VOV4.Jarai -  Ngă tui tơhnal pơkă pla phrâo 15.000 ektar dlai kyâu mơ̆ Tơlơi pơtrun pơsit Jơnum Ping gah tơring čar Kontum tal 16, rơwang bruă 2020-2025 ba tơbiă, truh abih ha mơkrah blan 9 phrâo rơgao, đơ đam tơring čar Kontum hmâo pla phrâo rơbêh kơ 3.600 ektar đang kyâu, hloh kơ 600 ektar bơhmu hăng kơčăo bruă ba tơbiă amăng thun anai. Amăng rơbêh kơ 3.600 ektar pla phrâo mơng tơring čar Kontum, plơi prong Kontum lĕ anih anom ba jơlan hlâo pla hmâo rơbêh kơ 900 ektar.

Keh prăk pơgang hăng pơlar dlai klô tơring čar Kontum djru pơjeh hngô kơ mơnuih ƀôn sang să Văn Lem, tơring glông Đăk Tô

Hơdôm bôh tơring glông dô̆ glăi abih bang leng kơ djơ̆ hăng pla hloh kơ mrô lŏn pơkă. Kiăng dưi pla kyâu dlai, gong gai hơdôm bôh tơring glông, plơi prong mơng tơring čar Kontum hmâo pơsur laih mơnuih ƀôn sang pla glăi kyâu dlai ƀơi kual lŏn kla, lŏn pla hơbơi plum, ngă hmua pơdai ƀu tŭ yua; pơphun djru pơjeh, pran mă bruă, pơtô brơi bôh thâo kơ mơnuih ƀôn sang; iâu pơhrui khul ling tơhan, mơnuih apăn bruă, mă bruă čar...gum hrom pla kyâu./.

Siu H’ Prăk: Pô pơblang