Truh ră anai, tơdơi kơ ling tơhan hăng hơdôm anom bruă bơdjơ̆ pơphun hyu ĕp hrŏm hăng tơlơi gir run pơtô pơblang, hyu tir wai pơgang mơng gong gai ƀon lan, tơlơi hơdip jai pơhlôm hơđong ƀơi tơring glông Čư̆ Kuin, tơring čar Dak Lak.

Pơwŏt glăi pơ Ea Ktur 3 hrơi tơdơi kơ bruă rung răng, mơnuih ƀon sang amăng să pơwŏt glăi tui hơđăp laih. Kơtuai tui jơlan glông pơkuh nao rai să hăng hơdôm boh plơi pla, tơlơi hơdip jai hơđong tui yơh. Hơdôm anih sĭ mơdrô gơnam ƀong huă, bruă pơdŭ pơgiăng gơnam pơwŏt glăi mơng. Kiăng pơhlôm rơnuk rơnua brơi mơnuih ƀon sang, tơring čar Dak Lak hơmâo pơpha tơhan wai lăng tơhrơi kah hăng mlăm. Tơlơi anai ngă mơnuih ƀon sang hơđong amăng pran jua.

Hluai tui ayuh hyiăng gêh gal, ơi Ngô Văn Hồng (ƀơi ƀut plơi 22, să Ea Ning, tơring glông Čư̆ Kuin) pơwŏt glăi čoh klơi lŏn kiăng kơ pla phun kơphê. Bruă anai, sang anŏ pơmĭn ngă amăng hơdôm hrơi hlâo anun samơ̆ pơdơi hĭ yua đang hmua sang anŏ ñu lĕ amăng să Ea Ktur. Bruă lu mơnuih djă ba phao kơtuang kơsung blah gơñăm nao Jơnum min mơnuih ƀon sang dua boh să Ea Tiêu hăng Ea Ktur, sang anŏ ñu pơdơi hĭ bruă pơ đang hmua yua kơ hŭi đơi. Samơ̆, lơ̆m ƀuh tơlơi gir run mơng anom bruă bơdjơ̆ nao, hrŏm hăng bruă hyu pơtô pơblang, pơ alum pran jua mơnuih ƀon sang mơng gong gai ƀon lan, ñu ăt hơđong pơwŏt glăi ngă đang hmua.

Ơi Ngô Văn Hồng brơi thâo: “Tơdơi kơ bruă ngă rung răng djai mơnuih amăng mơmŏt lơ 11/6, mơnuih ƀon sang bral rơngal biă mă. Samơ̆ truh ră anai ƀuh anom bruă bơdjơ̆ nao hyu ĕp mă pơkŏng, gong gai ƀon lan hyu pơtô pơblang, lăi pơthâo tơlơi sit nik amăng loa, yua anun ñu pô kah hăng mơnuih ƀon sang amăng plơi pla ăt hơđong pran jua mơn. Hăng tơlơi sit nik ră anai, ƀing gơmơi amra tañ hơđong amăng pran jua pơwŏt glăi tơlơi hơdip tui hơđăp”.

Ăt pok glăi sang sĭ mơdrô gơnam đang hmua, uă pơdai brơi mơnuih ƀon sang tơdơi kơ 2 hrơi krư̆ amăng kiăng pơhlôm rơnuk rơnua, amai Nguyễn Thị Anh, să Ea Ktur ăt dŏ hŭi mơn. Sang ñu kơtuai tui jơlan prong, ataih mơng anom bruă să Ea Ktur giăm 1 km đôč. Amăng mơguah lơ 11/6, lơm hmư̆ hing kơ bruă rung răng, sang anŏ ñu bơngŏt biă mă yua anun krư̆ bah amăng hlao. Truh ră anai, lơm kiăo tui hmư̆ tơlơi pơhing ƀuh hơdôm anom bruă bơdjơ̆ nao, ling tơhan dưi wai pơgang hơđong laih yua anun sang anŏ amai Anh pok bah amăng glăi.

Amai Nguyễn Thị Anh brơi thâo, tơdơi kơ bruă rung răng, yua kơ hơmâo gong gai ƀon lan hăng hơdôm anom bruă bơdjơ̆ nao rai wai pơgang plơi pla yua anun sang anŏ ñu hăng mơnuih ƀon sang ăt hơđong pran jua pok bah amăng bơwih ƀong sĭ mơdrô, nao pơ đang hmua. Sit biă ñu, ling tơhan, anom bruă bơdjơ̆ nao hơmâo ĕp ƀuh ƀing mơnuih ngă soh, yua anun mơnuih ƀon sang ăt plai ƀiă hŭi, jai đăo gơnang nao.

Bruă rung răng djai mơnuih mơng ƀing sat djă ba phao kơtuang, thong bok mut nao Jơnum min mơnuih ƀon sang dua boh să Ea Tiêu hăng Ea Ktur ngă lu mơnuih amăng tơring glông Čư̆ Kuin bơngŏt. Mục sư Ae Smit (arăng juăt iâu lĕ Y Djan Êban, 73 thun, dŏ ƀơi ƀuôn Kniết, să Ea Ktur, tơring glông Čư̆ Kuin, tơring čar Dak Lak) brơi thâo: “Ñu lăng anai lĕ bruă ngă soh hŭi rơhyưt biă mă, mơng anet truh ră anai aka ƀu ƀuh bruă hơget sat hŭi tui anai ôh”.

Kiăng kơ hơdôm boh plơi pla dua boh să Ea Tiêu, Ea Ktur (tơring glông Čư̆ Kuin, tơring čar Dak lak) tañ pơwŏt glăi hơđong tơlơi hơdip mơda, ling tơhan, anom bruă bơdjơ̆ nao amăng tơring čar, gong gai tơring glông, să hơmâo pơpha tơhan wai lăng tơhrơi kah hăng mlăm, gir run hyu ĕp mă pơkŏng ƀing mơnuih ngă soh. Hrŏm hăng anun, hăng hơdôm bruă pơtô pơblang, pơ alum pran jua mơnuih ƀon sang, tơdơi kơ 3 hrơi ƀuh bruă rung răng anai, tơlơi hơdip jai hơđong tui amăng plơi pla dua boh să anai.

Ơi Nguyễn Kim May, Kơ-iăng khua git gai Ping gah, Khua jơnum min mơnuih ƀon sang să Ea Ktur, tơring glông Čư̆ Kuin, tơring čar Dak Lak brơi thâo, ră anai, tơlơi hơdip kơ mơnuih ƀon sang ƀơi 19 boh plơi pla jai hơđong hăng pơwŏt glăi tui hơđăp dong mơng lơ 12/6.

Kiăng pơhlôm brơi mơnuih ƀon sang hơđong tơlơi hơdip, bơwih ƀong sĭ mơdrô tơdơi kơ tơlơi rung răng, să hơmâo pơtô pơblang, lăi pơthâo tơl anih anom kơđi čar amăng djop plơi pla hăng mơnuih ƀon sang kơ bruă ngă mơng anom bruă bơdjơ̆ nao pel ĕp, dưi wai pơgang laih; pơ alum pran jua kiăng huăi bral rơngal, anăm bơngŏt đơi ôh hăng pơhŭi mơnuih ƀon sang anăm tơbiă hyu gah rơngiao amăng mơmŏt mlăm ƀudah mơguah sing bring tơdah ƀu hơmâo bruă hơget ôh kiăng hloh; hrưn đĭ rang kơđiăng amăng mơnuih ƀon sang, iâu pơthưr mơnuih ƀon sang tơdah ƀuh bruă hơget thơ amra lăi pơthâo brơi gong gai ƀon lan ƀudah hơdôm anom bruă bơdjơ̆ nao kiăng hmao tlôn pơsir hĭ.

Hrŏm hăng tơlơi pơtô pơblang mơng gong gai ƀon lan, hơdôm sang jơnum pơƀut amăng plơi pla ăt gir run hyu pơtô pơblang kiăng ngă hơđong tơlơi hơdip mơnuih ƀon sang, kiăng mơnuih ƀon sang pơwŏt glăi tui hơđăp. Mục sư Ae Smit brơi thâo dong, pơ anăp anai, ƀơi hơdôm anih jơnum pơƀut, ƀing gơñu amra đing nao pơtô pơblang brơi mơnuih ƀon sang kiăng gir run amăng bruă gah tơlơi đăo, ngă hiưm pă hơdip hiam tui tơlơi đăo hăng khăp kơ lŏn ia. Gir run pơgiong bruă jao mơng Ping gah hăng Kơnuk kơna; ngă tui djơ̆ tơlơi črâo trun, hơdră bruă mơng gong gai ƀon lan.