VOV4.Jarai-Tui hăng anom bruă wai lăng čem rông hăng pơjrao hlô mơnong tơring čar Gia Lai, truh  3 mông tlam lơ 7/9, đơ đam tơring čar hơmâo 15 rơbâo rơmô dưi pơjrao hlao laih klin ngă bơbrah bil bul ƀơi klĭ. Mơ̆ng hrơi hơmâo klin, truh ră anai Gia Lai hơmâo rơbêh 20 rơbâo drơi rơmô mơ̆ng 12 rơbâo sang anŏ hơmâo rơmô ƀă klin. Amăng anun 2 rơbâo drơi djai hăng ba dor ƀudah čuh pơrai lui soh sel. Tơhan djop anom bruă kơnuk kơna hrom hăng mơnuih ƀôn sang djop plơi pla pơjrao hlao laih giăm 15 rơbâo drơi rơmô.

Pruih ia jrao pơdjai kman amăng war rơmô

Hơmâo 34 boh să, 9 boh tơring glông, plơi prong hơmâo klin amăng rơmô kơbao hlô mơnong rông, amăng anun 3 boh să Adơk, să Trang, să Ia Băng, tơring glông Đak Đoa arăng pơsit abih klin laih. Tui hăng anom bruă wai lăng cêm rông hăng pơjrao hlô mơnong tơring čar Gia Lai, kiăng hơmâo boh tơhnal klă hiam anai, anom bruă ngă hmua hăng pơđĭ kyar plơi pla tơring čar Gia Lai ngă tui sa hnong lu hơdră, pơhlôm, pơgang klin ngă bơbrah čơđeh asar ƀơi klĭ hrơi blan rơgao.

Nay Jek: Pơblang