Ƀơi să Snay Anhchit, tơring glông Chumkiri, tơring čar Kampot, dêh čar Kur, neh met wa hơdip gơnang nao bruă ngă đang hmua đôč, ataih mơng tơring glông yua anun tơlơi hơdip mơda laih dong bruă khăm pơjrao dŏ tui sô hơđăp hăng bưp lu tơlơi tơnap tap, kơƀah djop mơta. Yă Chanol ƀuh ƀô̆ đô̆i Việt Nam nao khăm, ƀơk jrao soh sel brơi kơ neh met wa hăng mơnuih ƀon sang ƀơi anai, ñu ol kơdol biă mă: “Ñu pô ruă kă mơn samơ̆ ƀu hơmâo prăk nao khăm pơjrao, ră anai hơmâo ƀing nai ia jrao, ơi ia jrao mơng anom bruă git gai ling tơhan tơring čar Kiên Giang nao khăm hăng ƀơk jrao, ƀơk gơnam brơi neh met wa ƀơi anai, ñu hok mơ-ak biă mă. Ñu ăt pơpŭ bơni abih pran jua”.

Amăng hrơi mông ngă tui bruă jao, grup hyu mă bruă bưp lu tơlơi tơnap tap mơng ayuh hyiăng, jơlan nao rai, tơlơi pơhiăp phara, samơ̆ ƀơi anăp kơ hơdôm tơlơi tơnap tap mơng mơnuih ƀon sang ƀơi anai, rĭm čô mơnuih amăng grup lêng pơ alum pran jua tơdruă găn rơgao tơnap tap kiăng pơgiong bruă jao. Tơlơi lăi pơthâo mơng ơi ia jrao Trần Thu Quỳnh, sang ia jrao prong tơring čar Kiên Giang:

“Kâo pô ăt bơngŏt, sư̆ rơbư̆ lơ̆m tal blung a kâo nao khăm pơjrao pơ dêh čar anai. Mah bưp lu tơlơi tơnap tap mơng jơlan nao rai, kơƀah ia jrao kah hăng gơnam măi mok gah ia jrao, samơ̆ mơng anai kâo ƀuh bruă bơwih brơi tơlơi suaih pral kơ neh met wa ƀơi anai tơnap tap biă mă, kâo pô lĕ ơi ia jrao hrŏm hăng adơi ayong pơkŏn amăng grup ăt gir run abih pran jua kiăng kơ khăm pơjrao brơi neh met wa ƀơi anai, kah hăng pơgôp ngă plai ƀiă tơlơi glêh tơnap kơ anih anom ia jrao ƀơi ƀon lan”.

Thiếu tá Hoàng Trọng Thiên, Khua sang ia jrao gah anom bruă git gai ling tơhan tơring čar Kiên Giang brơi thâo:

“Sit biă ñu hrơi mông prap lui hăt he đơi, aka ƀu pơhlôm klă ôh samơ̆ amăng hrơi mông nao khăm pơjrao ayong adơi ăt gir run hăng lơ̆m nao truh pơ anih hơmâo anih anom ia jrao ƀơi ƀon lan kah hăng mơnuih ƀon sang tum čơkă yua anun tal nao khăm pơjrao anai ăt pơphun hiam klă mơn”.

Ƀơi anai, ƀing nai ia jrao, ơi ia jrao mơng anom bruă git gai ling tơhan tơring čar Kiên Giang khăm hăng ƀơk rơbêh 300 anung jrao soh sel brơi ƀing apăn bruă hăng mơnuih ƀon sang ƀơi anai, rĭm anung jrao nua ñu 100.000 prăk. Laih dong ƀơi rĭm anih nao khăm hăng ƀơk jrao, grup ăt ƀơk 60 anung gơnam brơi sang anŏ ƀun rin, rĭm anung  gơnam nua ñu 500.000 prăk. Bruă mă anai pioh glăi lu tơlơi hiam klă hăng gong gai ƀon lan hăng neh met wa ƀơi dêh čar Kur kơ rup rap ƀô̆ đô̆i Việt Nam amăng rơnuk rơngai. Yă Sui Kết, dŏ ƀơi tơring glông Chumkiri, tơring čar Kampot brơi thâo: “Ñu hok mơ-ak biă mă lơ̆m ƀing nai ia jrao rai ƀơk gơnam hăng khăm pơjrao, ƀơk brơi jrao soh sel, ƀu hơmâo hơget yôm hloh ôh, tơdah dưi tơdơi anai rai djru brơi ƀing gơñu dong, yua amăng thun blan giăm anai, mơnuih ƀon sang glăk bưp lu tơnap tap, mah gơnam ñu aset samơ̆ djru brơi ƀing gơñu găn rơgao tơnap tap”.

Mơng thun 2015 truh ră anai, anom bruă git gai ling tơhan tơring čar Kiên Giang hơmâo pơphun ba 6 grup ia jrao nao khăm hăng ƀơk gơnam brơi rơbêh 3.500 anung jrao brơi mơnuih ƀon sang ƀơi hơdôm boh să, tơring glông dŏ bưp tơnap tap ƀơi dêh čar Kur hăng abih tih prăk djru rơbêh 400 klăk prăk. Rĭm tơlơi tơña bla, rĭm anung jrao, rĭm anung gơnam ƀơk lĕ hơdôm boh geč ngă kjăp tui pran gum pơgôp, giang mah kơplah wah ling tơhan hăng mơnuih ƀon sang dua bơnah. Đại tá Tếp Âm, Kơ-iăng khua puih tơhan ƀơi Kampot brơi thâo: “Hơmâo gưl glông jao gum hrŏm hăng ƀing nai ia jrao tơring čar Kiên Giang nao khăm, ƀơk jrao hăng gơnam tam. Mơng bruă gum hrŏm, pơlir hơbit hăng grup ƀơi tơring čar, Grup gơgrong bruă K92, hơmâo nao khăm ƀơk jrao ƀơi să Snay Anhchít. Ñu hok mơ-ak hăng pơpŭ bơni kơ ƀing ơi ia jrao mơng tơring čar Kiên Giang lu biă mă”.

Bruă ƀing nai ia jrao, ơi ia jrao nao khăm hăng ƀơk jrao soh sel brơi neh met wa ƀơi să Snay Anhchít lĕ bruă yôm phăn biă mă mơng ling tơhan tơring čar Kiên Giang, hrŏm hăng gong gai ƀon lan dêh čar Kur bơwih brơi tơlơi hơdip kơ mơnuih ƀon sang. Mơng anun ngă gêh gal kiăng grup K92 ră anai glăk hyu ĕp, klơi ba glăi tơlang tơleh tơhan hăng ƀing djru bruă djai pơsăn drơi mơng Việt Nam ƀơi dêh čar Kur tañ pơgiong bruă jao, ba ƀing gŏp djai pơsăn drơi glăi pơ lŏn ia ơi yă amĭ ama. Anai lĕ hrơi mông kiăng ngă kjăp tui pran gum pơgôp, pơhlôm kjăp hăng kơtưn dong tơlơi rô nao rai mut hrŏm, giang mah kơplah wah tơring čar Kiên Giang hăng Kampot lăi phara, kơplah wah dua Kơnuk kơna, mơnuih ƀon sang Việt Nam - Kur hnun mơn. Đại tá Cao Minh Tâm, Kơ-iăng khua anom bruă git gai ling tơhan tơring čar Kiên Giang brơi thâo dong:

“Bruă pơphun ƀơk jrao hăng gơnam brơi mơnuih ƀon sang ƀơi tơring čar KamPốt mơng anom bruă git gai ling tơhan tơring čar hăng sang ia jrao prong tơring čar Kiên Giang kiăng ngă gêh gal hloh kơ bruă bơwih brơi tơlơi suaih pral kơ mơnuih ƀon sang ƀơi tơring čar Kampot lăi hrŏm hăng tơring čar Chumkiri hnun mơ̆n kiăng ngă kjăp tui pran gum pơgôp, giang mah kơplah wah Việt Nam hăng Kur kah hăng kơplah wah tơring čar Kiên Giang hăng Kampot”.