Ƀu kơnong pơđĭ kyar kơ mrô đôč ôh, boh tŭ yua klă mơnuih ping gah thâo hluh tong tendjop bruă amăng kual mơnuih ƀôn sang djuai ƀiă jai hrơi lu, kiăng ngă tui tŭ yua bruă mă pơtrut bơwih ƀong huă mơnuih mơnam.

Phường Vĩnh Phước lĕ sa amăng hơdôm phường ter hang ia rơsĭ plơi prong Vĩnh Châu. Lu thun rơgao, anom bruă ping gah phường đing nao biă mă pơđĭ mrô mơnuih ping gah, amăng anun pơmut mơnuih ping gah lĕ mơnuih djuai ƀiă.

Kơ-iăng khua git gai ping gah Phường Vĩnh Phước, ơi Nguyễn Thanh Tùng brơi thâo, rĭm thun tui hăng atur mă bruă, akŏ bruă hăng rơnoh jao ăt kah hăng tui hră pơtrun git gai mơ̆ng anom bruă ping gah plơi prong kơ bruă pơđĭ kyar mơnuih ping gah, ping gah phường pơtum nao pok pơhai lu hơdră pioh pơtrut tui mrô mơnuih ping gah, boh tŭ yua mơnuih ping gah; amăng anun, čih pơkra hră pơtrun git gai jao tơhnal pơkă bruă mă kiăng pơmut mơnuih ping gah djơ̆ rơnoh pơkă mơ̆ng akŏ thun; laih dơ̆ng ngă klă bruă pơđĭ kyar mơnuih ping gah:

"Ƀing gơmơi đing nao hlâo lĕ, ƀing tơdăm dra mut phung, mơnuih amăng khul grup hăng mơnuih ƀôn sang hur har, biă mă ñu mơnuih djuai ƀiă amăng phường. Boh tơhnal jŭ yap glăi pơhrua nao dơ̆ng. Thun 2022 hơmâo 27 čô mơnuih ƀôn sang hur har, brơi nao hrăm ping gah lĕ 21 čô. Boh tơhnal gơmơi hơmâo pơmut 17 čô, pơkă hăng mrô jao 16 čô đôč, dưi ngă djop 106%, amăng anun, mơnuih ping gah djuai ania ƀiă 9 čô, dưm dưm hăng 52%".

Hơdôm anih hrăm kơ ping gah pơhrăm ƀing hlăk ai ƀơi Phường Vĩnh Phước lêng kơ dưi pơhrăm tong ten, thâo hluh bruă mă mơ̆ng kual plơi pla. Mơ̆ng anun bruă mă mơnuih tơpuôl, khul grup hlăk ai mut phung, lu mơnuih hur har lăi pơthâo kiăng dưi mut ping gah. Amai Ngô Thảo Trang lĕ Khua git gai tơdăm dra mut phung ƀut Xẻo Me, phường Vĩnh Phước, plơi prong Vĩnh Châu. Amai Trang lĕ đah kơmơi ngă khua hlăk ai hur har biă mă, jĕ giăm hăng anai plơi pla, hơduah lu jơlan hơdră pơtum ƀing tơdăm dra mut phung, hlăk ai ngă hrom pơtô brơi ngă bruă. Ñu đing nao kơ bruă jơnum hiư̆m pă tŭ yua, pơtô lăi brơi thâo hluh jơlan hơdră kơnuk kơna pơtrun, pơđing hmư̆ tơlơi kiăng mơ̆ng ƀing hlăk ai, tơdăm dra glăk pơmin. Mơ̆ng anun ñu hrom hăng khua mua amăng plơi pla pơphun lu mông jơnum hăng pok pơhai bruă mă tŭ yua, djru ană plơi pla, kah hăng hlăk ai pơyơr pran jua, pơyơr drah hăng tơlơi khăp pap, ngă bruă hơdor tơngia hăng hlăk ai kơsung nao pơ anăp bơwih ƀong huă....Rơgao 2 thun  hrăm drơi jăn, gir run, amai Trang dưi čih anăn pơmut ping gah. Amai Ngô Thảo Trang hok mơak lăi:

“Ră anai kâo hrăm giong laih anih hơduah ĕp kiăng thâo kơ ping gah, thun blan pơ anăp kâo ƀu pơdơi ôh pơđĭ tui tơlơi thâo hluh, hrăm tui bruă mă kơđi čar kiăng pơhrăm drơi jăn kâo pô thâo hruaih bruă mă hăng ngă giong bruă jao pioh dưi mut ping gah”.

Jing tơring čar hơmâo lu mơnuih djuai ƀiă, Sóc Trăng, anun lĕ djuai ania Khmer truh 52% mơkrah mrô mơnuih amăng tơring čar, djuai ania Hoa lĕ 17% amăng plơi prong, hơdôm thun rơgao, ping gah plơi prong Vĩnh Châu đing nao biă mă pơđĭ mrô mơnuih ping gah amăng plơi pla jing mơnuih djuai ƀiă hăng lăng anai sa bruă mă khom ngă na nao, yôm hloh, kual mơnuih ƀôn sang djuai ƀiă yơh jing anih khom đing nao phun. Ping gah plơi prong Vĩnh Châu ră anai hơmâo 42 boh anom bruă, khul ping gah amăng anun 10 anom bruă ping gah să, phường, 5 boh anom bruă ping gah amăng sang bruă kơnuk kơna hăng 27 khul ping gah plơi; abih bang 207 khul ping gah kiăo tui.

Tui hăng anun, phường hơmâo rơbêh 4.200 čô mơnuih ping gah, amăng anun rơbêh 1.700 čô mơnuih ping gah lĕ djuai ania ƀiă. Tui hăng Kơ-iăng Khua git gai ping gah plơi prong Vĩnh Châu, Phan Thị Xinh Hưởng, mơnuih ping gah djuai ƀiă lĕ, ling tơhan, mơnuih mă bruă djru hrom pơtrut pơđĭ kyar plơi prong, gơñu jing mơnuih ping gah ba gru hlâo, mơnuih mă bruă har har hloh pơtrut djop bruă mă khul amăng phường, biă mă ñu man pơdong plơi pla phrâo. Kơ-iăng khua git gai ping gah plơi prong Vĩnh Châu, Phan Thị Xinh Hưởng lăi:

“Pơ anăp anai, khua mua git gai ping gah plơi prong Vĩnh Châu ăt pơtong lăi, amra pơhrăm mơnuih hur har mut ping gah amăng kual djuai ƀiă jing sa bruă mă phun hăng git gai khom ngă na nao. Thun 2023 Khua mua git gai ping gah plơi prong Vĩnh Châu hơmâo pok pơhai hơdôm bruă mă pơtrut pơđĭ kyar mơnuih ping gah amăng kual djuai ƀiă”.

Hăng hơdră mă bruă thâo pơčeh phrâo, pơđĭ tui mrô ping gah lĕ mơnuih djuai ƀiă ƀơi plơi prong Vĩnh Châu hơmâo ba glăi boh tơhnal tŭ yua klă. Tơlơi anun ƀuh rơđah, glông bruă kơđi čar, djop anom bruă ping gah kjăp kơtang biă mă, pơdah thâo tơlơi gơgrong glăm ba mơ̆ng ping gah hăng mơnuih ƀôn sang hur har pơtrut hrom pơđĭ kyar bơwih ƀong huă, pơđĭ tui gru grua hiam, mơnuih mơnam bơkơnar, djru pơgang lŏn ia rơnuk rơnua ƀơi kual plơi pla.