Mông jơnum hơmâo rơbêh 270 čô khua lĕ Khua gum bruă git gai pơ ala mơnuih ƀon sang 63 boh tơring čar ƀon prong amăng dêh čar. Khua git gai pơ ala mơnuih ƀon sang ơi Vương Đình Huệ git gai mông jơnum anai.

Pơhiăp ƀơi  mông jơnum,  Khua git gai pơ ala mơnuih ƀon sang ƀon prong Hà Nội Nguyễn Ngọc Tuấn, Khua gum bruă git gai pơ ala mơnuih ƀon sang ƀon prong hơmâo sem lăng na nao, hmư̆ tui hơdôm tơlơi pơtô djơ̆, hơdră ngă bruă tŭ yua mơng Ƀirô khua git gai pơ ala mơnuih ƀon sang, Jơnum min khua apăn bruă pơ ala mơnuih ƀon sang dêh čar; lăng tui hơdră ngă bruă mơng sa dua boh tơring čar, ƀon prong či pơplih phrâo bruă wai lăng tui pran jua ngă bruă thâo pơmin, khin hơtai, ngă tui boh thâo ia rơgơi, ngă tŭ yua, kiăo tui tơlơi phiăn laih anun djơ̆ hăng tơlơi hơmâo sit nik mơng ƀon prong đah mơng pơsir bruă.

“Hà Nội hơmâo tơlơi pơtrun kơ tơlơi pơkă hơdră ngă bruă wai lăng, anai jing bruă hơmâo sit nik či sem lăng ba nao pơ anom apăn bruă kar hăng anom hơduah ĕp kơđi, jơnum min pel ĕp kơđi tơlơi hăng hơdôm anom bruă hyu ĕp, sem lăng, pơsir hĭ hơdôm tơlơi ngă soh prong. Bruă ngă tui tơlơi pơsit wai lăng ăt jing rơnoh pơkă kiăng anom bruă sem lăng, pơtŏng glăi pô ngă khua laih anun sem lăng apah bơni”.

Dŏ bơngơ̆t kơ bruă bưp mơnuih ƀon sang dŏ hơmâo lu tơlơi aka ƀu djơ̆, ngă tui kru hơđăp, ngă lok nao lok rai hơnong đôč, Khua git gai Ping gah Long An, Khua Jơnum min pơ ala mơnuih ƀon sang  Nguyễn Văn Được lăi nao tơlơi hơmâo sit nik amăng bruă bưp mơnuih ƀon sang, anun lĕ: hlâo adih, bruă bưp mơnuih ƀon sang mơng ƀing khua pơ ala mơnuih ƀon sang dêh čar, tơring čar, tơring glông, să hơmâo pơphun phara hơjăn. Tơlơi anai ngă rơngiă lu mơta biă.

“Jơnum tal anai, khul khua apăn bruă pơ ala mơnuih ƀon sang tơring čar Long An pơsit pơmut hrŏmm abih bruă bưp mơnuih ƀon sang. Tui anun amra huăi rơngiă prăk, huăi rơngiă mông. tơlơi anai hơmâo mơnuih ƀon sang amăng tơring čar tŭ ư laih”.

Kơ-iăng khua Jơnum min pơ ala mơnuih ƀon sang ƀon prong Đà Nẵng yă Nguyễn Thị Anh Thi brơi thâo, ƀon prong Đà Nẵng pơphun ngă hlâo hơbô̆ bruă gong gai plơi prong tui Tơlơi pơtrun mơng Khua git gai pơ ala mơnuih ƀon sang dêh čar, tui anun, 8 boh kuâ̆n hăng 45 boh phường ƀu hơmâo dong tah jơnum min pơ ala mơnuih ƀon sang. Yua hnun, bruă bưp mơnuih ƀon sang amăng hrơi mông pơphun ngă lăng hlâo gong gai plơi prong ăt hơmâo pơplih tui klă hloh mơn.

“Bruă bưp mơnuih ƀon sang amăng hrơi mông pơphun ngă tui hơbô̆ bruă gong gai plơi prong ăt hơmâo pơplih phrâo. Hmư̆ hing lĕ Khul khua Jơnum min apăn bruă pơ ala mơnuih ƀon sang ƀon prong pơphun klă 3 jơlan hơdră “Jơnum min pơ ala mơnuih ƀon sang hăng mơnuih ƀon sang”. Mơng anun lu bruă hơmâo lăi nao, hơdôm bruă hmư̆ hing ƀơi ƀon prong hơmâo pơsir tañ, djơ̆ hăng tơlơi kiăng khăp mơng mơnuih ƀon sang”.

Pơhiăp ƀơi mông jơnum, Khua git gai pơ ala mơnuih ƀon sang ơi Vương Đình Huệ, thun 2022, Ƀirô khua git gai pơ ala mơnuih ƀon sang dêh čar, Jơnum min khua apăn bruă git gai pơ ala mơnuih ƀon sang, hơdôm anom bruă pơ ala mơnuih ƀon sang, Jơnum min pơ ala mơnuih ƀon sang djŏp gưl hơmâo pơplih tui klă, mă bruă tŭ yua mơn wơ̆t bruă čih pơkra tơlơi phiăn, krăp lăng, pơsit hơdôm bruă prong mơng lŏn ia hăng ƀơi tơring čar. Thun 2023, Khua git gai pơ ala mơnuih ƀon sang dêh čar ơi Vương Đình Huệ kiăng Jơnum min pơ ala mơnuih ƀon sang tơring čar ƀon prong ngă klă 6 mơta bruă phun, amăng anun kơsem min, pơplih glăi, pơhrua tui ngă dưm kơnar hơdôm tơlơi pơtrun phrâo mơng Ping gah, kơnuk kơna, biă ñu lĕ hơdôm tơlơi pơtrun mơng Ding jum kơđi čar kơ pơđĭ kyar bơwih ƀong huă - mơnuih mơmam amăng kual.

Čih pơkra hăng pơphun ngă jơlan hơdră krăp lăng thun 2023 lăp djơ̆, ngă djơ̆ hrŏm, tŭ yua, ngă klă bruă wai lăng tơlơi dưi mơng ƀing khua, pơgang hưp ham ƀong kông ngăn, pơgăn prai prăk khưi khai. Biă ñu, thun 2023, Khua git gai pơ ala mơnuih ƀon sang dêh čar hăng Jơnum min pơ ala mơnuih ƀon sang amra plĕ hră hăng ƀing khua yua Ƀirô khua git gai pơ ala mơnuih ƀon sang dêh čar, Jơnum min pơ ala mơnuuih ƀon sang ruah ƀudah pơsit brơi ngă khua. Ding jum kơđi čar hơmâo pơtrun tơlơi pơkă mrô 96 kơ bruă mă hră plĕ dong yua hăng mơnuih ngă khua, wai lăng bruă čar.

“Kiăng jơnum min pơ ala mơnuih ƀon sang pơphun ngă klă Tơlơi pơkă mrô 96, hơdôm hră pơ-ar mơng Khua git gai pơ ala mơnuih ƀon sang dêh čar, Jơnum min apăn bruă git gai  pơ ala mơnuih ƀon sang dêh čar hăng tơlơi pơmin bruă mă hră plĕ dong yua jing bruă yôm phun, mơng anun čih pơkra akŏ bruă hăng hơdră ngă bruă lăp djơ̆, rơđah rơđông, pơphun ngă klă, bĕ hĭ ngă kiăng kơ ƀă đôč”.

Jơnum min pơ ala mơnuih ƀon sang khŏm gơgrong bruă pơplih phrâo ƀơi tơring čar ƀon prong tui rơnuk pơplih phrâo, tŭ yua, pơƀut wai lăng pơđĭ kyar; pơhlôm ngă tui Phiah phiăn hăng tơlơi phiăn, ngă bruă rơđah rơđông, lăi pơthâo glăi hăng hơmâo tơlơi gum ngă mơng mơnuih ƀon sang; djru akŏ pơdong anom bruă bơwih brơi mơnuih ƀon sang, mơnuih ƀon sang ngă pô, tui tơlơi phiăn, kơjăp bruă, pơplih tui rơnuk phrâo, tơlơi pơmin pran jua hiam, lăi pơthâo rơđah rơđông kơ abih bang, pơđĭ tui tơlơi pơmin bơwih brơi mơnuih ƀon sang hăng akŏ pơjing anih mă bruă klă brơi anom bơwih ƀong sĭ mơdrô.