Mơnuih djuai ania Mnông Rlăm ƀơi tơring glông Lăk, tơring čar Dak Lăk juăt pơphun ngui thun tha lơ̆m amĭ ama gơñu rơbêh 60 thun, kiăng pơƀuh pran jua khăp ƀu-eng kơ amĭ ama. Hrơi ngui thun tha juăt pơphun amăng blan 1 truh blan 2 rim thun, tơdơi kơ puih bơyan pơdai kơtơr. Tui hăng pô phai yang Y Krai Čil, ƀơi ƀuôn Jiê Yuk, să Dak Phơi, tơring glông Lăk, đưm hlâo, ană kơčua đah kơmơi jing mơnuih ngă yang thun tha brơi amĭ ama, samơ̆ rơnuk anai abih bang ană bă amăng sang lêng kơ ngui hrŏm hăng amĭ ama soh. Tơlơi ngă yang ngui tha mơng djuai ania Mnông Rlăm nao hrŏm hăng bruă ngă yang, pơyơr gơnam. Gơnam hơmâo pơyơr amăng hrơi ngui thun tha lĕ sa drơi bui ƀudah mơnŭ, 3 mŏng asơi, sa boh get ia krô, laih anun ƀu dưi kơƀah ôh tơpai čeh, tơpai anai yơh brơi yang mơñum. Pô phai Y Krai Čil brơi thâo:

“Ƀing tha mơng 70 truh 80 thun juăt hơmâo ngă yang ngui thun tha. Juăt ngă yang hăng mơnŭ, tơpai, bui. Lơ̆m abih bang gơnam hơmâo pơdă lĕ kâo phai yang yơh. Pô phai iâu yang čư̆, yang ia, yang glai glăi lăng hrơi ngui ngor anai”.

Lơ̆m amăng plơi hơmâo sang anŏ pơphun ngă yang anai, mơng mơguah mơtăm, neh met wa amăng plơi nao djru, đa ngă bruă anai đa ngă bruă adih, ƀing đah rơkơi juăt prăp lui tơpai čeh, ƀing đah kơmơi pleh añăm hla rok, nao sô̆ ia, djru hơtuk rơyă brơi sang anŏ djŏp mơta añăm ƀong jơman. Amăng hrơi ngui thun tha mơng djuai ania Mnông Rlăm hơmâo djŏp mơnuih amăng sang anŏ wơ̆t hăng kơnung djuai plơi jê̆ plơi ataih. Anai jing hrơi kiăng abih bang bơbưp nao rai, ră ruai kơ bruă mă, bơwih ƀong, pơtrut pran jua, gum pơgôp, djă pioh gru hiam mơng djuai ania pô, pơtô, pơtă pơtăn kiăng ngă tui tơlơi phiăn kơnuk kơna ta, laih anun kiăng hơmâo tơlơi hiam kơ sang anŏ pô ngă yang ngui thun tha. Pô phai yang Y Krai Čil, ƀơi ƀuôn Jiê Yuk, să Dak Phơi, tơring glông Lăk, tơring čar Dak Lăk brơi thâo dong:

“Lơ̆m pơphun ngă yang ngui thun tha, neh met wa rơkâo kiăng pô hơmâo ngă yang ngui tom hiam drơi jăn pran jua, hơdip sui hăng ană tơčô, ngă pô ba jơlan pơtô brơi ană tơčô bơwih ƀong, laih anun pơtă kơ ană tơčô gir hrăm hră kiăng tơlơi hơdip hiam hloh, akŏ pơdong plơi pla jai hrơi pơdrong asah klă hiam hloh”.

Lơ̆m phai Yang, mơnuih hơmâo ngă yang djă đing mơñum tơpai laih anun rơkâo kiăng Yang lăng ba, brơi hơmâo bưng, hơmâo tơphă kơ pô ñu, ană tơčô wơ̆t hăng ană plơi. giong anun dong, hrŏm hăng tơlơi hơ-ơč bơni kơ tơlơi ƀă pem čem rông mơng ƀing tha, ană tơčô amra brơi gơnam pơpŭ kơ pô hơmâo ngă yang, hơdôm mơta gơnam hơmâo brơi pơpŭ juăt ñu čeh tơpai, eng ao mơñam, abăn khăn...

Hlâo či pơđut hrơi ngă yang, ơi yă, amĭ ama amra dŏ hrŏm hơmre hăng ană tơčô, pơtă pơtăn kơ ană tơčô, ană plơi pla gir bơwih ƀong, djă pioh lui gru grua hiam mơng djuai ania.

Hrơi ngă yang ngui thun tha mơng djuai ania Mnông Rlăm ƀơi tơring glông Lăk ƀu hơmâo gơnam yôm hơget lơi samơ̆ djă pioh tơlơi yôm biă. Hrơi ngă yang kiăng ană tơčô pơdah pran jua thâo hluh kơ ơi yă, amĭ ama. Anai jing hrơi ngui ngor ƀu thâo lui ôh amăng tơlơi hơdip djuai ania Mnông ƀơi anai, sa gru grua hiam mơng plơi pla.