Anai lĕ tơlơi git gai mơ̆ng Kơ-iăng Khua dêh čar ơi Nguyễn Hòa Bình ƀơi mông jơnum pơtong glăi boh tơhnal bruă mă mơ̆ng Hơdră dêh čar pơtrun kơ tơhnal bruă pơđĭ kyar bơwih ƀong huă mơnuih mơnam plơi djuai ania ƀiă hăng čư̆ siăng mơ̆ng thun 2021-2025 hăng pơdah thâo bruă či mă mơ̆ng thun 2026-2030, kual Tong krah hăng Dap Kơdư, pơphun jơnum ƀơi tơring čar Gia Lai. 

Pơhiăp đĭ ƀơi mông jơnum, ơi Nguyễn Hoà Bình lăi rơđah, kiăng pơtrut tui bruă pơđĭ kyar bơwih ƀong huă kơ mơnuih mơnam amăng plơi pla djuai ƀiă hăng čư̆ siăng lơ̆m kual Tong krah hăng Dap Kơdư, mơ̆ng thun 2026-2030, Khul git gai hơdră pơtrun mơ̆ng dêh čar, hơmâo lăi pơthâo hơdôm tơhnal pơkă tum teč tong ten hloh, kiăng pơđĭ tui tơlơi hơdip mơda kơ mơnuih ƀôn sang djuai ƀiă. Kơtưn gir pơhưč rơnoh pơhrui glăi pơkă dưm dưm ha mơkrah tui hăng rơnoh pơkă amăng dêh čar; pơhrŏ mrô sang anŏ ƀun rin trun gah yŭ 10%, kiăng ƀu hơmâo să, plơi pla pơpă dơ̆ng tah tơnap tap; 70 % mrô să ngă djơ̆ tơhnal pơkă plơi pla phrâo.