Thun 2023, rơnoh prăk ngă tui jơlan hơdră tui hơnong pơkă dêh čar pơđĭ kyar kual mơnuih djuai ania ƀiă hăng čư̆ siăng kah brơi tơring čar Quảng Nam rơbêh 782 klai prăk. Amăng thun 2022 hăng rơwang tal I thun 2023, bruă pok pơhai ngă tui jơlan hơdră anai glăk bưp tơnap tap. Ba truh tơlơi anai lĕ hơdôm anom bruă gơnong glông kaih pơtrun hră pơ-ar črâo ba ngă tui, hơdôm boh ƀon lan sư̆ rơbư̆ amăng pok pơhai hơdôm akŏ bruă. Tui ơi Nguyễn Công Thành, Kơ-iăng khua gơnong bruă pơtô pơjuăt tơring čar Quảng Nam, lu tơlơi pơkă ngă tui hơdôm hơdră djru brơi ƀing čơđai kual čư̆ siăng amăng akŏ bruă pơtô pơhrăm gah jơlan hơdră tui hơnong pơkă dêh čar pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng amăng tơring čar dŏ bưp lu tơnap tap:

“Amăng sa boh sang hră, 1 anih hrăm, lu čơđai sang hră dŏ hrŏm ha boh kơƀang grê mơ̆ sa čô dưi tŭ mă hơdră djru mơng gơnong glông, sa čô lĕ tŭ mă hơdră djru mơng ƀon lan, tơlơi anai ƀu bơkơnar ôh. Ƀing gơmơi rơkâo kiăng pơplih pơkra hiưm pă kiăng bruă tŭ mă hơdră djru brơi bơkơnar”.

Ơi Lê Văn Dũng, kơ-iăng khua git gai Ping gah tơring čar Quảng Nam lăi nao sa, dua tơlơi tơnap tap ƀơi hơdôm plơi pla kual čư̆ siăng lơ̆m pok pơhai hơdôm akŏ bruă, anai lĕ mrô sang anŏ ƀun rin dŏ lu, tơlơi hơdip mơnuih ƀon sang dŏ lu tơnap tap yua anun rơnoh prăk mă yua lơ̆m pok pơhai hơdôm akŏ bruă anai dŏ tơnap. Hrŏm hăng tơlơi thâo thăi mơng ƀing apăn bruă ƀơi kual čư̆ siăng aka ƀu lăp djơ̆ hăng tơlơi rơkâo amăng pok pơhai ngă tui hơdôm akŏ bruă anai. Ơi Lê Văn Dũng rơkâo:

“Kiăng kơ amuñ ƀiă bruă ngă hră pơ-ar lơm pok pơhai ngă tui yua amăng hră pơ-ar hơmâo lu črăn ngă glêh tơnap. Bruă hơget dưi jao brơi gưl tơring čar, tơring glông, mah gưl să, gơnong glông kiăng hơmâo hơdră djru brơi lăp djơ̆”.

Đĭ pơhiăp amăng mông mă bruă, ơi Hầu A Lềnh, Khua ding jum, khua jơnum min djuai ania tŭ yap hơdôm tơlơi rơkâo mơng tơring čar Quảng Nam. Lu tơlơi tơnap tap, gun găn phrâo amăng pok pơhai ngă tui jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng amra hơmâo grup hyu mă bruă pơƀut glăi mơ-it nao kơnuk kơna tañ hloh hơmâo hơdră pơsir. Ơi Hầu A Lềnh rơkâo tơring čar Quảng Nam kiăng gơgrong gum hrŏm kjăp hăng djop ding jum, gơnong bruă lơ̆m ĕp hơdră pơsir tơnap tap, pơplih pơkra hơdră djru.

“Bruă hơget tui tơlơi gơgrong mơng gơnong glông, gơnong glông khŏm ngă, pơsir hĭ mơtăm. Khua dêh čar jao brơi djop Ding jum, gơnong bruă pơplih pơkra. Hơmâo 3 grup bruă kiăng ngă: Grup tal sa lĕ pơsir hĭ tơnap tap, grup tal 2 lĕ pơsir hĭ hơdôm bruă gun găn hăng gruơ tal 3 lĕ pơhrua hơdôm tơlơi aka ƀu hơmâo”./.