Khua git gai pơ ala mơnuih ƀon sang dêh čar ơi Vương Đình Huệ lăi glăi, thun 2022 lŏn ia ta hơmâo lu tơlơi dưi yôm phăn hăng djop mơta. Tơlơi bơwih ƀong huă pok prong tŏ tui hơđong; prăk kak hrŏ trun hơmâo pơhlôm hĭ, mrô blơi yua gơnam tam mơng rĭm čô mơnuih amăng ha thun đĭ 3,15% djơ̆ hăng hơnong pơkă mơng Ƀirô khua pơ ala mơnuih ƀon sang dêh čar; rơnoh GDP 8,02%, anai lĕ rơnoh lu hloh amăng 10 thun laih rơgao; rơnoh hrưn đĭ kơtang amăng bơwih ƀong huă hơmâo pơhlôm. Khua pơ ala mơnuih ƀon sang, Jơnum min apăn bruă khua pơ ala mơnuih ƀon sang, hơdôm anom bruă amăng ƀirô, Khua pơ ala mơnuih ƀon sang djop gưl tŏ tui hơmâo lu tơlơi pơplih phrâo, hrưn đĭ klă dong amăng bruă mă, ba glăi tŭ yua.

“Bruă Khua mua pơ ala mơnuih ƀon sang sem lăng, pơsit 5 grup bruă prong, yôm phun hăng kiăng ngă ječ amăng jơnum ƀu tui tơđar lok 2 ăt amra pơsir hĭ hmao tlôn lu tơlơi tơnap tap, gun găn sit nik ră anai, ngă akŏ phun kiăng ngă tui bruă jao thun 2023 hăng hơdôm thun pơ anăp dong”.

Khua git gai pơ ala mơnuih ƀon sang ơi Vương Đình Huệ rơkâo, thun 2023, djop gưl, gơnong bruă, anom bơwih ƀong sĭ mơdrô hăng mơnuih ƀon sang hruă kjăp, kiăo tui hơdôm tơlơi pơtrun, tơlơi pơsit klah čun mơng Khul apăn bruă Ping gah, tơlơi pơtrun mrô 68 thun 2022 mơng Khua pơ ala mơnuih ƀon sang kơ akŏ bruă pơđĭ kyar bơwih ƀong huă, mơnuih mơnam thun 2023; sit biă ñu, kiăng pơplih phrâo tơlơi pơmĭn, bruă mă, jơlan gah hăng hơdră pơsir phrâo, gir run, gơgrong, pơčeh phrâo hăng khut khăt amăng git gai wai lăng.

Khua git gai pơ ala mơnuih ƀon sang dêh čar pơtă pơtăn, kiăng kơtưn pơgiong hơdră pơđĭ kyar, đing nao pơsir hĭ tơnap tap, djru bơwih ƀong sĭ mơdrô hmao tlôn brơi mơnuih ƀon sang, anom bơwih ƀong sĭ mơdrô, pơjing hơdôm anih pơđĭ kyar hăng pơtrut pơđĭ kyar phrâo. Lăng yôm bruă djă pioh gru grua bơkơnar hăng bơwih ƀong huă, kơđi čar, mơnuih mơnam; ječ ameč kơsem min, pơjing jơlan hơdră tui hơnong pơkă dêh čar kơ gru grua kiăng hơkrŭ glăi hăng pơđĭ kyar gru grua kar hăng tơlơi git gai mơng Khua git gai Ping gah dêh čar ơi Nguyễn Phú Trọng. Ngă tui klă hơdôm hơdră djru mơnuih mơnam, pơhrŏ trun ƀun rin hơđong kjăp, pơhlôm pơplih phrâo, bơkơnar mơnuih mơnam, pơgang ayuh hyiăng, bơwih brơi tơlơi hơdip mơda kơ mơnuih ƀon sang, sit biă ñu ƀing mơnuih djru hơkrŭ, sang anŏ ƀun rin, sang anŏ tơnap tap kual ataih, asuek, kual giăm guai, bul pơtâo, kual mơnuih djuai ania ƀiă.

Hrŏm hăng anun kơtưn amăng bruă mă, hơkrŭ kjăp, wai pơgang rơnuk rơnua, hơđong; pơtrut kơtang hăng klă dong amăng pơtom hiăp, ba glăi tŭ yua, mut hrŏm jar kmar; pơhlôm pơgang rơnuk rơnua, hơđong, ngă hrŏm kiăng pơđĭ kyar tañ hăng hơđong kjăp. Anai lĕ hơnong pơkă pơđĭ kyar. Kiăng ngă ha amăng plĕ hăng tŭ yua hơdôm hơdră bruă mơng Jơnum ƀu tui tơđar lok 2, Khua pơ ala mơnuih ƀon sang dêh čar tal XV, Ơi Vương Đình Huệ rơkâo:

“Kơnuk kơna, Khua dêh čar, Jơnum min apăn bruă Khua pơ ala mơnuih ƀon sang dêh čar, khul pơ ala mơnuih djuai ania ƀiă, hơdôm anom bruă amăng Ƀirô khua pơ ala mơnuih ƀon sang dêh čar, djop gưl, gơnong bruă, hơdôm anom bruă amăng kơnuk kơna, hơdôm khul khua mua pơ ala mơnuih ƀon sang, pơphun pok pơhai ngă tui tañ hloh, hmao tlôn hơdôm tơlơi phiăn, tơlơi pơtrun phrâo tŭ yap, pơlir kjăp hăng tơlơi pơmĭn bruă mă mơng khul grup, ƀing apăn bruă kiăng pơhlôm glông yŭ mut hrŏm, djop bơnah ngă tui mơ̆ Khua git gai Ping gah ơi Nguyễn Phú Trọng lu wŏt lăi pơtong. Sit biă ñu, ƀing khua mua pơ ala mơnuih ƀon sang hăng jơlan gah lăp djơ̆, lăi pơthâo tañ hloh, tong ten tơl mơnuih ƀon sang đơ đam dêh čar boh tơhnal amăng lok jơnum; đing tơnga hmư̆, pơ ƀut glăi hăng lăi pơthâo tơlơi pơgôp hiăp hăng tơlơi čang rơmang mơng mơnuih ƀon sang; krăo lăng tŭ yua bruă pơsir hĭ hơdôm tơlơi rơkâo, ƀom kiơng mơng mơnuih ƀon sang”.

Laih dong, gơgrong pơgôp prap lui klă djop mơta kiăng mơnuih ƀon sang čơkă thun phrâo Quý Mão mơ-ak mơ-ai, rơnuk rơnua, pơkrem, hơmâo lu tơlơi pơtrut phrâo mơng anih anin hăng rĭm boh sang anŏ, gir run ngă pơgiong tơlơi pơtrun mơng Jơnum Ping gah tal XIII; akŏ bruă pơđĭ kyar bơwih ƀong huă-mơnuih mơnam thun 2023 mơng hơdôm hrơi blan akŏ thun phrâo mơtăm.