Hơdôm tơlơi ruai, tơlơi ngă sen kơ tơlơi hmâo ƀơi jơlan nao rai, hơdôm tơlơi ruai hmư̆ ngă pơhư̆č pran jua ƀudah hơdôm tơlơi tơña pơtô jơlan hmâo bôh than phun, sit nik kơ pơhlôm ƀơi jơlan nao rai dưi lăi pơthâo amuñ thâo hluh, amuñ hơdor, ngă brơi hơdôm mông lăi pơhing tui akô̆ bruă tơlơi phiăn pơhlôm ƀơi jơlan nao rai pơsôh hloh, ngă pơhư̆č pran jua hloh.

Rơđah biă ñu, ƀơi Sang hră gưl dua Độc Lập, phường Trung Thành, Khul hlăk ai plơi prong Thái Nguyên gum hrom hăng Kông ang plơi prong Thái Nguyên, Sang bruă blơi sĭ gơnam hăng dêh čar tač rơngiao Thái Nguyên pơphun lăi pơhing pơhlôm ƀơi jơlan nao rai hăng pơtô mơgăt rơdêh pơhlôm brơi giăm truh 1.200 čô čơđai sang hră. Ƀudah kah hăng tal lăi pơhing kơ pơhlôm ƀơi jơlan nao rai brơi rơbêh kơ 1.300 čô mơnuih apăn bruă, nao pơtô čơđai, čơđai sang hră ƀơi Sang hră gưl tlâo Điềm Thụy, tơring glông Phú Bình, yua kơ Anom bruă tơhan wai lăng bruă nao rai ƀơi jơlan, Kông ang tơring čar gum hrom hăng Grŭp pơgang hơđong ƀơi jơlan nao rai tơring čar hăng Khul hlăk ai tơring čar Thái Nguyên pơphun. Lom anun, giăm hmâo 800 čô mă bruă pơtô pơhrăm nai pơtô čơđai hăng čơđai sang hră gưl tlâo Trần Quốc Tuấn (tơring glông Đồng Hỷ) ăt hmâo gum hrom mơn mông bơkơtuai hơduah ĕp tơlơi phiăn kơ pơhlôm ƀơi jơlan nao rai hăng tơlơi gum djru mơng Kông ang tơring glông Đồng Hỷ. Sang hră gưl 3 Lưu Nhân Chú (tơring glông Đại Từ), sang hră gum hrom hăng Kông ang tơring glông Đại Từ pơphun ngă Lơphet kĭ pơkôl pơkă gum hrom pơhlôm bruă hơđong ƀơi jơlan nao rai, pơhlôm ƀơi sang hră. Gum hrom kĭ tơlơi pơkă gum hrom dô̆ hmâo khua pơ ala 8 bôh să lĕ anih anom hmâo čơđai sang hră glăk tui hrăm ƀơi sang hră.

Hăng tơlơi pơplih tañ, thâo bruă amăng pơhrua hrom kơplah wah hơdôm bôh yôm lăi pơhing hăng hơdră lăi pơhmu nao, hră čih tơlơi pơhing, biă ñu hơdră ngă sen, mông bơkơtuai hmâo mă laih tơlơi gum hrom hur har mơng abih bang ƀing čơđai sang hră. Ƀing čơđai hur har biă lom dưi bơkơtuai, lăi glăi tơlơi tơña bơdjơ̆ nao truh bruă rô nao rai ƀơi jơlan glông hăng dưi pơtô brơi bôh thâo nao rai ƀơi jơlan pơhlôm, mă yua muk kaih pơgang akô̆ djơ̆ hơdră...

Lăi pơthâo mơng adơi Đỗ Ngọc Ánh, anih 11A1, Sang hră gưl 3 Trần Quốc Tuấn :

 “Ƀơi anih hrăm ƀing gơmơi hơduah ĕp mơn kơ nao rai pơhlôm ƀơi jơlan, tui anun mơn anun jing bôh thâo ƀu ngă pơhư̆č ôh. Mông bơkơtuai hơduah ĕp tơlơi phiăn pơhlôm ƀơi jơlan nao rai anai ƀing gơmơi ƀuh pơhư̆č pran jua hloh, lăi pơhing tui jơlan ngă sen, hơdôm tơlơi ruai ngă pơhư̆č pran jua samơ̆ tŭ yua biă, mơng anun ƀing gơmơi ruah mă lu tơlơi găn rơgao lom nao rai ƀơi jơlan glông”.

Hăng adơi Đỗ Như Ngọc, anih 12A1, Sang hră gưl 3 Chuyên Thái Nguyên brơi thâo :

 “Hơdră pơhiăp, ăt kah hăng bôh yôm bơkơtuai lăng juăt amuñ thâo hluh hloh, pơtrut drơi pô thâo hluh kơ phiăn nao rai ƀơi jơlan, tơdơi kơ anun pơdah tơlơi pơpŭ hăng hơdră ngă tui djơ̆, pơpŭ pô, sang anô̆ hăng mơnuih mơnam”.

Amăng hơdôm jơlan hơdră, čơđai sang hră hăng mơnih mă bruă, nai pơtô čơđai Sang hră hmư̆ tơlơi pơhing tañ kơ tơlơi rơnuk rơnua hơđong, hơđong pơhlôm ƀơi jơlan nao rai amăng tơring čar, ƀôn prong ; lăi pơthâo hơdôm bôh yôm phun mơng Tơlơi phiăn nao rai ; hơdôm tơlơi ngă soh lĕ bôh than ba truh ƀơi jơlan ; bôh thâo nao rai ƀơi jơlan, hơdôm bôh pơhiăp hmư̆ klă lom nao rai kah hăng : Ngă tui tơpă mă pô hơdôm tơlơi pơkă ƀơi jơlan glông ; hơdôm hnal lăi pơhing hăng apui lăi pơthâo ; hơdră pơsir hơdôm tơlơi truh lom hmâo tơlơi ; bôh thâo tơlơi phiăn kơ pơhlôm ƀơi jơlan nao rai hăng pơtô bôh thâo mơgăt rơdêh pơhlôm... Hơdôm bôh sang hră ăt pơkôl mơn hăng Anom tơhan polih ƀơi jơlan nao rai ngă tui hơdôm tơlơi pơkă kơ jơlan nao rai. Thiếu tá Nguyễn Nam Hưng, Anom tơhan polih wai lăng bruă nao rai ƀơi jơlan, Kông ang tơring čar Thái Nguyên brơi thâo :

 “Lăi pơhing hăng hơdră lăng nao rai mơng ataih, lăi pơhing tui internet, hrom hăng anun lăi pơhing ƀơi anăp ƀing gơmơi ăt pơplih phrâo mơn bôh yôm hơdră lăi pơhing, ngă hiưm hơpă amuñ thâo hluh, amuñ hmư̆”.

Tal anai, Anom bruă tơhan polih wai lăng bruă nao rai hmâo pơphun pơdă prưng rŭp  “Tơlơi truh ƀơi jơlan nao rai, pơsir tơlơi ngă soh”; pơpha hyu 1000 pok hră lăi pơhing pơhlôm ƀơi jơlan nao rai hăng ƀơk 20 muk kaih Honda djơ̆ tơhnal brơi kơ ƀing čơđai sang hră. Jơlan hơdră ăt ƀơk brơi mơn kơ ƀing čơđai sang hră lĕ “pô pơ ala bôh thâo pơhlôm ƀơi jơlan nao rai” hăng ƀing čơđai hmâo tơlơi hơdip tơnap.

Anai lĕ bruă mă dưi hmâo Khul hlăk ai Thái Nguyên gum hrom hăng hơdôm bôh anom pơphun na nao, hăng lu hơdră lu mơta, sit nik. Mơng anun kiăng prăp brơi kơ čơđai sang hră hơdôm bôh thâo mơgăt rơdêh pơhlôm, djru ƀing čơđai hmâo, ngă tui klă tơlơi phiăn ƀơi jơlan nao rai. Pơ̆ anăp anai, Khul hlăk ai Thái Nguyên pơphun dong ƀơi sa dua bôh sang hră amăng plơi prong./.