Amăng 6 blan akŏ thun anai, djop gưl anom bruă hăng tơring čar hơmâo pơtum pran jua mă bruă, gir run pok pơhai lu hơdră ngă tui Bruă jak iâu. Đơ đam tơring čar hơmâo ĕp ƀuh hăng pơtong brơi 500 per tơlang tơhan djai pơsăn drơi jăn yua kơ lŏn ia ƀơi pơsat dor tơhan djai pơsăn drơi jăn yua kơ lŏn ia aka ƀu thâo anăn mơ̆ng hlâo. Kơnong ƀơi anih treng jơlan Trường Chinh, phường Đak Kâm hăng Kon Tum, lu tơhan kơnuk kơna hơmâo nao sem lăng, ƀuh hăng brơi rŭ kuai đĭ 3 per tơlang tơhan djai pơsăn drơi jăn yua kơ lŏn ia. Tơring čar Quảng Ngãi ăt brơi hyu sem hăng rŭ kuai ƀơi lu anih dŏ đing hơmâo pơsat sô, kiăng tañ pơtong rơđah anăn ƀing tơhan djai pơsăn drơi jăn yua kơ lŏn ia dŏ glăi, aka ƀu thâo anăn. Quảng Ngãi gir run ngă giong tơhnal pơkă amăng bruă mă čơđeh asar bơwih brơi bruă pơčrang AND khom giong amăng blan 10/2026.

Tơring čar Dak Lăk kiăng ngă giong bruă ba pơčrang ADN hăng djŏp per tơlang tơhan djai pơsăn drơi aka ƀu thâo krăn pô hlâo kơ kơnôl 31/10 pơ anăp. Tơring čar hơmâo 34 boh pơsat tơhan hăng 15.222 akŏ pơsat, amăng anun 4.124 akŏ pơsat aka ƀu thâo krăn pô hlơi ôh, laih anun 1.784 akŏ pơsat thâo ha mơkra tơlơi pơhing đôč. Truh ră anai, anom apăn bruă hơmâo pơphun bruă mă čơđeh tơlang ƀơi 5 boh pơsat tơhan, pơhrui hơmâo 105 čơđeh pioh či pơčrang ADN. Hăng bruă hyu ĕp, kuai, klơi rŭ tơlang tơhan, bơyan phang rơgao, Grup K51 Anom bruă khua git gai tơhan tơring čar Dak Lăk hơmâo duñ pơƀut 27 per tơlang tơhan djai pơsăn drơi ƀơi dêh čar Kur. Tơdơi kơ glăi pơ dêh čar, anom bruă hyu sem lăng tong ten 12 tơlơi hmư̆ hing hăng klơi rŭ thim 4 per tơlang tơhan dong ƀơi să Krông Bông hăng Tây Sơn.