Hrŏm hăng anun, amăng tal ngui kơphê Buôn Ma Thuột tal 8 pơ anăp anai, hơdôm bruă đĭ rơman, luai ia, đă boh lông ăt ƀu hơmâo pơphun dong tah. Tui lăi pơthâo mơng anom bruă bơwih brơi tuai čuă ngui hăng sang jưh tuai Biệt Điện (ƀơi plơi prong Buôn Ma Thuột, Dak Lak), mơng lơ 10/2, anom bruă sit nik lui hĭ bruă đĭ rơman ƀơi anih bơwih brơi tuai čuă ngui Cầu Treo Buôn Đôn ƀơi să Krông Na, tơring glông Buôn Đôn; plih hĭ hăng hơdôm tơlơi ngui tui gru grua ƀon lan pơlir hăng  hơdôm bruă jê̆ giăm hăng rơman anun lĕ brơi rơman ngui hrŏm hăng tuai.

Tơlơi pơsit anai kiăng ngă tui tơlơi črâo trun mơng tơring čar Dak Lak kơ bruă lui hĭ đĭ rơman amăng bơwih brơi tuai čuă ngui kiăng pơgang brơi kơ rơman amăng tơring čar, amăng jơlan hơdră anai Ngui hrŏm rơman amăng Buôn Đôn - sa amăng hơdôm bruă mơng ngui kơphê Buôn Ma Thuột tal 8, thun 2023 pơphun amăng blan 3 pơ anăp ƀơi Dak Lak, amra ƀu hơmâo hơdôm bruă anun lĕ: rơman pơplông, rơman luai ia, rơman đă boh lông, rơman pơdui hăng mơnuih. Plih hĭ lĕ amra pơphun mông ngă yang rơkâo tơlơi suaih pral brơi rơman, mông ƀong huă buffet, ngă hiam brơi kơ rơman, rơman čơkă tuai, brơi rơmah bưp, phĭn rup hăng tuai čuă ngui…