Amăng anun, Dak Lak lĕ sa amăng 22 boh tơring čar dưi hơmâo Anom bruă phun mơnuih tơpuôl Việt Nam ruah pioh ngă tui Hơdră anăn “Chợ Tết Công đoàn thun 2023”.

Bơ ƀơi ƀôn prong Hồ Chí Minh lĕ amra đing nao kơ 30 rơbâo čô ding kơna mơnuih tơpuôl kơnang kơ bruă ngă : “Hrơi jơnum ƀing kông ñơn”, “Pơphun sang čơ khăp pap”, “Tết jơngum mơak”.

Ƀơi tơring čar Dak Lak, mơ̆ng lơ 6-8/1, Anom bruă phun wai lăng mơnuih tơpuôl Việt Nam ngă hrom anom bruă mơnuih tơpuôl tơring čar Dak Lak pơphun hơdră anăn “Čơ Têt kơ mơnuih tơpuôl thun 2023”. Anai lĕ bruă mă sit nik djru hrom đing nao kơ tơlơi hơdip mơda mơnuih ƀôn sang, mơnuih mă bruă apah ƀong prăk blan jing ƀing kông ñơn mut phung sang anŏ tơnap tap, kiăng huăi hơmâo pô lui hĭ pơ klôn sit truh bơyan ngă yang thun phrâo. Djă ƀơi tơngan pơrơdung gơnam phrâo nao blơi ƀơi anih pơdă sang čơ pioh kơ ƀing kông ñơn thun 2023 ayong Hữu Lâm Sơn, kông ñơn mă bruă ƀơi kông ty Pơsơi ASEAN, anih tuh tia pơkra ming Hòa Phú brơi thâo:

“Kâo arăng ƀơk dua pok hră blơi gơnam rơnoh 150 rơbâo prăk, kâo nao blơi sa ƀuăt tơpung kơñĭ anai, gơnam djru soh sel lĕ hơmâo sa boh gŏ hơtŭk ia hăng apui lơtrik, sa gêh čai ia rơmă hăng sa blah ao”.

Tal blung a nao blơi gơnam pơ sang čơ djru mơnuih tơpuôl lăi, chợ công đoàn, amai Nguyễn Thị Phượng, kông ñơn kông ty pơgang ayuh hyiăng plơi prong amăng tơring čar Dak Lak lăi lĕ, bruă mă anai djru kơ ƀing ding kơna mơnuih tơpuôl hăng mơnuih mă bruă apah hơmâo anŏ gêh găl blơi prăp gơnam yua ngă yang thun phrâo hăng rơnoh rơgêh ƀiă:

“Thun anai lĕ thun tal blung a kâo rai tŭ mă gơnam anai, kâo ƀuh mơak biă mă hăng hor mơ̆n. Hơdôm mơta gơnam anai djru kơ sang anŏ gơmơi hơmâo dơ̆ng Têt mơak čơkă thun phrâo”.

Čơ têt mơnuih tơpuôl thun 2023 tơring čar Dak Lak pơphun mơ̆ng lơ 6-8/1/2023, hơmâo abih bang 40 čơgăn gơnam, sĭ mơdrô lu mơta gơnam tam, bơwih brơi kơ mơnuih blơi yua hăng rơnoh rơgêh đôč, djru kơ rơbêh 3000 čô mơnuih mă bruă. Hrom hăng anun, Anom bruă mơnuih tơpuôl tơring čar Dak Lak ăt hơmâo ƀơk 400 anung gơnam kơ mơnuih mă bruă apah. Laih dơ̆ng, pơphun lu tơlơi ngui ngor gru grua hiam, mơak, adoh suang, pơphun tơlơi ngui ngor, djru pơtô tơlơi phiăn, pơkă lăng drơi jăn pơjrao duam ruă hăng ƀơk ia jrao soh đôč kơ mơnuih mut phung, mơnuih mă bruă apah. Ơi Nguyễn Công Bảo, Khua anom bruă mơnuih tơpuôl tơring čar Dak Lak brơi thâo:

“Sang čơ djru mơnuih tơpuôl sit biă ñu hơdră djru ba kơ mơnuih mă bruă apah. Anai lĕ tal blung a Anom bruă mơnuih tơpuôl tơring čar pơphun têt pioh kơ mơnuih mut phung, blung hlâo ăt pơmin mơ̆n, samơ̆ hơmâo tơlơi djru mơ̆ng anom bruă mơnuih tơpuôl dêh čar, tơlơi đing nao mơ̆ng khua mua tơring čar ngă hrom djop anom bruă kơnuk kơna biă mă ñu tơlơi djru mơ̆ng ƀing amă bruă amăng anom bruă mơnuih tơpuôl djop gưl gơmơi hơmâo pok pơhai hmao kru, jak iâu giăm 40 boh anom bruă ngă hrom”.

Tơring čar Dak Lak sa amăng 22 boh tơring čar dưi hơmâo anom bruă mơnuih tơpuôl Việt Nam ruah djru hơdră “Têt djru kơ mơnuih tơpuôl 2023”. Tui hăng yă Trần Thị Thanh Hà, ding kơna khul git gai, khua anom jĕ giăm amăng mơnuih mă bruă, gah anom bruă phun mơnuih tơpuôl Việt Nam lăi, anai lĕ bruă mă tŭ yua pioh pơphun brơi kơ mơnuih mung phung mă bruă apah sang anŏ dŏ tơnap tap, pioh čơkă thun phrâo djuai ania ta, ƀong têt mơak mơai trơi pơđao.

“Djop anih pơdă gơnam djru mơnuih tơpuôl thun anai pơphun mơ̆ng 30-120 čơgăn gơnam sĭ mơdrô ƀơi djop tơring čar, amăng anun hơmâo gơnam brơi soh đôč ƀu sĭ ôh jing yero prăk, biă mă ñu anom bruă phun mơnuih tơpuôl Việt Nam hơmâo mơ̆ng 2500 truh 3000 vocher brơi sa anih pơdă sang čơ hăng rĭm kơ vocher lĕ 300 rơbâo prăk pioh kơ mơnuih mă bruă dưi djă ba nao blơi gơnam ƀơi anih pơdă sang čơ djru laih anun ƀing gơmơi ăt pơtum lu mơnuih anih ba pơdă gơnam sĭ mơdrô mơ̆ng dêh čar hăng tơring čar pơdă gơnam hiam klă tŭ yua pơtrun rơnoh mơ̆ng 10% truh kơ 50 ƀudah 70% kiăng mơnuih mă bruă apah tơnap tap dưi blơi gơnam yua čơkă thun phrâo têt trơi pơđao”.

Ƀơi anih pơkra ming Linh Trung 1, ƀôn prong HCM, anom bruă mơnuih tơpuôl djop anih pơkra ming hơmâo pơphun hơdră “Hrơi mơak khăp pap-têt kơ mơnuih mut phung” thun 2023, kiăng djru ba hơdôm hơpluh rơbâo čô mơnuih ngă kông ñơn tơnap tap. Hrơi mơak anai, pơphun lu bruă mă dik dăk, tŭ yua. Ƀing kông ñơn dưi tŭ mă hră blơi gơnam huăi rơngiă prăk, ba pơblih mă hăng gơnam ta kiăng blơi, pioh ba glăi yua amăng sang anŏ ƀong têt.

Rơngiao kơ anun, hơdră ăt ƀơk wĕ đĭ rơdêh por, đĭ rơdêh treng, wĕ đĭ rơdêh pơgiăng tuai djru kơ ƀing kông ñơn glăi čơkă thun phrâo pơ plơi pla. Kông ñơn, Nguyễn Thị Thiết dŏ mă bruă pơ kông ty Freetrend, plơi pla pơ tơring čar Quảng Trị, arăng djru ñu prăk blơi wĕ đĭ rơdêh treng glăi ƀong têt hăng sang anŏ ñu hok mơak lăi:

“Anai lĕ tal blung a kâo tŭ mă wĕ djru tơlơi khăp pap glăi ƀong têt pơ sang anŏ plơi pla, tơdơi kơ 3 thun mă bruă. Hăng wĕ anai, tơdah kâo blơi pơ rơngiao ă 2 klăk prăk, ră anai arăng djru soh wĕ anai plai ƀiă rơngiă prăk. Ƀu hơjăn kâo ôh, sang anŏ gơmơi abih 4 čô hơmâo soh dưi glăi bong têt hăng sang anŏ pơ plơi pla”.

Tui hăng anom bruă mơnuih tơpuôl amăng anih tuh tia pơkra ming ƀôn prong Hồ Chí Minh amra djru brơi 30 rơbâo čô mơnuih ngă kông ñơn kơnang kơ hrơi mơak anai, tơlơi khăp djru nao rai kah hăng: Hrơi mơak ƀing kông ñơn nao sang čơ djru ba, têt jơngum mơak, jơnum bưp ƀô̆ mơta ƀing kông ñơn, ƀơk wĕ rơdêh por, rơdêh treng, rơđeh pơgiăng tuai, čơkăp ƀŭ, pơhrôp drơi jăn djru brơi soh, ngui ngor adoh suang, adoh karaoke...., hăng rơnoh prăk truh kơ 20 klai prăk.