VOV4.Jarai - Hơdôm thun giăm anai, phun boh čik arăng lăng lĕ phun pla ba glăi tŭ yua amăng bơwih ƀong huă kơ mơnuih ƀon sang ƀơi hơdôm să kual ataih Čư̆ Pui, Čư̆ Đrăm hăng Yang Mao, tơring glông Krông Bông, tơring čar Daklak. Rơnoh pơhrui mơñg phun boh čik ngă kơ lu sang anŏ pơklaih mơng ƀun rin hrưn đĭ pơdrong asah. Samơ̆, amăng bơyan pơhrui thun anai, mơnuih pla phun čik ƀơi tơring glông Krông Bông glăk bưp tơnap tap yua kơ sĭ ƀu hơmâo nua.

Bơyan pơhrui boh čik thun anai, sang anŏ ơi Trần Dương Sỹ, dŏ ƀơi să Čư̆ Đrăm, tơring glông Krông Bông, tơring čar Daklak pla 4 ektar phun boh čik. Ră anai truh bơyan pơhrui yơh samơ̆ sang anŏ ñu glăk bơngŏt biă mă, yua kơ nua hrŏ trun kơtang, mơnuih nao blơi ăt ƀiă mơn. Ơi Trần Dương Sỹ brơi thâo, tuh pơ alin giăm 160 klăk prăk blơi kmơk, ia jrao pruih pơgang phun pla, apah arăng mă bruă dong … kiăng kơ phun boh čik hiam mơboh pơprong, samơ̆ ră anai boh čik sĭ tơnap tap, ngă kơ mơnuih ƀon sang pơhrui glăi ƀu hơmâo.

Hlâo anun giăm ha mơkrah blan sĭ 20.000 prăk sa boh, ră anai dŏ kơnong mơng 12.000 - 13.000 prăk sa boh. Ƀing mơnuih hyu blơi lăi boh čik ăt dŏ trun kơtang tui dong lơ̆m neh met wa pơhrui lu. Ră anai neh met wa čang rơmang hơmâo sang măi pơkra pơjing ƀudah akŏ pơjing anom bơwih ƀong hrŏm kiăng pơlir hơbit mơng anun hơđong amăng bruă sĭ mơdrô.

Yua kơ lăp djơ̆ hăng ayuh hyiăng lŏn mơnai, phun boh čik ƀơi hơdôm să Čư̆ Đrăm, Čư̆ Pui hăng Yang Mao (Krông Bông) dưi pơhrui mơng 35-40 tơ̆n/ektar/bơyan

Ƀu djơ̆ kơnong sang anŏ ơi Sỹ đôč ôh mơ̆, hơdôm rơtuh čô sang anŏ pla phun boh čik ƀơi hơdôm să Čư̆ Pui, Čư̆ Đrăm hăng Yang Mao, tơring glông Krông Bông ăt glăk bưp tơnap tap mơn lơ̆m ƀiă truh bơyan pơhrui. Hơdôm thun hlâo anun, sĭ hăng nua mơng 16.000-20.000 prăk sa boh kơtrâ̆o mơng 2 kĭ pơ glông, ră anai hrŏ trun dŏ kơnong mơng 10.000 - 12.000 prăk. Lơ̆m bơyan mơboh hiam, sĭ hơmâo nua, rĭm ektar pơhrui glăi kơmlai truh pơ 50 klăk prăk, yua anun lu sang anŏ dưi man pơdong sang phrâo. Bơyan thun anai čik trun nua sĭ ƀu hơmâo kmlai, biă mă ñu lu sang anŏ amra huăč prăk kak.

Yă Niê Thanh Trang - Kơ-iăng khua git gai Ping gah să Čư̆ Đrăm, tơring glông Krông Bông brơi thâo, đơ đam să hơmâo rơbêh 300 boh sang anŏ pla phun boh čik, hăng đơ đam giăm 450 ektar. Ƀơi anăp kơ bruă boh čik bưp tơnap tap na nao “pơhrui hơmâo sĭ trun nua, sĭ hơmâo nua pơhrui ƀiă”, gong gai ƀon sang hơmâo pok pơhai lu hơdră djru brơi mơnuih ƀon sang, samơ̆ ăt aka ba glăi tŭ yua:

Amăng hrơi blan anai neh met wa glăk pơhrui boh čik samơ̆ aka ƀu thâo sĭ mơdrô pơpă ôh yua anun mrô čik neh met wa sĭ mơdr hrŏ trun kơtang. Ping gah glăk pơmĭn rơkâo đĭ gưl glông hơmâo hơdră bruă jak iâu tuh pơ alin man pơdong sang măi pơkra pơjing kiăng kơ hơmâo anih blơi mut boh čik kơ neh met wa. Smaơ̆, truh ră anai ăt aka ƀu dưi ngă ôh.

Bruă sĭ mơdrô boh čik ƀu hơđong ngă kơ mơnuih ƀon sang hơdôm să amăng tơring glông Krông Bông bơngŏt

Đơ đam tơring glông Krông Bông ră anai hơmâo rơbêh 550 ektar hmua pla phun boh čik, lu hloh ƀơi hơdôm să Čư̆ Pui, Čư̆ Đrăm hăng Yang Mao. Yă Trần Thị Len - Khua anom bơwih ƀong hrŏm gah ngă hmua Čư̆ Đrăm brơi thâo, pla phun čik lăp djơ̆ hăng ayuh hyiăng lŏn mơnai ƀơi anai. Čik pơhrui glăi mơng 35-40 tơ̆n/ektar amăng sa bơyan. Boh čik ƀong mơmih, ƀâo hiam, drơi dưm kơnar, đuh kơñĭ lăng hiam biă mă. Čik ƀơi tơring glông Krông Bông hơmâo pơsit yôm mơng hơdôm thun hlâo anun yơh; samơ̆ tơlơi ngă bơngŏt âmwng rĭm thun lĕ tơnap amăng sĭ mơdrô.

Hmua pla phun boh čik ƀơi hơdôm să Čư̆ Đrăm ră anai truh pơ 450 ektar samơ̆ aka ƀu hơmâo anih ba sĭ mơdrô hơđong brơi kơ neh met wa. Truh ră anai aka ƀu hơmâo kông ti pơpă ƀudah anom bơwih ƀong sĭ mơdrô nao kĭ pơkôl blơi boh čik. Tơlơi čang rơmang mơng ƀing ding kơna amăng anom bơwih ƀong hrŏm lĕ hơmâo anih blơi hơđong. Yua kơ mơnuih ƀon sang pla pơjing glêh glar biă mă.

Siu Đoan: Pơblang