VOV4.Jarai - Sa anih klin ngă bơbrah klĭ bô̆ đĭ khil khul ƀơi rơmô, kơbao hmâo laih ƀơi să Đak Djrăng, tơring glông Mang Yang, tơring čar Gialai. Rơđah biă ñu, lơ 28/5, hmâo 19 drơi rơmô mơng 12 bôh sang anô̆ mơnuih ƀôn sang ƀơi plơi Brếp hăng Đê Rơn (să Đak Djrăng, tơring glông Mang Yang) hmâo hơdôm anô̆ brơi ƀuh bơbrah adung hmâo ia rơnah, mơta hmâo eh mơta, hmâo hơdôm tlâ̆o brô̆ đĭ ƀơi akô̆, hlung, tơkai, ƀơi ao rơmô, pơ-iă 40 đô̆ C hăng ƀong ƀiă. Anom wai lăng bruă rông hlô hăng bruă ia jrao hlô mơnong tơring čar Gialai hmâo mă laih drah hlô mơ-ĭt kơ Anom bruă ia jrao hlô mơnong kual mrô 5 pioh pơčrang lăng. Lơ 31/5, bôh tơhnal pơčrang lăng brơi ƀuh, hmâo 2 čơđeh drah ƀă kơman ngă bơbrah klĭ. Čơtlăm lơ 1/6, abih bang mrô rơmô hmâo anô̆ pơdah gah rơngiao đĭ truh laih 27 drơi, ƀơi 20 bôh sang anô̆. Gong gai plơi pla hmâo lăi pơthâo kual klin ruă ngă bơbrah klĭ ƀơi rơmô kơbao lĕ să Đak Djrăng; să hmâo pok pơhai laih hơdôm bruă mă tañ kiăng ngă plai ƀiă lar tưp hyu, bơdjơ̆ nao anô̆ pơhlôm mơng pŭ hlô rông.

Klin tưp ƀơi hlô mơnong amăng tơring čar Kontum glăk tŏ tui ngă djai lu hlô mơnong kơ mơnuih ƀon sang. Ƀơi dua boh să giăm guai Đăk Nhoong hăng Đăk Plô tơring glông Đăk Glei tơring čar Kontum ră anai hơmâo giăm 200 drơi kơbao, rơmô djai yua kơ ƀă klin tụ hyuết trùng. Ơi A Man, Kơ-iăng khua jơnum min mơnuih ƀon sang să Đak Plô, tơring glông Đăk Glei tơring čar Kontum brơi thâo, dong mơng lơ 11 truh lơ 31/5 ƀơi 3 ƀut plơi amăng să, hơmâo: Đăk Book, Pêng Lang hăng Bung Tôn hơmâo 69 drơi kơbao, rơmô djai laih anun hơmâo gong gai pơtrut pơsur mơnuih ƀon sang pơrai hĭ mơtăm. Ba truh bruă kơbao, rơmô djai hơmâo anom bruă ngă hmua tơring glông pơsit lĕ yua klin tưp (tụ huyết trùng). Ƀơi anăp kơ lu kơbao rơmô djai, gong gai să hơmâo pơsur mơnuih ƀon sang krư̆ hlô mơnong amăng drông war, tlâ̆o ia jrao samơ̆ rơmô kơbâo ăt djai mơn. Ƀơi tơring čar Kontum klin tưp ƀơi hlô mơnong glăk ngă tơnap tap hăng ngă djai lu kơbao rơmô. Ră anai, hrŏm hăng anih hơđuh đĭ klin ngă 200 drơi kơbao rơmô djua ƀơi 2 boh să giăm guai Đăk Nhoong hăng Đăk Plô tơring glông Đăk Glei, anom bruă wai pơgang hlô mơnong tơring čar ăt ƀuh kman ƀong ƀơi klĭ rơmô ƀơi 3 boh tơring glông: Kon Plông, Sa Thầy hăng Ia H’Drai. Laih dong klin pơtah čroh ăt hŭi rơhyưt mơn amra hơđuh đĭ ƀu hmao thâo.

Siu H’ Prăk-Siu Đoan: Pô pơblang