VOV4.Jarai - Hăng tơlơi gêh gal kơ hơdôm gơnam mơng hmua, hrŏm hăng hơdôm tơlơi djru mơng tơring čar, tơdơi kơ 3 thun pơphun ngă, Jơlan hơdră rim boh să sa mơta gơnam (OCOP) ƀơi Dak Lăk dưi ngă lu tơlơi klă hiam, bang hyu, hmư̆ hing biă, pơsit anăn gơnam mơng tơring čar.

Hrŏm hăng kơphê, ka kao lĕ sa amăng hơdôm mơta gơnam yôm phun, ba jơlan, tơlơi gêh gal mơng Dak Lăk. Khă hnun, hơdôm thun hlâo adih, ka kao Dak Lăk hơmâo ƀiă đôč mơnuih thâo, juăt ñu sĭ gơnam aka ƀu pơkra hiam soh. Prăk pơhrui jing aset mơn, aka ƀu mă yua abih tơlơi gêh gal ƀơi plơi pla ôh. Ƀuh tơlơi aka ƀu dưi anun, ơi Trương Ngọc Quang, Khua Kông ti TNHH Ca cao Nam Trường Sơn ƀơi să Ea Na, tơring glông Krông Ana hyu sem lăng anih sĭ mơdrô, blơi măi mok pơkra gơnam mơng ka kao kah hăng: tơpung ka kao, ƀơ ka kao, kĕo socola...Kiăng pơsit brơi arăng ƀuh anŏ klă, kông ti hơmâo ba gơnam pơtŏng lăng tui hnong pơkă OCOP tơring čar. Truh ră anai, 3 mơta gơnam kah hăng: Tơpung ka kao, kĕo socola jŭ, kĕo socola ia tơsâo rơmô mơng Kông ti hơmâo 4 asar pơtŭ amăng mrô 8 mơta gơnam hmư̆ hing 4 asar pơtŭ mơng tơring čar. Ơi Trương Ngọc Quang, Khua Kông ti brơi thâo:

“Tơdơi kơ gơnam mơng kông ti hơmâo hră tŭ yap OCOP 4 asar pơtŭ gưl tơring čar, anun ăt jing tơlơi pơtruh kiăng kông ti gum hrŏm hăng hơdôm anih sĭ mơdrô gơnam OCOP. Mơng hơdôm anih sĭ gơnam OCOP, ha bơnah pơƀuh tơlơi dưi ngă ăt kah hăng anŏ klă mơng gơnam, mơng anun ƀing tuai đăo gơnang hăng lăng yôm. Mơng hơdôm anih sĭ gơnam OCOP anai mơn, gơnam hơmâo ba nao tơl tơngan mơnuih blơi yua lu hloh hăng tañ hloh”.

Kông ti TNHH Ca cao Nam Trường Sơn ƀơi mông Jơnum pơtŏng lăng, dăp mrô gơnam OCOP gưl tơring čar.

Tui hăng ơi Võ Văn Sơn, Khua anom ngă ƀong hrŏm HTX ngă hmua bơwih bơwang Thăng Bình, să Čư̆ Kty, tơring glông Krông Bông, tơring čar Dak Lăk lăi: hră OCOP kơ gơnam tam jai hrơi hơmâo arăng gleng nao, jing pơtrut pran jua kơ pô pơkra, sĭ mơdrô. Hơdôm mơta gơnam hơmâo hră OCOP lĕ sa hơyak nao amăng bruă pơtŏng lăng, djru gơnam hơmâo pơhlôm anŏ klă, hruh gơnam, gru gơnam, thâo anih pơkra hăng dưi bơkơtưn ƀơi anih sĭ mơdrô. Pơsit brơi tơlơi anai rơđah hloh lĕ braih hơdjă HTB mơng anom ngă ƀong hrŏm lơ̆m hơmâo Jơnum min mơnuih ƀon sang tơring čar Dak Lăk pơsit lĕ gơnam OCOP 3 asar pơtŭ, nua sĭ pơmă hloh 2 wơ̆t pơhmu hăng hlâo adih, gơnam dưi sĭ kloh ăt đĭ mơng 200 truh kơ 400 tơn amăng ha thun, ba glăi lu tơlơi klă kơ anom ngă ƀong hrŏm ăt kah hăng ƀing gum ngă hrŏm. Ơi Võ Văn Sơn lăi:   

“Hlâo adih gơnam đôč đač jing arăng ƀu thâo ôh, sĭ hai tơnap mơn, samơ̆ mơng hrơi hơmâo hră OCOP lĕ gơnam hmư̆ hing, đĭ tui sa hơyak kơ anŏ klă, anŏ phara mơng gơnam, lơ̆m anun mơnuih blơi amuñ mơn pơtŏng lăng, krăn gơnam, hơduah ĕp hăng blơi gơnam mơng ƀing ta. Anai ăt jing tơlơi pơplih phrâo kah hăng tuh sua yơh mơng gơnam hơđăp yua dah hơmâo hră OCOP hăng asar pơtŭ laih anun anai ăt jing tơlơi gêh gal kiăng gơnam mơng mơnuih ngă hmua amăng plơi pla hrưn đĭ pơ anih sĭ mơdrô prong”.

Gơnam OCOP hơmâo pơƀuh pơ anih pơdă gơnam, pơƀuh hăng pơdă gơnam OCOP tơring čar Dak Lăk.

Ơi Nguyễn Hoài Dương, Khua Gơnong bruă ngă hmua hăng pơđĭ kyar plơi pla tơring čar Dak Lăk brơi thâo: Dak Lăk ră anai hơmâo 46 gơnam OCOP, amăng anun hơmâo 8 mơta gơnam 4 asar pơtŭ, hăng 38 mơta gơnam 3 asar pơtŭ. Bruă kah pơpha, dăp mrô, tĕp asar pơtŭ kơ gơnam OCOP jing tơlơi pơsit kơ anŏ klă, gru gơnam. Tơlơi anai gum pơđĭ tui tơlơi thâo pơmin, tơlơi gơgrong bruă mơng mơnuih ƀon sang, anom bơwih ƀong amăng bruă pơkra, pơhlôm anăn gơnam OCOP ăt kah hăng tơlơi dưi mơng pô blơi gơnam. Hrơi blan pơ anăp anai, anom bruă ngă hmua amra ngă hrŏm hăng anom bruă pơkra gơnam sĭ mơdrô ba pơƀuh, ngă pơhưč brơi kơ gơnam OCOP amăng tơring čar kiăng mơnuih blơi amăng dêh čar ta hăng čar rơngiao thâo.

“Bruă pơtruh nao rai sĭ gơnam jing bruă yôm biă mă amăng bruă pơkra gơnam OCOP kiăng hơmâo nua. Thâo rơđah tơlơi anai, Gơnong bruă pơkra gơnam sĭ mơdrô glăk lăi pơthâo kơ Jơnum min mơnuih ƀon sang tơring čar pơsit kơčăo bruă djru blơi gơnam OCOP. Bruă anai hơmâo pơsit brơi amra djru ba klă biă, kiăng lu anih sĭ gơnam OCOP hơmâo akŏ pơdong. Mơng anun, pơtruh nao rai hăng hơdôm kual plơi pla amăng dêh čar blơi gơnam, pơtrut đĭ gơnam OCOP pơđĭ kyar kơtang hloh amăng hrơi blan pơ anăp”.

Gir run ba gơnam mơng tơring čar hơmâo hră OCOP glăk jing tơlơi pơtrut pơđĭ kyar tơlơi bơwih ƀong amăng plơi pla ƀơi Dak Lăk. Tơlơi anai glăk dưi hơyak đĭ glông hloh amăng bruă akŏ pơdong plơi pla phrâo hơđong kơjăp mơng bruă pơƀuh tơlơi hing ang gơnam mơng hmua ƀơi tơring čar.

Hương Lý: Čih - Siu H’Mai: Pơblang