Khă tui anun, tơlơi hlăk ai mơnuih djuai ania ƀiă nao mă bruă pơ ataih jai hrơi lu, ngă bơbeč ƀu anet ôh hơdră pơđĭ kyar bơwih ƀong huă mơnuih mơnam ƀơi hơdôm tơring glông kual čư̆ siăng Nghệ An. Yua kơ anun, pơsir bruă mă kơ hlăk ai mơnuih djuai ƀiă ră anai kiăng kơtưn hăng pơtrut tui hloh.

Amăng hră čih anăn wai lăng, tơdăm dra mut phung să brơi ƀuh, tơring glông Kỳ Sơn hơmâo rơbêh 421 čô tơdăm dra hlăk ai, samơ̆ ƀuh rơđah, rĭm wơ̆t pok pơhai sa bruă mă kơsung nao pơ anăp lĕ mrô mơnuih hlăk ai iâu pơtum aka ƀu hơmâo ha mơkrah ôh, khul mă bruă wai lăng tơdăm dra mut phung să bưp lu tơlơi tơnap tap biă mă kiăng dưi ngă djop tơhnal pơkă jao. Ayong Lương Văn Tạc, khua git gai khul tơdăm dra mut phung să Phà Đánh, tơring glông Kỳ Sơn, Nghệ An brơi thâo:

“Nao mă bruă ring bruă pioh kơ hlăk ai, črăn bruă yua tơdăm dra mut phung ngă thun anai, iâu pơtum ƀu lu ôh yua dah ƀing hlăk ai nao mă bruă pơ ataih abih hăng truh têt đôč gơñu glăi pơtum lu”.

Ƀuh rơđah kah mrô mơ̆ng să lăi pơthâo anun, hơmâo pơ lu tơring glông pơkŏn kual čư̆ siăng yŭ tơring čar Nghệ An ăt tui anun mơ̆n. Tơlơi anai ƀu kơnong ngă kơƀah mrô mơnuih hlăk ai ngă hrom bruă mă amăng să pioh kơ tơdăm dra mut phung, amăng bruă lui rơmŏn kŏn rin ƀơi kual ataih, kual asuek đôč ôh dŏ bơbeč ƀu anet ôh amăng bruă pơđĭ kyar pơmut mơnuih ping gah jing mơnuih djuai ƀiă. Ayong Nguyễn Đình Thuận, Khua git gai grup tơdăm dra mut phung tơring glông Quỳ Hợp, Nghệ An lăi:

“Mrô mơnuih dŏ glăi amăng plơi ƀiă biă mă anun bơbeč truh bruă mă iâu pơtum hlăk ai mut mă bruă hrom kah hăng ngă tui bruă pơtrun amăng tơring glông, djru hrom bruă mơnuih mơnam”.

Bơ amai Lữ Thị Băng Châu, Khua git gai tơdăm dra mut phung tơring glông Con Cuông, Nghệ An lĕ lăi:

“Tơlơi pơmin ăt kah hăng tơlơi thâo hluh mơ̆ng ƀing hlăk ai hăng bruă hơduah ĕp tơlơi thâo thăi kơ pơđĭ kyar bơwih ƀong huă dŏ kơƀah, yua kơ anun, hơdră ngă tui ƀing hlăk ai pơđĭ kyar bơwih ƀong huă amăng sang anŏ lĕ ƀiă, aset đôč, hơdôm čô đôč ngă hăng boh tŭ yua aka lu ôh”.

Anăp nao kơ tơhnal pơkă pơsir bruă mă kơ hlăk ai mơnuih djuai ƀiă, djop gưl anom bruă ping gah, gong gai kơnuk kơna hăng djop tơpuôl mơnuih mut phung ƀơi Nghệ An hơmâo dăp lu hơdră,  kơčăo bruă djru hlăk ai mơnuih djuai ƀiă brơi dŏ glăi amăng plơi ƀudah jak iâu ƀing hlăk ai pơwơ̆t glăi pơ plơi akŏ pơjing bruă mă bơwih ƀong huă, ngă pơdrong ƀơi plơi pla. Ayong Vi Thái Thuận, Khua git gai anom bruă tơdăm dra hlăk ai tơring glông Kỳ Sơn, Nghệ An brơi thâo:

“Khua mua git gai tơdăm dra mut phung tơring glông hơmâo hơduah ĕp hơdră djru kơ hlăk ai pơphun bruă mă. Hrom hăng anun, khua mua hlăk ai tơring glông ăt amra đing nao, ngă hrom djop sang bruă pơphun anih pơtô bruă mă, pơtô ƀiă hrơi kơ mơnuih hrăm hlơi kiăng ĕp lăng, laih anun pơtô ba yua boh thâo ia rơgơi kơ mơnuih ƀôn sang ngă hmua, djru tơlơi thâo kơ ƀing hlăk ai tơdăm dra kiăng kơ ƀing hlăk ai pơphun bruă mă”.

Thun 2016, Mong Văn Sơn, pơsit pran jua pơwơ̆t glăi pơ plơi Phà Khảo, čan prăk mơ̆ng sang bruă prăk djru mơnuih mơnam, sang bruă prăk djru bruă hmua, tuh pơ alin rông kơbao, rơmô. Pơphun mơ̆ng sa drơi kơbao hăng 3 drơi rơmô đôč, dưi hơmâo să Phà Đánh ngă gêh găl brơi pơjing anih phai rông rơmô kơbao amăng 3 ha lŏn, truh ră anai ñu hơmâo sa blah đang hmua công rơmô kơbao, pơhrui glăi 100 klăk prăk rĭm thun. Hăng tơlơi gir run, tŭ añ tơlơi tơnap tap gleh glar mă bruă, Mong Văn Sơn jing hlăk ai ba gru hlâo bơwih ƀong huă rơgơi plơi Phà Khảo, ăt kah hăng djuai ania Khmŭ ƀơi tơring glông Kỳ Sơn. Ayong Mong Văn Sơn brơi thâo:

“Kâo tuh pơ alin rông kơbao, rơmô, hrom hăng anom bruă tơdăm dra ăt djru brơi čan prăk čem rông hăng wai lăng rơmô kơbao. Kâo hơmâo hrăm tui hơdră rông kơbao, rơmô anun ba yua djơ̆ tŭ yua kơ ta”.

Kiăng pok pơhai hơdră djru kơ hlăk ai mơnuih djuai ƀiă, pơsir bruă mă, pơtruh brơi tơlơi pơhing brơi kơ hlăk ai pơđĭ kyar bơwih ƀong huă ăt kah hăng djru hrom pơsir tơlơi ƀun rin, pơhrŏ ƀiă sang anŏ rin amăng plơi pla, pơtrut pran jua hlăk ai kơsung nao pơ anăp, khin pơmin, khin ngă, pơphun bruă mă jing sa bruă mă yôm pơphăn. Hăng grup tơdăm dra mut phung să Minh Hợp, tơring glông Qùy Hợp, djru pơtruh brơi tơlơi pơhing, pơsir bruă mă kơ hlăk ai tơdăm dra mut phung mơnuih djuai ƀiă dưi lăng kah hăng sa bruă mă yôm hloh amăng bruă pơtrut hlăk ai pơphun bruă mă. Hrom hăng akŏ pơjing hơbô̆ bruă să Minh Hợp pơtim pok pơhai lu hơdră mă bruă pơblih pơjeh djuai phun pla, hlô mơnong rông brơi ƀing hlăk ai tơdăm dra ngă tui, mơ̆ng anun djru hrom ngă tui truh kih hră pơtrun mơ̆ng ping gah să rơwang bruă thun 2020-2025.

Sit jơlan hơdră djru hmao kru, dưi ngă gêh găl kơ anŏ yua mă bruă djru ba tơlơi thâo hluh lĕ, ƀing hlăk ai tơdăm dra mut phung mơnuih djuai ƀiă amra kơtưn gir ƀu kơnong pơklaih mơ̆ng ƀun rin đôč ôh, dŏ ngă pơdrong kơ sang anŏ, jing pran kơtang phun djru hrom bruă ngă tui hơdră pơđĭ kyar bơwih ƀong huă mơnuih mơnam amăng plơi pla.