3 gru sang hơmâo Kơnuk kơna kĭ hră man pơdong brơi mơnuih ƀôn sang pơ kual ia dăo leng kơ ngă tui tơlơi pơkă “3 khăng”: atur khăng - pơnăng khăng - pơbung khăng, dưi bong glăi angin rơbŭ kơtang hăng ia dăo kơtang. Hơdră yom phun lĕ man atur glông hloh, ƀudah man hơmâo gưl hăng ngŏ ƀudah sang 2 gưl kiăng hơmâo anih rơnuk rơnua, glông hloh kơ anih ia lip.

Amăng mrô anai, hơmâo 2 boh sang 2 gưl: gah yŭ pioh lui soh ƀudah ngă kjăp hŭi ia dăo nao amăng sang; hăng ngŏ lĕ ngă anih dŏ, anih pioh gơnam. Bơ sang 1 gưl, hơmâo thim gưl (gak) hăng ngŏ; prăk aset ƀiă, samơ̆ ăt dưi bong hơjan kơthel mơn.

Ơi Cao Đình Huy, Khua gơnong bruă man pơdong Dak Lăk brơi thâo, gru pơkra sang ƀu kơnong pơmin kiăng kjăp đôč ôh, ăt kiăng rơnuk rơnua lơ̆m hơmâo ia dăo kơtang hloh kơ mơ̆ng hlâo:“Man atur glông, gơmơi jŭ yap glông hloh kơ ia dăo kơtang 0,2-0,5m tui hăng Tơlơi pơsit 48 mơ̆ng Khua dêh čar. Rim gru man pơkra leng kơ pơkă sang prong anet biă ñu lĕ 44 met karê, amăng anun atur pơgang ia dăo lĕ 12 met karê".

Hơdôm gru sang hơmâo pơkra tui boh thâo rơnuk phrâo hăng gru sang đưm mơ̆ng plơi pla kual Dơnung Tong Krah, man pơkra hiam, dŏ dong ƀong huă rơgeh mơn. Sang hơmâo man prong mơ̆ng 36-54 met karê, hơdôm boh sang anŏ ruah mă kiăo tui lŏn dŏ, kiăo tui sang anŏ hơmâo. Ơi Trần Văn Khánh, dŏ pơ plơi phú Hữu, să Hòa Thịnh, tơring čar Dak Lăk, sang ñu tơglưh abih amăng tal hơjan ia dăo phrâo rơgao. Hơmâo ling tơhan Quân khu 5 djru man pơdong glăi, ñu ruah Gru sa, gưl hăng ngŏ ngă anih dŏ bĕ hơjan kơthel. Ơi Khánh lăi:“Mơ̆ng tal hơjan ia dăo kơtang anai, kâo kơđiăng lui yơh, ruah pơkra sang sa mê kiăng dưi bong hơjan kơthel, ia dăo. Hlâo adih lơ̆m hơmâo hơjan kơthel ƀu thâo nao amat pơpă ôh, pơ hơne hơmâo ling tơhan djru pơkra sang phrâo, kâo hơđong pran jua biă yơh”.

Thiếu tướng Trần Thanh Hải, Kơ-iăng khua tơhan Quân khu 5, brơi thâo, anom bruă hơmâo Kơnuk kơna hăng Ding jum ling tơhan jao bruă ngă hrŏm hăng ling tơhan, hơdôm gong gai 3 boh tơring čar Dak Lăk - Gia Lai - Khánh Hòa man pơdong rơbêh 400 boh sang kơ mơnuih ƀôn sang pơ kual ia dăo:“Anai jing bruă blah ngă amăng rơnuk lŏn ia rơngai. Ling tơhan gơmơi ba nao rơdêh, măi mok, man pơdong tui boh thâo phrâo, man tañ, rơnuk rơnua kjăp phik mơtăm yơh. Rim boh sang lĕ anih ană plơi kơnang đah mơ̆ng hơđong tơlơi hơdip”.

Ƀơi Dak Lăk, tơring čar bưp tơlơi truh ia dăo kơtang hloh, hăng giăm 700 boh sang tơglưh, 1.400 boh sang răm kơtang hăng rơbêh 106.000 boh sang ia dăo. Ơi Tạ Anh Tuấn, Khua Jơnum min mơnuih ƀôn sang tơring čar Dak Lăk brơi thâo, tơring čar iâu pơthưr lu anih gum djru, gir man sang giong hlâo lơ 31/1/2026, pơkra sang răm rai hlâo kơ 31/12/2025:“Ƀing gơmơi amra iâu pơthưr tơlơi gum djru mơ̆ng Kơnuk kơna, gong gai ƀôn lan, mơ̆ng ƀing čơmah juăt djru mơnuih tơnap hăng mơ̆ng ană plơi hai či man pơdong sang. Rơngiao kơ man sang brơi ană plơi, gơmơi ăt  man mơn năng ai 300 boh sang jơnum plơi pioh brơi ană plơi nao kơđap hơjan kơthel”.

Hlâo kơ anun, Khua dêh čar ơi Phạm Minh Chính sit ñu mơtăm trun nao pơ kual ia dăo Ngŏ tơring čar Dak Lăk, ngă bruă hăng khua mua hơdôm boh tơring čar Dap Kơdư - Dơnung Tong Krah laih anun kiăng ngă bruă “Quang Trung hơdeč hmar” či man pơdong sang kơ hơdôm boh sang rơngiă pưk sang đang hmua, pơhlom brơi ană plơi hơmâo anih dŏ hlâo kơ hrơi Tê̆t Bính Ngọ 2026.

Khua dêh čar kiăng man pơdong sang pơ kual ia dăo kiăo tui tơlơi pơkă “3 khăng”, laih dong pơkra pơhlom prong huĭ kơ hơmâo tơlơi truh hơjan kơthel kơtang hloh. Ding jum man pơdong gơgrong pơkra gru sang, mă yua không bê tông ƀudah không pơsơi či pơkra tuh rơyuh ha wơ̆t mơtăm kiăng tañ giong. Kiăng man tañ, djru mơnuih ƀôn sang hơmâo sang dŏ hlâo kơ Tê̆t, Khua dêh čar ăt kiăng Ding jum bruă hmua hăng ayuh hyiăng pơtô brơi hơdôm boh tơring sem lăng djru brơi bruă lŏn tơnah hăng hơdôm boh sang anŏ ƀu hơmâo anih dŏ. Hơdôm Ding jum ling tơhan, Kông an, khul hlăk ai hăng abih bang anom bruă čar khŏm gum ngă bruă.

Laih dong, Khua dêh čar kiăng iâu pơthưr lu khul grup, mơnuih mơnam kơ bruă man phrâo, pơkra glăi sang đah mơ̆ng tañ giong hloh:“Iâu pơthưr abih bang tơlơi hơmâo amăng plơi pla, Kơnuk kơna, ƀing čơmah juăt djru mơnuih tơnap hăng mơ̆ng sit sang anŏ pô kiăng djru mơtăm. Hlơi hơmâo hơget ta djru anun, hơmâo pran djru pran, hơmâo gơnam djru gơnam, hơmâo aset djru aset, hơmâo lu djru lu, dŏ pơpă djru pơ anun, anun jing pran gum pơgôp djuai ania amăng bruă iâu pơthưr lĕ khŏm pơtrut tui”.

Mơ̆ng hơdôm gru kač rup sang hăng tơlơi git gai khut khăt, truh ră anai atur sang hơmâo man laih. Rơbêh 1.500 boh sang, prăk man pơdong năng ai 255 klai, amra hơmâo man pơ Dak Lăk, Khánh Hòa, Gia Lai...jing anih kơnang kjăp kiăng mơnuih ƀôn sang Dơnung Tong Krah dưi găn rơgao tơlơi truh lŏn adai ngă, hơmâo anih dŏ hơđong, đĭ kyar hloh pơ anăp anai./.