Rơbêh 70 thun laih, samơ̆ tha plơi Ama An, ƀuôn Trí A, să Krông Na, tơring glông Ƀuôn Đôn, tơring čar Dak Lak ăt dŏ beč bal găng añrăng đôč, lăng kơ ñu klĭ kliăng hơtăm samơ̆ kjăp khăng biă mă kah hăng phun kyâo tơnia mơtam, dong djơr kjăp tong krah angin rơbŭ kual Dap Kơdư. Thun 2002, kual Dap Kơdư jing anih rung răng kơđi čar yua ƀing pơblư̆ lŏn ia hơduah ĕp mơneč ngă rung răng, ơi Ama An yơh anih arăng đăo kơnang amăng pran jua mơnuih ƀôn sang lơ̆m plơi. Rơgao hơdôm thun blan, ñu nao tơl sang phiang tơl adring, sơ̆n pran jua hyu pơtô pơblang, jak iâu mơnuih ƀôn sang kiăng thâo tong ten bruă ngă hăng ƀô̆ mơta soh sat mơ̆ng ƀing pơblư̆ kơnuk kơna, kiăng ană plơi pla răng kơđiăng, anăm hmư̆ tui tơlơi plư, pơčut pơčao mơ̆ng ƀing soh sat.

“Ta dŏ pơ anai, anăm hyu hmư̆, ta khom thâo tong ten tơlơi git gai mơ̆ng ping gah, jơlan hơdră mơ̆ng kơnuk kơna, khom thâo gum pơgôp, lir hơbit sit nik jơlan hơdră mơ̆ng ping gah pioh ngă hiư̆m pă hơđong brơi kơ plơi pla dêh čar ta”.

Lơ̆m hơmâo tơlơi rung răng abih, plơi pla rơnuk rơnua glăi, tha plơi, mơnuih arăng đăo kơnang yơh tơhnal pơhmu amăng bruă ngă tui djơ̆ jơlan hơdră, tơlơi phiăn ping gah kơnuk kơna ta. 54 thun ngă mơnuih ping gah, ơi Y Thương Kmăn dŏ pơ să Bông Krang, tơring glông Lăk, tơring čar Dak Lak ăt ngă hrŏm na nao amăng mông jơnum plơi, jak iâu ană plơi pla ngă tui djơ̆ jơlan hơdră, tơlơi phiăn kơnuk kơna, hur har gum hrŏm akŏ pơdong khul gum hơbit djop djuai ania.

Ơi Y Thương brơi thâo, mah lŏn ia jai hrơi pơđĭ kyar samơ̆ tơlơi hơdip mơda mơnuih ƀôn sang djuai ƀiă ăt dŏ tơnap tap đôč, anun ƀing ayăt roh mơ̆ng tač rơngiao adih, hneč mă tek nao bruă hyu plư, pơčut pơčao ană plơi kiăng phă pơrai tơlơi hơkrŭ ta. Yua kơ anun hơdôm mơnuih ping gah kah hăng ñu anun tha rơma kjăp pran jua jing anih kơnang kơ mơnuih ƀôn sang đăo hăng hla tui:

“Ping gah hăng kơnuk kơna đing nao biă mă tơlơi hơdip mơda mơnuih ƀôn sang djop djuai ƀiă hăng lu mơta bruă, sa lĕ apui lơtrik djop sang laih hơmâo dăng nao, dua pơkă lăng tơlơi duăm ruă huăi rơngiă prăk ôh. Tơlơi anun yơh lah ping gah, kơnuk kơna djru  kơ mơnuih ƀôn sang djuai ƀiă ta”.

Hăng tơlơi gơgrong ba mơ̆ng pô, lu tha plơi, mơnuih arăng đăo kơnang hyu mă bruă, jak iâu pơtrut mơnuih ƀôn sang bơwih ƀong huă, ngă hrŏm bruă čơkă tuai hyu ngui, dŏ glăi amăng plơi, ĕp lăng găn rơgao gru grua hiam djuai ania. Tui hăng Khua plơi, met Y Ñuel Niê, ƀuôn Akŏ Dhông, plơi prong Ƀuôn Ma Thuôt, tơring čar Dak Lak, bruă ngă anai djru kơ mơnuih ƀôn sang thâo khăp pơpŭ glăi kơ gru ama grua amĭ ta pô mơ̆ng đưm, djru gơñu mă bruă lăi pơthâo kơ ƀing tuai thâo laih anun pơhrui mă prăk mơ̆ng bruă čơkă tuai hyu ngui, bơwih ƀong huă kiăng hơđong kjăp:

“Djă pioh gru ama grua amĭ mơ̆ng đưm dưi pơjing rai bruă mă ĕp prăk kăk  tuh pơ alin kơ ană bă hrăm hră ăt kah hăng pơsir bruă mă kơ ƀing tơdăm dra amăng plơi. Rŭ glăi, djă pioh, lăi pơthâo gru grua djuai ania Êđê ta ƀu kơnong brơi kơ tuai amăng dêh čar ôh, wơ̆t tuai mơ̆ng tač rơngiao. Pơđĭ tui gru grua hiam nao hrŏm hăng bruă tuai čuă ngui kiăng hơmâo prăk pơhrui glăi kơ mơnuih ƀôn sang”.

Kual Dap Kơdư ră anai hơmâo 3.700 čô tha plơi, mơnuih arăng đăo kơnang, gơñu ƀu kơnong jing mơnuih ba gru hlâo djă pioh gru grua hiam djuai ania ôh, jing mơnuih pơtruh brơi mơ̆ng gong gai kơnuk kơna amăng bruă ba jơlan hơdră, tơlơi phiăn pơtô glăi kơ mơnuih ƀôn sang, laih anun djru hrŏm ngă hơđong tơlơi hơdip mơda mơnuih ƀôn sang amăng plơi pla.