VOV4.Jarai - Gong gai hăng anom bruă ngă hmua tơring Kon Tum ăt gir pơgang kơƀah ia kơ phun pla. Ƀơi să gah guai lŏn ia Rờ Kơi, tơring glông Sa Thâỳ, tơring čar Kon Tum hơmâo 70 ektar hmua pơdai ia bơyan Puih - Phang hrŏm hăng rơbêh 2.000 ektar đang pla phun sui thun. Kiăng pơhlôm ia pruih kơ đơ đam lŏn ngă hmua anai, să hơmâo 9 ring bruă dơnao kŏng ia, lu biă mă ñu lĕ bơnư̆ kŏng ia blai đĭ. Gong gai să hơmâo akŏ pơdong 8 grup wai lăng bruă mă yua ia ƀơi hơdôm bơnư̆ kŏng ia đah mơng yua ia pơkrem ƀiă.

Prăp lui hlâo ia pruih kơ phun pla amăng bơyan không phang ƀơi Đăk Hà.

Tar ƀar tơring čar Kon Tum ră anai hơmâo 178 ring bruă pơkra dơnao kŏng ia, pơhlôm ia pruih kơ rơbêh 11.000 ektar phun pla, lu biă ñu lĕ phun pơdai hăng phun pla sui thun. Truh rơnuč blan 3 hăng akŏ blan 4 lĕ amra kơƀah ia ƀơi 1.000 ektar đang hmua ƀơi hơdôm boh tơring glông Sa Thầy, Đăk Hà, Kon Braih hăng plơi prong Kon Tum.

Siu H’Mai: Pơblang