Pơ anai, Kơ-iăng khua dêh čar ơi Trần Lưu Quang lăi pơtong, pơ anăp anai pơtrut kơtang bruă pơsir, ngă giong tơlơi phiăn pơkă, kiăng hơđong na nao pioh kơ Hơdră dêh čar pơtrun dưi mă yua prăk tuh pơ alin djơ̆ anŏ kiăng.

Krăo lăng tơlơi tơña hăng lăi glăi, ƀing pơ ala tơña kơ Khua Ding jum-Khua Jơnum min djuai ania ơi Hầu A Lềnh ƀơi mông jơnum lok 5 tal XV, mơnuih ruah khua amăng dêh čar lăng yôm bruă Khua ding jum lăi glăi hơdôm tơlơi mơnuih ƀôn sang đing nao, pơsir djop djel laih mơ̆n hơdôm tơlơi aka ƀu djơ̆ găl, tơlơi dŏ kơƀah, laih dơ̆ng rơkâo hơmâo anăp ngă bruă hơdră phrâo pơsir gah kơ bruă ñu wai lăng. Pơdjơ̆ nao kơ bruă pok pơhai hơdră dêh čar pơkă pơđĭ kyar bơwih ƀong huă mơnuih mơnam kual mơnuih ƀôn sang djuai ƀiă hăng čư̆ siăng, mơnuih ruah khua ơi Trương Thế Vinh, apăn gah bruă djuai ania tơring glông Ia Grai, tơring čar Gia Lai lăi lĕ, mơnuih apăn bruă kơnuk kơna kual plơi pla tơnap tap biă mă lơ̆m pok pơhai ngă tui hơdră anai. Mơnuih ruah khua  ơi Trương Thế Vinh lăi:

“Hơmâo lu hră pơtrun mơ̆ng tơring čar aka ƀu hmao ngă tui ôh pơkă bruă brơi pok pơhai ngă mơtam, biă mă ñu pơ kual plơi pla aka ƀu hơmâo hră pơčrâo ba tong ten. Kah hăng Kơčăo bruă mrô 1 djru sang dŏ, lŏn pơdong sang, lŏn ngă hmua tui hră pơtrun mrô 4 mơ̆ng Khua dêh čar lĕ, lŏn dŏ rơnoh prăk djru 44 klăk prăk kơ sa boh sang anŏ, hăng lŏn ngă hmua 22 klăk prăk sa boh sang anŏ hiư̆m dưi pok pơhai. Lŏn ngă hmua ră anai pơmă, pơkă hăng rơnoh prăk djru laih anun rơnoh prăk brơi čan kơnong hơdôm anun hiư̆m thâo djop prăk blơi hmua hăng pơdong sang”.

Ơi Lâm Tấn Bình, mơnuih ruah khua djuai ania Chăm dŏ ƀơi să Phan Hiệp, tơring glông Bắc Bình, tơring čar Bình Thuận lăi, tal blung a jơnum prong khua ding jum lăi glăi tơpă, rơđah rơđong boh yôm phun, biă mă ñu hơdôm tơlơi pơdjơ̆ nao kơ jơlan hơdră mơ̆ng Ping gah hăng Kơnuk kơna pơdjơ̆ nao tơlơi gơgrong glăm ba mơ̆ng Ding jum ngă hrom djop ding jum anom bruă pơkŏn. Mơnuih ruah khua ơi Lâm Tấn Bình ăt lăi pơthâo tơlơi bơngơ̆t, tơlơi tơnap tap mơ̆ng Khua ding jum ơi Hầu A Lềnh hơmâo pơblang brơi jơlan hơdră, tơlơi pơtrun mơ̆ng kơnuk kơna boh nik ñu mă yua rơnoh prăk tuh pơ alin pơđĭ kyar bơwih ƀong huă mơnuih mơnam kual djuai ƀiă dŏ:

“Hăng tơlơi glăm ba bruă mă mơ̆ng Ding jum ăt kah hăng hơdôm tơlơi pơkă nao pơ anăp adih ngă hiư̆m pă kiăng mơnuih ƀôn sang thâo hluh hăng tŭ mă jơlan hơdră mơ̆ng ping gah hăng kơnuk kơna tuh pơ alin djơ̆ lăp hăng găl biă mă tui hăng tơlơi gêh găl, tơlơi hơdip mơda mơnuih ƀôn sang djuai ƀiă amăng kual čư̆ siăng tơpă laih kah hăng Khua ding jum hơmâo lăi amăng mông jơnum tơña lăi glăi anun”.

Ƀơi anăp khua mua pơ ala mơnuih ƀôn sang, Kơ-iăng Khua dêh čar ơi Trần Lưu Quang brơi thâo: Truh abih blan 5/2023, rơnoh prăk thun 2022 kơ hơdră anai kơnong ngă djop 58% rơnoh prăk tuh pơ alin pơđĭ kyar, rơnoh prăk thun 2023 lĕ 17% rơnoh prăk pơđĭ kyar. Dŏ 2 thun mơkrah đôč kiăng ngă giong črăn sa hơdră anai, hloh kơ anun dơ̆ng, lu mrô mơnuih ƀôn sang djuai ƀiă tŭ mă tơlơi djru mơ̆ng hơdră anai hlăk bưp lu tơlơi tơnap tap. Kơ-iăng Khua dêh čar pơčrâo rơđah anŏ aka ƀu djơ̆, tơlơi dŏ gun amăng bruă pok pơhai yua kơ hră pơar pơtrun lu đơi, dŏ bơrơkua nao rai, ngă tơnap amăng bruă mă yua rơnoh prăk mơ̆ng gơnong dlông djru. Kơ-iăng Khua dêh čar lăi pơ anăp adih khom pơsir, ngă giong jơlan hơdră tơlơi phiăn pơtrun pioh Hơdră anai dưi mă yua djơ̆ hăng anŏ kiăng:

“Tơlơi yôm hloh lĕ ƀing gơmơi amra pơtrut bruă pơpha djop gưl tơring čar kiăng ƀing khua apăn bruă amăng anun pơphun ngă tui. Hơdôm tơlơi mơ̆, djop tơring čar thâo kah ngă tui djơ̆ hloh. Tơlơi kiăng hrom lĕ gir run djru pơsir hĭ hơdôm tơlơi hơmâo, ngă hiư̆m pă dưi pơsir hĭ tơlơi anai djơ̆ hrơi tơlơi pơkă hăng djơ̆ hăng tơlơi kiăng mơ̆ng djop mơnuih čang rơmang”.

Pơđut hĭ hơdôm khul bruă anai amăng tơlơi tơña gah bruă djuai ania, Khua git gai pơ ala mơnuih ƀôn sang dêh čar ơi Vương Đình Huệ čih pioh hơdôm tơlơi lăi glăi pơdah rai bruă mă glăm ba, pran jua tơpă hăng akŏ pơdong. Pơčrâo rơđah tơlơi dŏ kơƀah, tơlơi aka ƀu sir, boh nik ñu pok pơhai kaih Hơdră mơ̆ng dêh čar pơtrun. Hơmâo hơdôm pok hră pơtrun hăng ngă tui aka ƀu djơ̆ sa hnong, aka ƀu rơđah rơđong, aka tum teč, Khua git gai pơ ala mơnuih ƀôn sang dêh čar rơkâo, pơ anăp anai khom pok pơhai khut khăt hăng ngă tui djơ̆ hơdră, djru kơ jơlan hơdră djru kơ mơnuih djuai ƀiă mơ̆ng thun 2021-2030. Pơtum abih bang tơlơi gêh găl mơnuih mă bruă tuh pơ alin pơđĭ kyar bơwih ƀong huă mơnuih mơnam kual mơnuih djuai ƀiă hăng kual čư̆ siăng; amăng anun pơtum nao ƀơi anih tơnap tap hloh, kual djuai ania ƀiă dŏ tơnap tap hăng anih anom tơnap tap hloh kiăng djru ba găl.