Pơgôp hiăp kơ Tơlơi phiăn anai, ơi Dương Tấn Quân, grup khua mơ̆ng Bà Riạ Vũng Tàu lăi, dŏ hơmâo tơlơi aka ƀu djơ̆ hrŏm kơ tơlơi gơgrong wai lăng kông ngăn lŏn tơnah ayuh hyiăng, kiăng lăng glăi abih hŭi bơrơkua nao rai.

“Hơdôm tơlơi pơkă hơmâo lăi nao tơlơi gơgrong bruă wai lăng ia, kông ngăn ia yua mơ̆ng hơdôm ding jum anom bruă kơnuk kơna ăt kah hăng ƀơi tơring čar aka ƀu rơđah rơđông, aka ƀu kơjăp hăng hơmâo djŏp ôh. Aka ƀu pơdah pơƀuh tơlơi gơgrong bruă mơng Ding jum pơtom hiăp hiư̆m pă kơ ngă hrŏm jar kmar pơhlôm hơmâo ia yua dêh čar, jar kmar, tơlơi gơgrong mơ̆ng Ding jum kông an, Ding jum ling tơhan kơ pơhlôm hơđong ia yua, hơdjă ia yua ƀudah plai ƀiă tơlơi ngă sat kơ ia yua”.

 Sit nik ƀơi hơdôm kual ataih asuek, kual hơmâo tơlơi bơwih ƀong tơnap, ƀudah kual kơƀah ia yua jing ană plơi tơnap biă mơ̆ng hơmâo ia yua hơdjă. Tap năng, ƀơi plơi prong ăt kơƀah ia mơn, hơmâo anih đa hơmâo ia samơ̆ ia hơƀak ƀu thâo yua ôh. Kiăng pơsir hĭ tơlơi anai, lu tơlơi pơgôp hiăp kiăng pơkra Tơlơi phiăn kiăo tui hơdôm tơlơi bơdjơ̆ nao kông ngăn ia yua; kiăng ding jum, anom bruă wai lăng gơgrong bruă tui hăng bruă hơmâo jao ƀơi hơdôm tơlơi phiăn bơdjơ̆ nao. Ơi Tráng A Dương, grup mơ̆ng tơring čar Hà Giang lăi:

“Lu tơlơi ngă hơƀak ia yua, ngă kơƀah ia yua bơdjơ̆ nao hơdôm anom bruă kah hăng: bruă akŏ pơdong plơi prong, phă glai prai rưng, mă yua ia jrao, jrao pơgang phun pla amăng bruă ngă hmua, ia hơƀak mŏng sang măi pơkra gơnam, sang bơwih ƀong...Kâo rơkâo anom bruă čih pơkra tơlơi phiăn kơsem min dong, pơhrui tui hơdôm tơlơi pơkă ăt kah hăng tơlơi gơgrong bruă mơ̆ng Ding jum anom bruă, hơjăn pô bơdjơ̆ nao amăng bruă pơgang ngă hơƀak, kơƀah ia yua - kiăng hơmâo tơlơi phiăn djŏp kơ bruă mă yua, pơgag ia yua; pơhlôm rơnuk rơnua hơđong ia yua dêh čar.

Kơ bruă čih anăn, brơi hră mă yua ia, hơmâo tơlơi pơgôp hiăp kiăng lăng glăi, bruă hiư̆m pă kiăng rơkâo hră pơsit, bruă hiư̆m pă huăi kiăng hơmâo hră pơ-ar hŭi ngă kơnar ƀudah pơgao lui; ngă rơđah tơlơi gơgrong bruă kơplah wah čih anăn rơkâo hră pơsit mă yua yua. Yă Khang Thị Mào, grup khua mơ̆ng Yên Bái lăi:

“Tơlơi pơsit kơ bruă čih anăn, brơi hră dưi mă yua ia hơmâo pơkă ƀơi anai lĕ hơmâo čih rơđah hơdôm anom bruă dưi brơi hră mă yua ia, samơ̆ ƀu pơkă ôh tơlơi gơgrong bruă hăng rim anom bruă. Tui anun ƀu rơđah hơdôm tơlơi dưi, tơlơi gơgrong bruă mơ̆ng hơdôm anom bruă dơ̆ pă, kâo pơmin kiăng pơplih pơkra, pơhrua tui rơđah kơ tơlơi dưi, tơlơi gơgrong bruă mơ̆ng hơdôm anom bruă kơnuk kơna, amăng bruă brơi hră dưi mă yua ia”.

Bơdjơ̆ nao tơlơi pơsit tuh pơ alin, pơđĭ kyar dơnao kŏng ia, mơ̆ng bruă hơmâo sit nik amăng tơring čar ñu, pô pơ ala yă Cha Ma Lé Thị Thủy, grup mơ̆ng Ninh Thuận kiăng sem lăng pơhrua tui tơlơi pơkă mua yua ia, mă tơlơi pơgôp hiăp mơnuih ƀôn sang, biă ñu lĕ kual hơmâo ia yua:

“Tơlơi phara mơ̆ng hơdôm boh dơnao kŏng ia ƀơi Ninh Thuận juăt ñu dơnao anet, ƀu hơmâo djŏp ia pruih amăng bơyan không phang ôh samơ̆ khŏm pơđoh đuăi lu biă amăng bơyan hơjan. Mơnuih ƀôn sang tơguan kơ kơnuk kơna tuh pơ plai pơkra dơnao kŏng ia kiăng mă yua ia amăng bơyan hơjan ia dăo pioh yua amăng bơyan phang. Yua hnun, tui kăng kâo pơmin kiăng pơtruh nao rai kơjăp hăng djru nao rai. Hơdôm tơlơi phiăn ia yua (pơkra glăi) kơnong tŭ yua tơdah pơhlôm ngă tui hơdôm tơlơi hơmâo mơ̆ng jơlan hơdră kah hăng: tơlơi pơkă tuh pơ plai, bruă čih pơkra, mă yua prăk lăp djơ̆ hăng hmao tlôn”.

Ƀing khua ăt kiăng čih pơkra tơlơi phiăn wai lăng kông ngăn ia yua dêh čar tui glông điện tử. Tui hăng ơi Thạch Phước Bình, grup mơ̆ng tơring čar Trà Vinh, kiăng pơplih hơbô̆ bruă wai lăng yua lok nao lok rai, pơhlôm pơđĭ kyar bơwih ƀong hăng pơgang ba ia yua. Lăi glăi hơdôm tơlơi mơ̆ ƀing khua pơ ala lăi pơthâo amăng mông bơkơtuai Khua ding jum kông ngăn lŏn tơnah hăng ayuh hyiăng Đặng Quốc Khánh brơi thâo:

“Bruă kah pơpha, jao bruă amăng Tơlơi phiăn gir pơčlah phara, wai lăng kơnuk kơna. Ră anai, bruă ia yua anai hơmâo hơdôm Ding jum, anom  bruă, wơ̆t hăng Ding jum kông ngăn lŏn tơnah hăng ayuh hyiăng, Ding jum man pơkra wai lăng ia yua hơdjă plơi prong, Ding jum tuh tia pơkra gơnam, Ding jum bruă hmua ngă hiư̆m pă kiăng huăi bơrơkua hơdôm tơlơi phiăn kah hăng Tơlơi phiăn pơgang tơlơi truh lŏn adai ngă, Tơlơi phiăn dơnao kŏng ia, Tơlơi phiăn glai rưng, anom bruă čih pơkra amra sem lăng tơlơi phiăn kông ngăn pơtâo čuah, ngă hiư̆m pă kiăng tơlơi phiăn huăi bơrơkua nao rai, laih anun kah pơpha, jao kơ anom bruă rơđah rơđông, djŏp djel. Amăng tơlơi phiăn amra lăng glăi hơdôm hơdră bruă hơmâo hơdră pơkrem ia yua, mă yua ia, mă yua boh thâo wai lăng ia yua lok nao lok rai. Ră anai, ƀing ta glăk mă yua ƀu klă đơi ôh ia yua, yua hnun amăng tơlơi phiăn pơtrut mă yua ia mă nao mă rai tŭ yua, lăng ba pơkra dơnao kŏng ia, plai ƀiă kơƀah ia yua amăng bơyan không phang, ia dăo amăng bơyan hơjan, yua hnun bruă mă yua ia djơ̆ lăp jing bruă yôm biă mă”.