VOV4.Jarai - Tơring čar Dak Lak ră anai hơmâo 208.000 ektar đang kơphê glăk amăng bơyan pruih ia. Ră anai kiăng ia lu biă mă samơ̆ ia kơƀah, jing ngă tơnap kơ mơnuih ngă kơphê amăng lu thun rơgao. Khă hnun, amăng bơyan không phang anai, pruih ia thâo pơkrem jing klă hloh hơmâo mơnuih ngă kơphê ngă tui, djru rông phun kơphê hiam mah amăng mông adai phang khot tui anai.

Ơi Triệu Văn Khang dŏ ƀơi să Ea Mdroh, tơring glông Čư̆ M’gar hơmâo 2 ektar đang kơphê glăk amăng bơyan mơboh brơi thâo, truh ră anai hơdôm ia krông, dơnao ia ƀudah ƀơi hơdôm boh bơnư̆, ia abih thu laih. Samơ̆ yua ngă tui hơdră pruih pơkrem ia, ia mơng hơdôm boh ia bơmun aset đôč samơ̆ sang anŏ ñu ăt pơhlôm hơmâo djŏp ia pruih kơ phun pla mơn.

“Pruih ia tal dua anai lĕ gơmơi khŏm mă ia mơng ia bơmun. Lơ̆m pruih lĕ ta pruih pơkrem, pruih dŏ krăp lăng ƀơi mơta mơtăm yơh. Lơ̆m pruih djŏp lĕ ta ba đing nao pơ phun pơkŏn dong đah mơng huăi ngă khưi khai ia pruih”.

Pruih ia kar hăng ia hơjan ƀudah arăng juăt iâu pruih ia tơdjoh, hơdră klă biă pơgăn tơlơi kơƀah ia kơ phun kơphê ƀơi Dak Lak.

Ăt kiăo tui hơdră pruih ia pơkrem mơn, ơi Phùng Văn Nhiên, dŏ ƀơi să Quảng Hiệp, tơring glông Čư̆ M’gar lui hĭ pruih pơđoh ia bă blai, hơdai nao pruih ia tơdjoh kơ 3 ektar đang kơphê. Ơi Nhiên brơi thâo, tuh pơ alin pruih ia tơdjoh mah huač prăk samơ̆ hơmâo Kơnuk kơna ta kiăng hla tui, djru ba, pơhlôm brơi phun kơphê čăt hiam amăng hrơi adai không phang.

“Kual giăm sang kâo anai amăng bơyan phang lĕ dơnao ia, ia krông thu krot yơh. Yua hnun kâo mă yua ia bơmun dong. Abih bang đang kơphê hơmâo pruih tơdjoh, hơdră pruih anai hơmâo kơnuk kơna ta djru ha mơkrah mrô prăk. Lơ̆m pruih lĕ khŏm krăp lăng tŏng ten ƀu brơi ia rô bă blai ôh, tui anun kah mơng dưi hơmâo ia pruih truh abih bơyan phang”.

Jơnum min mơnuih ƀon sang Dak Lak djru ba mơnuih ƀon sang 50% mrô prăk dưm măi pruih ia tơdjoh ƀơi đang kơphê.

Tui hăng ơi Nguyễn Thanh Long - Khua anom bruă wai lăng dơnao kŏng ia tơring čar Dak Lak, pơ-iă hang sui amăng bơyan phang ngă kơƀah ia pruih kơphê, jing tơlơi hơmâo lok nao lok rai yơh amăng lu thun rơgao ƀơi anai. Khă hnun, tơlơi anai amăng ƀrư̆ hơmâo pơsir hĭ hăng hơbô̆ bruă pruih ia pơkrem. Jơnum min mơnuih ƀon sang Dak Lak ăt hơmâo djru ba mơn kiăng mơnuih ƀon sang amuñ hla tui hơdră pruih ia phrâo.

“Mơng akŏ bơyan phang mơtăm gơmơi lăi pơthâo hlâo kơ ană plơi kiăng yua ia thâo pơkrem, pơđom lui ia ƀơi djŏp dơnao ia pioh pruih kơ phun pla. Pơtô brơi neh met wa pruih pơkrem, ƀu dưi pơđoh lui ia khưi khai ôh. Mă yua hơbô̆ bruă pruih ia thâo pơkrem tui rơnuk phrâo. Bruă anai hơmâo Jơnum min mơnuih ƀon sang tơring čar djru 50% prăk kơ neh met wa, tơdah sang anŏ hlơi thơ mă yua hơdră pruih ia thâo pơkrem hăng măi pruih ia tơdjoh”.

Tuấn Long: Čih - Siu H’Mai: Pơblang