VOV4.Jarai-Mơguah lơ 20/12 ƀơi Hà Nội, Ding jum bruă hmua hăng pơđĭ kyar plơi pla pơphun jơnum bơkơtuai lăng nao rai amăng tivi, pơtong glăi boh tơhnal ngă tui hăng pơtrut pok pơhư kơčăo bruă ngă hmua rơgơi kơhnâo, bong glăi hăng anŏ pơblih ayuh hyiăng gah Kơčăo bruă anăn pơblih hơdră ngă hmua hơmâo ia bruih.

Jơnum bơkơtuai bruă ngă hmua rơgơi bong glăi anŏ pơblih ayuh hyiăng

Tơdơi kơ 6 thun pok pơhai, kơčăo bruă anai hơmâo djru hrom ngă pơblih bruă ngă hmua hơmâo ia bruih djop 93 rơbâo ha amăng 7 boh tơring čar, ƀôn prong amăng dêh čar. Kơčăo bruă anai hơmâo pơkra brơi 49 hơbô̆ bruă ngă hmua rơgơi bong glăi hăng anŏ pơblih ayuh hyiăng kah hăng hmua pơdah, hmua pla añăm pơtam, boh troh hăng kyâo pơtâo sui thun.

Tui hăng Kơ-iăng Khua Ding jum ngă hmua hăng pơđĭ kyar plơi pla ơi Lê Quốc Doanh, hơdôm boh tơhnal dưi ngă laih hơmâo pơgôp hrom yôm biă mă boh tŭ yua kơ kơčăo bruă pơblih hơdră ngă hmua pla pơjing kah hăng hơdră pok pơhai ngă bơnư̆ pơkong ia truh thun 2030 hăng lăng nao pơ thun 2050.

Nay Jek: Pơblang