VOV4.Jarai - Ƀơi tơring čar Lâm Đồng, klin Covid-19 dưi pơgang hĭ laih, nua sĭ mơdrô sa, dua gơnam anun lĕ añăm tam, bơnga glăk đĭ tui, mơnuih ngă hmua ƀơi Đà Lạt glăk đing nao tuh pơ alin hơkrŭ glăi bruă bơwih ƀong huă.

Tơdơi kơ hrơi blan tơnap tap amăng bơwih ƀong huă yua kơ nua sĭ mơdrô lu gơnam đang hmua hrŏ trun kơtang, lu đang pla añăm, bơnga ƀơi Đà Lạt hăng hơdôm kual jum dar amăng tơring čar Lâm Đồng glăk hơkrŭ glăi bruă bơwih ƀong huă, pơphun pla glăi kiăng kơ hơmâo djop gơnam tam ba sĭ mơdrô. Yă Nguyễn Thị Thu, dŏ ƀơi phường 8, plơi prong Đà lạt brơi thâo, yua klin glăk ƀơƀrư̆ pơgang hĭ, bruă pơgiăng hyu gơnam tam đang hmua amuñ ƀiă yơh yua anun sa, dua gơnam mơng đang hmua đĭ nua glăi, amăng anun hơmâo añăm sa lač đĭ nua kơtang pơhmu hăng hlâo anun. Yua anun ñu hăng lu sang anŏ pơkŏn amăng phường glăk ječ ameč pla glăi kiăng kơ djop añăm sĭ brơi arăng.

“Phrâo anai ƀu hơmâo añăm ba nao sĭ ôh, añăm sa lač đĭ nua truh pơ 1.000 prăk sa phun. Ră anai nua sĭ pơwŏt glăi mơng 600 truh pơ 800 prăk sa phun pơhmu hăng hơdôm hrơi aka ƀu hơmâo klin Covid-19. Hơdôm blan laih rơgao mơnuih ƀon sang pla ƀiă đôč yua kơ sĭ ƀu hơmâo nua hăng ƀu dưi ba hyu sĭ, ră anai nua añăm đĭ laih yua anun mơnuih ƀon sang pơwŏt glăi pla. Sit biă ñu ră anai añăm glăk pơmă, mơnuih ƀon sang hok mơ-ak luh nao pla glăi”.

Đĭ nua, mơnuih ƀon sang glăk pruih ia jrao brơi phun bơnga cúc brơi hiam hlâo ba sĭ mơdrô

Ƀu djơ̆ kơnong añăm tam, mơ̆ bơnga cúc ƀơi Đà Lạt ăt đĭ nua glăi mơn truh pơ 30.000 prăk sang čơnă bơnga cúc lưới, 15.000 prăk sa čơnă bơnga cúc hơđăp. Hăng nua sĭ ră anai, rĭm ar đang pla bơnga cúc kơ mơnuih ƀon sang dưi pơhrui glăi 40.000 prăk. Tui hăng ơi Nguyễn Đình Thuận, dŏ ƀơi phường 7, plơi prong Đà Lạt, yua kơ sui hrơi tơnap tap amăng bơwih ƀong sĭ mơdrô, bơnga ba hyu sĭ ƀu djop yua anun sa, dua añăm tam, bơnga amra đĭ nua kơtang, bruă lu mơnuih luh nao pla glăi amra ngă kơ gơnam pla pơjing lu đơi mơng anun ngă rơbêh, amra ba truh tơlơi tơnap tap, samơ̆ lơ̆m klin glăk pơgang hĭ hăng tơlơi hơdip glăk hơđong tui ră anai, ñu ăt čang rơmang bruă bơwih ƀong sĭ mơdrô amra ba glăi tŭ yua amăng bơyan pơ anăp anai. Ơi Nguyễn Đình Thuận brơi thâo.

“Hăng nua sĭ bơnga cúc ră anai mơnuih ngă hmua amra pơhrui glăi hơmâo hmăi. Tui tơđar thun hlâo bơnga cúc glăk sĭ nua 40.000 prăk mơn, thun anai yua kơ klin COvid-19 ngă bơnga hrŏ trun. Bruă sĭ mơdrô ră anai ăt aka ƀu thâo hiưm pă ôh, ră anai hơdôm đang hmua pla bơnga cúc đôč sĭ hơmâo nua mơ̆ hơdôm djuai bơnga pơkŏn ăt buč hĭ abih yơh”.

Hơmâo thâo, kiăng kơ djru brơi mơnuih ngă hmua, anom bơwih ƀong sĭ mơdrô, gơnong bruă ngă hmua tơring čar Lâm Đồng glăk pơsur pok hơdôm plang pơhing điện tư̆ sĭ mơdrô “Gơnong đang hmua tơring čar Lâm Đồng” rơwang thun 2021-2025. Tui anun, gơnam đang hmua djop mơta glăk amăng bơyan pla ƀudah pơhrui amra ba nao lăi pơthâo kiăng kơ lu mơnuih thâo, pơgôp ngă hơđong bruă sĭ gơnam đang hmua kơ mơnuih ƀon sang.

Siu Đoan: Pơblang