Jơnum lok 4, Khua pơ ala mơnuih ƀon sang dêh čar tal 15 (pơđut hĭ tong krah blan 11/2022 laih rơgao), tŏ tui đing nao lu hơdră bruă sit nik pơsir hĭ lăp djơ̆ hơdôm bruă mơ̆ mơnuih ƀon sang đing nao. Sit biă ñu lĕ ba tơiă hơdôm hơdră bruă kiăng hơkrŭ glăi tơlơi bơwih ƀong huă tơdơi kơ abih klin Covid-19. Kiăo tui anun, jơnum tal 17 (rơnuč blan 11/2022), Jơnum min apăn bruă Khua pơ ala mơnuih ƀon sang dêh čar hơmâo tŭ yap pơhrua tuh pơ alin brơi 3 Jơlan hơdră tui hơnong pơkă dêh čar rơwang thun 2021-2025. Anai lĕ bruă mơ̆ mơnuih ƀon sang ƀơi kual Dap kơdư đing nao hăng čang rơmang amăng thun 2023, hơdôm hơdră bruă anai amra pok pơhai ha amăng plĕ, tŭ yua.

Amăng jơnum lok 4, Khua pơ ala mơnuih ƀon sang dêh čar hơmâo pioh lu hrơi mông pơčrông sai tơlơi sit nik hăng boh than ngă tui akŏ bruă pơđĭ kyar bơwih ƀong huă-mơnuih mơnam, ngăn drăp kơnuk kơna. Đĭ pơhiăp pơđut mông jơnum, Khua git gai pơ ala mơnuih ƀon sang dêh čar ơi Vương Đình Huệ hok mơ-ak, lăng yôm hơdôm boh than dưi ngă phun, yôm phăn, djop mơta amăng pơđĭ kyar bơwih ƀong huă, mơnuih mơnam; pơhlôm pơgang ling tơhan, hơđong amăng mơnuih mơnam; bơwih brơi mơnuih djru hơkrŭ. Tui hăng bruă mă mơng jơnum laih rơgao hơdôm anih anom pôr pơhing, ơi K’Tân (djuai ania K’ho) dŏ ƀơi să Dă Đờn, tơring glông Lâm Hà, tơring čar Lâm Đồng brơi thâo:

“Phrâo anai neh met wa tơring glông Lâm Hà kiăo tui lăng jơnum lok 4, Khua pơ ala mơnuih ƀon sang dêh čar. Lu tơlơi čang rơmang mơng neh met wa hơmâo Khua pơ ala mơnuih ƀon sang dêh čar pơčrông sai, đing nao. Mơng anun amra djru brơi mơnuih djuai ania ƀiă pơđĭ kyar bơwih ƀong huă, hơdră bruă kơ prăk apah brơi mơnuih apăn bruă djuai ania ƀiă klă hloh. Khua pơ ala mơnuih ƀon sang dêh čar jơnum tal anai pơčrông sai lu boh tơhnal djơ̆ hăng tơlơi kiăng mơnuih ƀon sang, ngă kơ neh met wa hok mơ-ak biă mă hăng čang rơmang ngă hiưm pă đing nao djru brơi mơnuih djuai ania ƀiă hơmâo lu dong anih pơtô hrăm kơ boh thâo pla kơphê, tiu, boh ñông, macca, rông un, kơbao, rơmô…

Pơđut hĭ jơnum rơnuč thun 2022, Khua pơ ala mơnuih ƀon sang dêh čar rơkâo Jơnum apăn bruă Khua pơ ala mơnuih ƀon sang dêh čar, Kơnuk kơna, Khua dêh čar, Khul djuai ania, jơnum min mơng Khua pơ ala mơnuih ƀon sang dêh čar, djop gưl, gơnong bruă ječ ameč pơphun pok pơhai ngă tui hơdôm tơlơi pơtrun hơmâo Khua pơ ala mơnuih ƀon sang dêh čar tŭ yap. Ƀing khua mua tañ bưp mơnuih ƀon sang kiăng lăi pơthâo boh tơhnal mơngm lok jơnum anai, pơlir hơbit kjăp, đing tơngia hmư̆, lăi nao tơpă sit hơdôm boh than dưi ngă tui hơdră djru mơnuih mơnam, bơwih brơi tơlơi hơdip mơda kơ mơnuih ƀon sang; prap lui klă hloh hơdôm tơlơi gal djru brơi mơnuih ƀon sang čơkă thun phrâo 2023 hăng Tết tui phiăn juăt Quý Mão. Amăng mông bưp mơnuih ƀon sang tơdơi kơ jơnum lok 4, Khua pơ ala mơnuih ƀon sang dêh čar tal 15, ơi Pang Ting Brăng (djuai ania K’ho) dŏ ƀơi ƀut plơi 1, tơring kual Lạc Dương, tơring glông Lạc Dương, tơring čar Lâm Đồng brơi thâo, hơdôm lok jơnum mơng Khua pơ ala mơnuih ƀon sang dêh čar pơčrông sai kơ hơdôm hơdră bruă, yua anun neh met wa hơmâo tŭ mă djop mơta. Mơng hơdôm hrơi bưp mơnuih ƀon sang, neh met wa lăi pơthâo, hơmâo ƀing khua mua ba nao pơčrông sai. Hơdôm hơdră bruă glăk mă yua amăng tơlơi hơdip mơda. Ơi Pang Ting Brăng brơi thâo:

“Ră anai Kơnuk kơna lêng kơ hrŏm hăng mơnuih ngă hmua, lêng kơ hơmâo hơdră djru brơi neh me wa. Sit biă ñu ƀơi hơdôm ƀon lan glăk pok lu anih pơtô hrăm tui boh thâo, kiăng mơnuih ƀon sang thâo bruă mă yua boh thâo phrâo amăng bruă pla pơjing, rông hlô mơnong. Samơ̆ mơnuih ƀon sang gir run amăng bruă pơtô hrăm hăng mă yua hơdôm boh thâo amăng bruă bơwih ƀong, tơlơi anai amra ngă ƀing ta găn rơgao hăng pơhrui amra đĭ tui dong. Jai hrơi jai klă tui dong, gơnam tam jai hrơi jai hiam hơdjă ba nao sĭ mơdrô amuñ ƀiă”.

Kiăo tui anun Jơnum lok 4, Khua pơ ala mơnuih ƀon sang dêh čar XV, rơnuč blan 11/2022 laih rơgao, Jơnum min apăn bruă Khua pơ ala mơnuih ƀon sang dêh čar  pơphun jơnum lok 17, tŭ yap tui kah rơnoh prăk tuh pơ alin pơđĭ kyar ngăn drăp gơnong glông rơwang thun 2021-2025 brơi 3 jơlan hơdră tui hơnong pơkă dêh čar. Amăng anun, Jơlan hơdră tui hơnong pơkă dêh čar amăng pơđĭ kyar bơwih ƀong huă -mơnuih mơnam kual mơnuih djuai ania ƀiă hăng kual čư̆ siăng lĕ giăm 2.500 klai prăk; Jơlan tui hơnong pơkă dêh čar pơhrŏ trun ƀun rin hơđong kjăp lĕ 2.000 klai prăk; Jơlan hơdră tui hơnong pơkă dêh čar man pơdong plơi pla phrâo lĕ 3.000 klai prăk. Anai lĕ hơdră bruă hơmâo lu mơnuih ƀon sang amăng kual Dap kơdư đing nao biă mă. Ơi K’Khét Atô - Kơ-iăng khua anom bruă djuai ania tơring čar Dak Nông pơsit tong:

“Kơ jơlan hơdră tui hơnong pơkă dêh čar tal 3 anai lĕ sa jơlan hơdră prong biă mă. Ră anai ƀơi Dak Nông glăk ngă tui lăp djơ̆ tơlơi črâo trun mơng Khua pơ ala mơnuih ƀon sang dêh čar  hăng Kơnuk kơna ba tơbiă, ƀing gơmơi ăt khut khăt biă mă mơn. Anai lĕ jơlan hơdră hơmâo mơnuih ƀon sang dŏ tơguăn, yua anai lĕ hơdră bruă djơ̆ hăng tơlơi črâo trun mơng Ping gah, tơlơi kiăng mơnuih ƀon sang. Ră anai hơmâo 10 akŏ bruă hơmâo Khua dêh čar tŭ yap. Pơhmutu gơnong bruă gru grua bơrơguăt drơi jăn hăng tuai čuă ngui hơmâo sa jơlan hơdră pơtô brơi mơnuih ƀon sang amăng hơdôm plơi pla pơđĭ kyar bơwih ƀong huă djă pioh gru grua djuai ania pô”.

Kiăng ngă tui 3 jơlan hơdră anai, tơring čar Dak Nông him lăng kah pha rơbêh 1.000 klai prăk pok pơhai hơdôm boh tơhnal; man pơdong plơi pla phrâo; pơđĭ kyar bơwih ƀong huă-mơnuih mơnam kual mơnuih djuai ania ƀiă hăng kual čư̆ siăng laih dong pơhrŏ trun ƀun rin hơđong kjăp.

Hăng hơdôm hơdră bruă lăp djơ̆ mơng Khua pơ ala mơnuih ƀon sang dêh čar, Kơnuk kơna, hơdôm boh tơring čar ƀơi kual Dap kơdư čang rơmang thun 2023 hăng hơdôm thun tŏ tui pơ anăp amra pơđĭ kyar kơtang hloh, kiăng kual Dap kơdư hrưn đĭ hrŏm hăng đơ đam dêh čar.