Laih anun mơnong ƀong huă đưm kual dap kơdư amăng anun khom lăi nao bu mơsăm ƀudah añăm tơpung riă hăng braih hơmâo ia mơsăm.

Bu mơsăm kah hăng anăn ñu arăng iâu, ƀong ñu mơsăm, ƀâo bơngưi kah hăng tơpơi ia tơpai čeh đưm. Ñu phara hăng mơnong ƀong pơkŏn kah hăng koč, asơi brông, mơnong mơnŭ ăm, pơhang ƀơi a apui ...arăng juâ̆t pơjing amăng mông ngă yang ngui ngor lu mơnuih amăng plơi pla, bu mơsăm lĕ mơnong ƀong juâ̆t laih hăng djop sang anŏ mơnuih ƀôn sang K'Ho. Gơñu riă bu mơsăm pioh ƀong rĭm hrơi, djă ba nao pơ hmua pơdai, hyu amăng glai klô ƀong mơñum pơhrua ia. Tui hăng yă K'Bri, dŏ pơ but plơi Kon Tač Đăng, tơring kual Đinh Văn, tơring glông Lâm Hà, tơring čar Lâm Đồng, gơnam či riă bu mơsăm lĕ amuñ mơ̆n, anun lĕ djop mơta braih dưi soh. Yă K'Bri brơi thâo:

“Riă bu ngă mơsăm lĕ braih hơgĕt tŭ mơ̆n, braih pơdai hmua  hang, braih hmua ia braih di ƀudah braih kơtor. Tơdah braih đôč đač tơđar lĕ arăng ruah mă braih asơi bơbrai huăi ƀlit, asơi khăng ƀiă. Samơ̆ jơman hloh ăt jing braih pơdai hmua hang”.

Kiăng riă pơjing bu mơsăm čăo ngă mơsăm lĕ arăng mă braih riă jing bu mơ-ia. Hlâo kơ riă, pleč braih, ƀupleč tong ten đơi ôh yua dah pleč lu đơi ñu rơngiă hĭ braih. Giong anun arăng riă amăng gŏ drŏng amăng apui ƀơi tơpur. Kiăng kơ hơmâo bu či ngă čăo mơsăm hă arăng riă kiăp tơsă đôč, ta dưi ƀong, anăm riă tơl lik ôh, yua dah pơđăm ngă čăo bu mơsăm ñu mơ-ia hĭ.

Čăo giong ta riă ƀu dưm nao ia rơmă, tơpung ƀâo bơngưi pơpă ôh, riă giong lui rơ-ơ̆, giong anun tuah dưm amăng uah gêt krô, truă kơnăp sir. Laih anun arăng mă yôl ƀơi pra apui, lui hnun 1,2 hrơi bu anun jing čăo mơsăm yơh. Yă K’Bri lăi nao kơ hơdră arăng tơnă riă bu ngă mơsăm:

“Tă riă bu brơi ñu kiăp tơsă đôč, čăo ta amra jơman sit ngă mơsăm. Anăm ruă ñu ih đơi ôh. Juâ̆t ñu 1,2 hrơi pioh lui čăo amra mơsăm yơh. Kiăng dưi hơmâo čăo mơsăm tơdơi kơ riă giong ta tuah dưm čăo anun amăng uah gêt krô hơmâo hơkăt truă sir hĭ giong anun yôl ƀơi pra apui”.

Lăi nao anŏ ƀong hrom, yă K’Bri brơi thâo, bu mơsăm ta dưi ƀong hăng djop mơta mơnong ƀong pơkŏn. Tui hluai anih anom, mông gêh găl laih anun tui hluai anŏ kiăng mơ̆ng rĭm čô mơnuih ƀong, arăng amra mă ƀong lŭk hăng gơnam hơgĕt gơñu či kiăng. Yă brơi thâo dơ̆ng:

“Ta dưi ƀong hrom djop mơta añăm rơ̆k, añăm mơnong...samơ̆ jơman hloh hăng djơ̆ hrom biă ñu lĕ ƀong hăng mơnong akan krô, akan k’hŭl ăm laih anun sô̆ tul hăng pơhăng mơtah asăt”.

Djuai ania K’Ho juâ̆t pơmin lĕ bu mơsăm jing mơnong ƀong hơmâo pran, ƀu dưi kơƀah ôh. Djuai bu anai, anŏ mơsăm tŭ yua djop mơta, arăng pioh mơñum kiăng huăi khôt rơkông đok kơƀah ia tơdơi kơ mă bruă ngă hmua amăng adai pơđiă kơtang bơyan phang. Hrom hăng anun, bu mơsăm jing mơnong ƀong juâ̆t laih hăng mơnuih ƀôn sang djuai ania K’Ho. Anun lĕ, gru grua hiam, mơnong ƀong huă hơmâo pơkra ming mơ̆ng đưm đă pioh glăi lu rơnuk hăng anai. Ƀing tuai rơnguai nao pơ Lâm Đồng sit mơ̆n dưi nao ĕp ƀong lông lăng bu ƀudah čăo mơsăm kiăng thâo rơđah tong ten anŏ jơman, anŏ hiam ñu lơ̆m ta ƀong mơñum ngă hlao anŏ khôt rơkông đok kơƀah ia ƀudah ƀong hrom mơnong ƀong pơkŏn jơman hloh.