Amăng blan 11 thun 2022, khul wai lăng dlai tlô tơring čar Kontum hmâo thâo krăn 83 mơta tơlơi ngă soh gah Phiăn dlai kyâu, pơhrui mă pơkŏng rơbêh kơ 419 m3 kyâu djop mơta, lŏn dlai răm rai rơbêh kơ 32 ektar. Amăng mông tơña Khul pơ ala mơnuih ƀôn sang tơring čar Kontum, khua pơ ala Trần Bá Tuấn lăi đĭ 2 mơta tơlơi truh ƀơi tơring glông Ia H’Drai hăng Sa Thầy hăng răm rai hơdôm rơtuh m3 kyâu, ñu pơtŏng sit hmâo laih tơlơi lui raih amăng wai lăng, kơƀah bruă gơgrong hăng đa lĕ djru brơi ƀing dop kyâu dong:

 “Hăng mrô kyâu dop mă lu tui anun tơdah ƀing ta ngă klă bruă gum hrom, pơsit rơđah bruă gơgrong wai lăng mơng hơdôm ƀirô, anom bruă amăng anun pô dlai, mơnuih wai lăng dlai kyâu, gong gai plơi pla... lĕ ƀu dưi hmâo sa čô mơnuih ôh mut amăng dlai mơ̆ dop mă hăng mrô kyâu lu tui anun. Hăng tơdah mă kyâu lu tui anun lĕ pơgiăng tơbiă jơlan hơpă? Ăt dô̆ mơn hơdôm anih gak wai pơlir hrom dong, khom pơsit bruă gơgrong mơng hơdôm bôh anom gak wai hiưm ñu?”.

Lăi glăi ƀơi anăp Khul pơ ala mơnuih ƀôn sang tơring čar, ơi Nguyễn Hữu Tháp, Kơ-iăng Khua Jơnum min mơnuih ƀôn sang tơring čar Kontum pơtŏng sit pioh ba truh hơdôm tơlơi ngă soh phiăn dlai kyâu yua kơ bruă git gai, črâo ba mơng gưl ping gah, gong gai sa dua anih anom akă đing nao djơ̆ rơnoh; Bruă gơgrong mơng sa dua čô mơnuih apăn bruă ngă bruă wai lăng pơgang dlai akă prong; Bơ̆ tơlơi lui raih wai lăng, djru brơi mơnuih dŏp kyâu koh drôm kyâu, pơgiăng kyâu ƀu djơ̆ phiăn; Hơdră bruă đang kyâu dô̆ akă gal; Bôh thâo wai lăng mơng sa dua pô dlai akă thâo kơjăp... Gah jơlan gah djă pioh dlai, ơi Nguyễn Hữu Tháp, brơi thâo:

 “Jơnum min mơnuih ƀôn sang tơring čar amra črâo ba dong hơdôm gơnong bruă hăng hơdôm plơi pla ƀơi anăp lĕ gưl tơring glông hăng gưl să kiăng dưi djă pioh dlai. Kơtưn bruă gơgrong mơng pô dlai hăng khul wai lăng dlai kyâu. Kơtưn đĭ hloh dong bruă hyu tir, wai lăng pha ra lĕ hơdôm bơyan ngă đang hmua. Jơnum min mơnuih ƀôn sang tơring čar amra pơdŏng kơčăo bruă kiăng kơtưn bruă pel ĕp, lăng tui hăng črâo ba hơdôm anih anom mơng tơring glông truh pơ̆ să hăng hơdôm khul pioh thâo, pơsir hăng biă ñu lĕ pơsir tơpă hơdôm mơnuih ngă soh”.

Ơi Nguyễn Hữu Tháp, Kơ-iăng Khua Jơnum min mơnuih ƀôn sang tơring čar Kontum ăt pơsit mơn, bơhmu hăng thun 2021 tơlơi ngă soh gah dlai kyâu amăng tơring čar hmâo hrŏ trun mơn gah mrô mơta tơlơi, rơwang prong răm rai hăng mrô kyâu dŏp mă. Amăng thun, tơring čar hmâo pơsir laih 63 mơta tơlơi; pơsir hình sự 17 mơta tơlơi hăng glăk pel ĕp, pơsit 23 mơta tơlơi. Gah bruă gơgrong hmâo pơsir 27 čô mơnuih, amăng anun hmâo 16 čô khua git gai. Sang phăt kơđi mơnuih ƀôn sang hơdôm gưl ba tơbiă laih pơsir 4 kơđi tơlơi, phak 20 čô mơnuih hăng rơnoh 347 blan dô̆ amăng sang mơnă, 65 blan ƀu dưi đuăi hyu hăng phăk pơkra drơi ƀu hmâo mă krư̆ 60 blan./.