VOV4.Jarai - Ƀơi anăp hơdôm tơlơi pơplih mơng ayuh hyiăng ƀu hơđong, mơnuih ngă đang hmua tơring čar Daknông gơgrong hlâo pơplih djuai pơjeh pla, hlô rông, djru bruă ngă đang hmua hơđong, ba glăi bôh tơhnal bơwih ƀong prong hloh. Tui hăng ơi Nguyễn Thiện Chân, Kơ-iăng Khua Anom pơđĭ kyar bruă đang hmua tơring čar, hơdôm lŏn tơjŭ pla hmâo pơplih biă ñu ƀơi hơdôm bôh tơring glông amra kơƀah ia, phang khôt kah hăng Tuy Đức, Čư̆ Jut, Krông Nô, Dak Mil. Ƀơi hơdôm kual lŏn hmua ia pơplih, neh wa dưi hmâo hơdôm gơnong bruă đang hmua djru, pơtô brơi hơdră ngă đang hmua djơ̆ hơdră. Abih bang lŏn pơplih dưi hmâo mơnuih ƀôn sang pla hơdôm phun pla ƀiă hrơi ba glăi bôh tŭ yua prong. Ră anai, Gơnong bruă đang hmua hăng pơđĭ kyar ƀôn lan glăk pơphô brơi kơ Jơnum min mơnuih ƀôn sang tơring čar mă yua Kơčăo bruă hăng mơnuih pơplih hơdră phun pla ƀơi lŏn ngă hmua pơdai hlâo adih mơng thun 2021-2025 hăng pơsit jơlan gah truh thun 2030./.

Siu H’ Prăk: Pô pơblang