VOV4.Jarai - Yua ayuh hyiăng ƀuh lăp, phun boh ñong ƀơi Gia Lai thun anai ƀu mơboh đơi ôh. Ƀoh ñông ƀu mơboh, nua hai trun mơn, ngă kơ ƀing pla boh ñông hrŏ huač amăng dua tơlơi mơtăm. Hoàng Qui, pô hyu mă tơlơi pơhing phrâo mơng Gong phun jua pơhiăp dêh čar Việt Nam ƀơi kual Dap Kơdư lăi nao tơlơi hơmâo sit ƀơi tơring glông Ia Grai, anih pla boh ñông prong mơng tơring čar Gia Lai.

Yang hrơi dong pơ-iă hang, sang anŏ amai Rcŏm Thu, plơi Krái, să Ia Khai, tơring glông Ia Grai, tơring čar Gia Lai hrŏm hăng sa, dua čô kông ñơn dŏ duñ boh ñông. Amai Thu brơi thâo, thun hlâo sang anŏ hơmâo pơhrui glăi 100 klăk prăk mơng 3 ektar đang boh ñông, samơ̆ thun anai, prăk pơhrui glăi teng ngeng ha mơkrah mrô anun đôč yua hơmâo hlăt ƀong lu đơi lơ̆m boh glăk mơđa, jing bih ñông ƀu hơmâo đơi dong tah:

“Thun anai, tơdah huăi hơmâo hlăt ƀong lĕ phun ñông mơboh biă, yua dah hơmâo bơnga lu biă. Khă hnun, khŏm pruai kmơk, pruih jrao hlăt djŏp kah boh mơda ñu huăi hlung. Tơdah hơmâo jrao pruih hlăt djŏp, trơ̆i čơkăp than hơmâo hlăt hăng than ƀơi krô lĕ ta koh hĭ hlao đah mơng huăi ƀă hyu kơ phun pơkŏn, tui anun jing klă biă. Ră anai mơnuih ngă hmua gơmơi tơnap tap biă mă, čang rơmang kơnuk kơna ta djru pơtô brơi hơdră pơdjai hlăt kman”.

Mơnuih ƀon sang să Ia Khai, tơring glông Ia Grai, tơring čar Gia Lai pĕ boh ñông.

Hrŏm hăng să Ia Khai, sang anŏ ơi Ksor Huôn ăt glăk dŏ pĕ 3 ektar boh ñông mơn. Ơi Huôn brơi thâo, yua hlăt pơčrăm lu đơi, pơjeh boh ñông anet, sat biă, yua hnun sĭ rơgêh mơn. Mơng akŏ bơyan truh ră anai, sang anŏ ñu kơnong sĭ hơmâo mơng 22 truh 25 rơbâo prăk đôč lơ̆m sa kg, bơ thun hlâo adih, nua rơgêh biă mă ñu 30 rơbâo prăk.

“Thun anai boh ñông ƀu mơboh, nua rơgêh biă mă pơhmu hăng thun hlâo, gơmơi čang rơmang kơnuk kơna ta lăng ba hloh kơ bruă ngă hmua kiăng neh met wa bơwih ƀong đĭ đăi ƀiă”.

Bơyan boh ñông thun anai him lăng ƀu hơmâo đơi ôh pơhmu hăng thun 2020.

Boh ñông ƀu mơboh, mơnuih ngă hmua ƀu hơmâo prăk, ƀing hyu mơdrô ƀu hơmâo gơnam ba sĭ mơn. Yă Phạm Thị Thúy, pô juăt hyu blơi boh ñông ƀơi tơring glông Ia Grai brơi thâo:

“Thun anai boh ñông ƀu hiam ôh yua hơjan hlim ƀu lăp, hơmâo hlăt ƀong yua hơmâo ia ngôm ƀơi phun pla, boh ñong sat biă, blơi aset hloh kơ rim thun, nua ăt truh mơn yua pơjeh boh ñông ƀu hiam, rim thun amăng bơyan anai kâo hyu blơi hơmâo hơdôm tơn ƀơ̆i lơ̆m ha hrơi, thun anai hơmâo aset biă, hơmâo 1/3 pơhmu hăng rim thun đôč”.

Tui hăng yă Nguyễn Thị Mai Lượng, Khua Jơnum min mơnuih ƀon sang să Ia Khai, să hơmâo kual pla boh ñông prong hloh ƀơi tơring glông Ia Grai, hăng rơbêh 1000 ektar. Hơdôm thun rơgao, phun boh ñông hiam, mơboh lu mơn, jing hơmâo prăk lu mơn. Samơ̆ adai ƀu lăp tui ră anai, mơnuih pla boh ñông jing ƀu hơmâo ƀong đơi dong tah. Tơlơi anai khŏm kiăng hơmâo hơdră djru ba djuai phun pla phun djru lŏm lui tơlơi rin rơpa ƀơi tơring glông anai:

“Bruă lŏm lui tơlơi rin rơpa ƀơi să gơmơi anai ăt gơnang kơ phun boh ñông mơn, jing rơkâo kơ gong gai hơmâo hơdră djru ba phrâo, lăng ba hloh dong anih pla phun boh ñông, čang rơmang hơmâo gơnam djă anăn OCOP kiăng boh ñông să Ia Khai hmư̆ hing”

Hoàng Qui: Čih - Siu H’Mai: Pơblang