VOV4.Jarai - Ƀơi tơring glông Čư̆ Mgar, tơring čar Daklak kman ngă bơbrah ƀơi klĭ rơmô kơbao hăng klin pơtah čroh ƀơi un glăk lar hyu kơtang ngă kơ lu sang anŏ djai hlô rông.

Rơmô ƀă kman bơbrah ƀơi klĭ djai lu biă mă, yă Hoàng Thị Chấn dŏ ƀơi ƀut plơi 8, tơring kual Quảng Phú, tơring glông Čư̆ Mgar, tơring čar Daklak hơ-ưi biă mă lơ̆m tuh pơ alin lu prăk kak samơ̆ hlô rông djai abih. Yă Chấn brơi thâo, sang anŏ ñu hơmâo 4 drơi rơmô mơ̆ djai 3 drơi yơh, ngă rơngiă giăm 100 klăk prăk.

“Ăt iâu arăng rai tlâ̆o pơgang hĭ klin kman, pruih ia jrao dong. Samơ̆ yua klin kman lar hyu kơtang, hlâo anun rơmô ania djai, tơdơi anun 3 hrơi ană ñu djai mơn. Sa drơi dong yua kơ giăm 2 blan anai ăt hơđuh glăi klin kman ăt ngă ñu djai mơn”.

Tlâ̆o ia jrao pơgang klin kman brơi rơmô

Hrŏm hăng kman bơbrah ƀơi klĭ ƀơi rơmô kơbao, ră anai ƀơi tơring glông Čư̆ Mgar klin pơtah čroh ƀơi un ăt lar hyu kơtang mơn. Ơi Nguyễn Ngọc Đương, dŏ ƀơi plơi Hiệp Hoà, să Quảng Hiệp, tơring glông Čư̆ Mgar brơi thâo, 3 drơi un ania hăng lu un pioh sĭ čuh hơtă mơng sang anŏ ñu prap sĭ mơdrô samơ̆ djai abih yua kơ klin tưp hăng laih anun khŏm ba nao pơrai hĭ.

“Kâo ăt tlâ̆o vaccine 3 amăng 1, kiăng pơgang hĭ klin kman, pơgang ƀam ƀong mơbah hlung tơkâo. Ƀing gơmơi rông pơčlah kiăng pơgang hŭi ƀă kman samơ̆ ƀu thâo klin lar hyu mơng pă ôh. Hơdôm hrơi blung a ƀuh 1 drơi klĭ mơriah, truh hrơi tal dua lu un ruă ƀu-ai ƀuh hơdôm pluh drơi, mơng un ania truh pơ un anet. Kâo hơmâo lăi pơthâo brơi kơ anom bruă pơjrao hlô mơnong să, gong gai să rai mă drah pơčrang lăng ƀuh un ƀă klin pơtah čroh”.

Pơrai hĭ hlô rông djai yua klin tưp

Tui hăng jŭ yap mơng Anom bruă ngă hmua hăng pơđĭ kyar ƀon lan tơring glông Čư̆ Mgar, truh ră anai kman bơbrah ƀơi klĭ rơmô kơbao ƀuh ƀơi 42 ƀut plơi pla amăng 14 boh să, tơring kual. Anom bruă bơdjơ̆ nao hơmâo pơrai hĭ 88 drơi rơmô kơbâo hăng giăm 8.500 kĭ mơnong. Hăng klin pơtah čroh ƀơi un hơmâo ƀuh amăng 9 boh să, tơring kual hăng pơrai hĭ giăm 26.000 kĭ mơnong.

Ơi Nguyễn Quang Đức, Khua anom bruă pơjrao brơi hlô rông tơring glông Čư̆ Mgar brơi thâo, ră anai gơnong bruă hơmâo pơphun tlâ̆o brơi vaccine kơ hlô rông, laih dong gum hrŏm hăng gong gai ƀon lan pơdong lu anih wai pơgang, pơtrut bruă wai lăng mơng čuh hơtă, pơgŭ pơgiăng, sĭ mơdrô hlô mơnong amăng ƀon lan.

“Lơ̆m klin hơđuh đĭ amăng ƀon lan, Anom bruă pơgang hlô rông hăng Anom bruă ngă hmua hăng pơđĭ kyar ƀon lan tơring glông hơmâo ngă tui hơdôm hơdră pơgang ječ kiăng kơ pruih ia jrao, tlâ̆o vaccine pơgang kman bơbrah ƀơi klĭ rơmô kơbao. Truh ră anai klin kman dưi pơgang hĭ laih. Lơ̆m hmư̆ hing tui anun, anom bruă amra nao pel ĕp, pơgang hĭ hơdôm anih hơđuh đĭ klin, mă drah ba glăi pơčrang lăng. Lơ̆m glăk dŏ tơguăn pơčrang lăng mơng hơdôm anom bruă. Lơ̆m anun tơdah ƀuh hlô rông djai amra pơrai hĭ. Tơdah ƀuh ƀă klin kman amra hơmâo hơdră pơgang ječ hăng lăi pơthâo brơi kơ gong gai ƀon lan”.

Siu Đoan: Pơblang