ kâo lĕ ăt glăk tơnap tap mơn, dưi hmâo Khul đah kơmơi să brơi sa pok hră pơgang gah ia jrao lĕ kâo ăt bơni lu mơn, hmâo hră pơgang pioh kâo nao pel ĕp lăng tơlơi ruă ăt plai ƀiă mơn prăk mă yua, anun kâo ăt hơđong pran jua hloh mơn lom nao pel ĕp, pơjrao tơlơi ruă, hrŏ trun tơlơi bơngot kơ prăk mă yua lom nao pel ĕp tơlơi ruă kơ drơi pô”.

Ƀơi Lai Châu, anô̆ pha ra kual neh wa djuai ania ƀiă hmâo lu phiăn juăt, bruă mă mơ̆ bruă mă gah đah kơmơi amăng tơlơi hơdip kơnong kơ jing mơnuih mă bruă, mơnuih tơkeng ană. Gơnang kơ hmâo hơdră lăi pơhing djơ̆, truh ră anai, bruă mă mơng đang kơmơi ƀơi anai ăt pơplih pha ra mơn hăng hmâo bôh pơhiăp kơjăp amăng sang anô̆. Amai Ma Thị Chư, ƀơi plơi Phìn Chải, să Giang Ma, tơring glông Tam Đường brơi thâo: yua hmâo rơkơi lĕ mă bruă ƀơi să hăng dưi hmâo mơnuih apăn bruă nao pơ̆ plơi lăi pơhing na nao anun hmâo pơplih tơlơi pơmin, hơdră ngă, djru gum hăng gum hrom hăng ană bơnai lu hloh:

“Rim hrơi bruă mă mơng kâo lĕ ngă hmua, ngă đang, rông un, rôm bip, rông mơnŭ, rông kơbao hăng riă tơpai. Mơguah glăi mơng đang hmua, bơnai akă hmao tơnă asơi lĕ rơkơi djru bơnai tơnă asơi yang hrơi dong, tơguan ană bơnai glăi huă asơi hrom. Hrơi 6, hrơi tơjuh pơdơi lĕ rơkơi ăt nao djru amĭ ama mơn, djru bơnai ngă đang hmua, bruă sang. Ră anai sang anô̆ hmâo tơlơi hơdip mơda, prăk pơhrui glăi hơđong, rơkơi ăt ƀu hmâo taih amang bơnai hơget ôh hăng sang anô̆ ăt brơnôm mơn”.

Hăng tơlơi gum hrom klă mơng hơdôm ding jum, gơnong bruă, khul grŭp hăng gưl ping gah, gong gai hơdôm bôh anih anom, đah kơmơi hăng čơđai muai djuai ania ƀiă glăk jai hrơi dưi pơgang ba hăng hơdôm bôh tŭ yua lăp djơ̆. Đah kơmơi, čơđai muai djuai ania ƀiă dưi nao hrăm hră, pơđĭ tui bôh thâo, gum hrom bruă mơnuih mơnam; dưi bơwih brơi tơlơi suaih pral, pơgang ba tơlơi dưi, bôh tŭ yua djơ̆ phiăn./.