Tơlơi ruai ƀơi Puih kơđông pơgang guai dêh čar Huổi Luông, pơdŏng ƀơi să Huổi Luông, tơring glông Phong Thổ, tơring čar Lai Châu jing anô̆ pơdah lu mơta kơ bruă hrăm hăng ngă tui tơlơi pơmin, pran jua, kơnuih Hồ Chí Minh glăk pơphun dik dăk amăng abih bang khul ling tơhan, sit nik hăng rơđah rơđông.

Giàng Mý Só lĕ sa amăng 5 čô čơđai tơnap tap, dưi hmâo Puih kơđông pơgang guai dêh čar Huổi Luông, tơring glông Phong Thổ, tơring čar Lai Châu čơkă rông ba hăng djru rim blan 500 rơbâo prăk. Ol kơdol pran jua Só lăi pơthâo: Thun anai kâo đĭ anih 5 laih, tơdah ƀu hmâo ƀing ling tơhan pơgang guai dêh čar čơkă rông ba kâo amra ƀu hmâo tơlơi gal pioh nao sang hră, nao hrăm hră ôh:

 “Tơlơi hơdip mơda sang anô̆ kâo tơnap tap biă, ƀu hmâo braih huă; dưi hmâo ƀing ling tơhan čung ba nao sang hră, djru rim blan 500 rơbâo prăk, kâo hmâo yua laih prăk pioh blơi hơdrôm hră, hră čih, gơnam mă yua hrăm hră hăng pơkrem pioh blơi braih huă. Ƀing ling tơhan gum djru, kâo amra gir run hrăm hră, nao hrăm hră ƀu rơkut ôh”.

Thiếu tá Nguyễn Hữu Kiểm, mă bruă Kơđi čar Puih kơđông pơgang guai dêh čar Huổi Luông brơi thâo: Pơsit Jơlan hơdră “Čung tơkai adơi nao sang hră” hăng “Ană rông puih kơđông pơgang guai dêh čar” lĕ sa amăng hơdôm bruă mă tŭ yua kơ ană mơnuih. Yua anun, dong mơng hrơi pok pơhai puih kơđông hmâo lăi pơhing laih, pơsur mơnuih apăn bruă tơhan gum hơgôp hăng iâu pơthưr dŏng yua mơng hơdôm khul grŭp, mơnuih pioh čơkă rông hăng djru ƀing čơđai.

Hrom hăng gum djru prăk, puih kơđông dô̆ pơkiăo nao mơnuih mă bruă djru sang anô̆ yuă hơpuă, ngă đang hmua. Hrom hăng anun gơgrong hlâo gum hrom hăng gong gai plơi pla pel ĕp glăi hơdôm bôh sang anô̆ čơđai sang hră amăng plơi pla tơnap tap, sang anô̆ ƀun rin samơ̆ ƀu dưi čơkă rông ba, djru gum pioh iâu pơthưr djru gum khăp păp hăng hơdră brơi gơnam tam ƀong mơñum, prăk djru hrăm hră ƀrô djơ̆ hrơi mut sang hră, hrơi Jar kơmar pioh kơ čơđai muai lơ 1/6, ƀudah krah blan 8 blan di (blan prơmi)... Anai ăt lĕ sa amăng hơdôm bruă mă sit nik mơ̆ Puih kơđông Huổi Luông glăk ngă tui klah čun mrô 01 mơng Ding jum kơđi čar kơ ngă tui dong Tơlơi črâo ba mrô 05 kơ pơtrut kơtang hrăm hăng ngă tui tơlơi pơmin, pran jua, kơnuih Hồ Chí Minh. Thiếu tá Nguyễn Hữu Kiểm brơi thâo:

 “Jê̆ hăng anai hloh Puih kơđông ngă tui laih hơdră plơi pla guai dêh čar hăng hmâo laih 82 bôh sang anô̆ dưi pok pơhai mơng Hồ Thầu hăng rơbêh kơ 3km jơlan guai dêh čar hăng hơdôm bruă mă rơđah lĕ ƀing gơmơi hmâo jao laih kơ hơdôm grŭp hăng rim mơnuih ping gah rim blan, rim rơwang hrơi tơjuh truh pơ̆ rim sang anô̆ kiăng lăi pơhing, pơsur hăng 5 tơlơi pơmin, čang rơmang mơng neh wa, hrom hăng anun pơtô brơi neh wa ngă tui hơdră phun pla, hlô rông pơđĭ kyar bơwih ƀong sang anô̆.

Hăng bruă wai lăng, pơgang rơbêh kơ 13km jơlan guai dêh čar hăng 15 bôh pŏng gong guai dêh čar, hmâo 21 bôh plơi, pioh bruă hrăm hăng ngă tui Wa nao dơlăm, ba glăi bôh tơhnal, Ping gah, Grŭp git gai Puih kơđông pơgang guai dêh čar Huổi Luông hmâo pơplih rơđah bruă hrăm hăng ngă tui gru Wa hăng hơdôm bruă mă sit nik hăng pok pơhai truh abih bang mơnuih apăn bruă, mơnuih ping gah, ling tơhan pioh ngă hră rơkâo mơng 1 truh 2 bôh yôm bruă mă. Đại úy Tẩn Lở Tông, Puih kơđông pơgang guai Huổi Luông, tơring glông Phong Thổ, tơring čar Lai Châu lăi pơthâo:

 “Drơi pô kâo tơdơi kơ dưi lăi pơthâo, hrăm, ngă tui gru hiam, kơnuih pran jua Hồ Chí Minh, amăng bruă wai lăng, pơgang guai dêh čar kâo pơphô brơi laih kơ Ping gah, Grŭp git gai puih kơđông ngă klă bruă hyu tir, wai lăng guai dêh čar pŏng gong guai dêh čar. Kâo hmâo hyu lăi pơhing, pơsur neh wa bruă pơgang guai dêh čar. Mơng anun neh wa hmâo pơđĭ tui tơlơi pơmin hăng ngă tui tơpă”.

Hơdôm thun rơgao, Puih kơđông pơgang guai Huổi Luông ăt gơgrong hlâo gum hrom mơn hăng gong gai plơi pla amăng bruă lăi pơhing kơ mơnuih ƀôn sang pơđĭ tui tơlơi pơmin pơdŏng hăng pơgang guai dêh čar; djru lu sang anô̆ tơnap tap pơđĭ kyar bơwih ƀong, djru čơđai sang hră tơnap tap dưi nao sang hră.

Mơng bruă hrăm hăng ngă tui Wa ƀơi Puih kơđông pơgang guai Huổi Luông hmâo ba truh laih tơlơi đăo gơnang kơ neh wa djop djuai ania kual guai dêh čar, pơđĭ tui gru rŭp klă hiam mơng ling tơhan, djru pơdŏng puih kơđông djơ̆ phiăn pơkă, kơjăp kơtang abih bang, ngă giong klă bruă djă pioh pô, rơnuk rơnua guai dêh čar mơng Lŏn ia./.