Tlam lơ 20/2, pơgôp hiăp kơčăo bruă čih pơkra glăi tơlơi phiăn lŏn tơnah, ƀing ding kơna Khul djru hrom tơlơi dưi mơnuih ƀôn sang ngă pô hăng tơlơi phiăn, ƀing mơnuih rơgơi kơhnâo, ƀing kơhnăk mơ̆ng Jơnum min wai lăng djop djuai ania mơnuih mơnam Việt Nam rơkâo ngă pơrơđah hloh bruă kơnuk kơna mă glăi lŏn pioh bơwih brơi pơđĭ kyar hrom amăng dêh čar, laih dơ̆ng ăt dưi pơgang ba boh tŭ yua kơ mơnuih rơngiă lŏn. Tui hăng ƀing khua mua jơnum lăi, amăng bruă ngă hră pơar pơhrui mă glăi lŏn dŏ lu tơlơi gun, kơƀah hơmâo anun yơh tơnap tap biă mă pơsir kơđi lu mơnuih ƀom kiơng, yua aka ƀu hơmâo djop tơlơi pơtrun amăng tơlơi phiăn, ƀudah dŏ kơƀah amăng tơlơi thâo hluh, bruă ngă hrom aka ƀu sa hnong amăng anom bruă kơđi čar djop gưl.

Yua kơ anun, hơdră ngă hră pơar, duh prăk, djru ĕp anih dŏ phrâo, pơdong sang, plơi pla kơ mơnuih rơngiă lŏn yua kơnuk kơna mă glăi pioh yua kơ bruă pơkŏn kiăng hơmâo tơlơi phiăn pơkă tong ten gêh găl; mơnuih ƀôn sang ngă pô, pơhaih tong ten rơđah rơđong tơpă djơ̆ hnong hăng glăm ba, kiăng pơgang anŏ tŭ yua bơkơnar kơplah wah kơnuk kơna hăng anom bruă sĭ mơdrô laih anun mơnuih ƀôn sang; Lu tơlơi pơgôp hiăp rơkâo ngă tui lu hơdră duh glăi lŏn mơnuih ƀôn sang, djru ba, pơdong brơi plơi pla anih dŏ hlâo kơ mă glăi lŏn mơ̆ng mơnuih ƀôn sang.