VOV4.Jarai - Ding jum đang hmua hăng pơđĭ kyar ƀôn lan dêh čar ta phrâo hmâo hră pơ-ar mơ-ĭt kơ Jơnum min mơnuih ƀôn sang hơdôm bôh tơring čar, ƀôn prong kơ kơtưn črâo ba pơđĭ kyar bruă akan hơdang, rông hlô mơnong hơdôm blan rơnuč thun 2021. 6 blan akô̆ thun 2021, abih bang mrô akan hơdang pơhrui hmâo 4 klai 100 klăk dolar Mi, đĭ 13,6% bơhmu hăng thun hlâo. Hơdôm blan rơnuč thun anai, bruă akan hơdang, rông hlô mơnong bŏng glăi hăng lu tơlơi tơnap, tơlơi lông dong: Pơphun amăng bơyan hơjan kơthel, ayuh hyiăng pơplih, amra pơphun hmâo klin ruă; biă ñu tơlơi pơplih tơnap hăng anô̆ huĭ rơhyư̆t mơng klin Covid-19 ngă kơtang đĭ anô̆ tơ̆i đưn hơdôm mơta bruă bơwih ƀong hăng mrô gơnam tam gah bruă rông hlô mơnong, akan hơdang. Ding jum đang hmua hăng pơđĭ kyar ƀôn lan dêh čar ta rơkâo Jơnum min mơnuih ƀôn sang hơdôm bôh tơring čar, ƀôn prong đing nao wai lăng tơlơi bơwih ƀong huă, ngă klă djuai pơjeh, gơnam ƀong huă, pơsir anih anom dô̆; tơlơi kiăng kơ anih anom rông hlô, akan hơdang kiăng pơđĭ kyar djơ̆ tơhnal hmâo ba tơbiă./.

Siu H’ Prăk: Pô pơblang