L

VOV4.Jarai - Yua klin Covid-19 ngă, hrơi blan rơgao, lu mơnuih ngă hmua ƀơi Lâm Đồng tơnap tap yua ba sĭ gơnam ƀu hơđong, ƀu hơmâo mơnuih blơi. Kiăng pơsir tơlơi anai, anom bruă ngă hmua tơring čar Lâm Đồng glăk pơtô brơi neh met wa pơtrut ngă bruă pla añăm pơtăm boh troh tui jơlan lăp djơ̆ hăng tơlơi hơdip dŏ hrŏm hăng klin.

Hơdôm hrơi rơgao, sang anŏ amai Nguyễn Thị Mơ, dŏ ƀơi phường 8, plơi prong Đà Lạt pơƀut rơmet rơmot đang bơnga či pla añăm pơtăm boh troh pĕ pơhrui sui thun. Amai Mơ brơi thâo, yua klin Covid-19 ngă, lu đang pla bơnga ƀu ƀong dong tah, rơngiă prăk biă mă, yua hnun sang anŏ gơñu hơdai pla hăng pơprong arăng iâu ớt chuông hăng sa, dua djuai añăm pơtăm boh troh pơkŏn.

“Mông anai gơnam đĭ nua glăi laih, pla hăng lĕ pĕ lu wơ̆t yua hnun prăk hơmâo lu ƀiă mơn pơhmu hăng phun pơkŏn. Hơdôm mơta gơnam pơkra rơngiă lu prăk mơ̆ pĕ amăng ƀiă hrơi lĕ huač prăk truh kơ 80%, ƀu hơmâo lơi ôh. Bơ hăng lĕ ƀong lơi lu dua wơ̆t mơ̆ hrơi blan ta pĕ ñu sui mơn, jing hơmâo prăk ƀiă. Bơ hăng djuai bơnga kah hăng bơnga cúc, bơnga cẩm chướng phai lu pơ hmua lĕ rơngiă 100% prăk pla”.

Kiăng lăp djơ̆ hăng bruă ngă phrâo, Lâm Đồng pơplih đang pla bơnga jing pla añăm.

Kiăng bruă ngă hmua djơ̆ hăng hrơi blan glăk hơmâo klin Covid-19, anom bruă ngă hmua tơring čar Lâm Đồng hơmâo čih pơkra kơčăo bruă pơphun pơkra gơnam ƀrô djơ̆ tui tơlơi kiăng mơng anih sĭ mơdrô, ƀrô pơhlôm bruă pơkra gơnam hăng prăk pơhrui kơ mơnuih ngă hmua. Tui hăng ơi Nguyễn Văn Châu, Kơ-iăng khua Gơnong bruă ngă hmua hăng pơđĭ kyar plơi pla tơring čar Lâm Đồng, kơčăo bruă anai kiăng črâo brơi jơlan bơwih ƀong klă ƀiă, pơhlôm gơnam ba sĭ hơmâo năng ai 6.800 tơn añăm pơtăm boh troh djŏp mơta amăng ha hrơi. Amăng anun, gơñăm nao pơplih đang pla phun ƀu hơmâo prăk kah hăng bơnga čơkăp than ƀiă hrơi, hơdai pla añăm boh troh djŏp mơta pla amăng ƀiă blan đôč, pla amuñ, pĕ lu wơ̆t hăng dưi pioh sui, ba hyu huăi răm lơi. Ơi Nguyễn Văn Châu brơi thâo:

“2 mơta gơnam bơbeč lu hloh amăng hrơi hơmâo klin Covid-19 lĕ añăm pơtăm boh troh hăng bơnga. Tơring čar hơmâo ngă hrŏm hăng hơdôm tơring glông lăng glăi hăng čih pơkra hơdră ngă bruă pla añăm amăng ƀiă hrơi, samơ̆ ăt kiăng tơjŭ pla djơ̆ tui mrô lŏn hơmâo pơkă mơn. Rim hrơi ba sĭ hơmâo năng ai 6.864 tơn añăm, hơbơi boh troh, hơđong bruă pơkra gơnam kơ mơnuih ƀon sang, laih dong huăi rơngiă prăk ôh. Ƀing gơmơi kiăng pơhrŏ trun ƀiă đang pla añăm ƀong hla, pơplih đang pla bơnga čơkăp than hơdai pla añăm bơwih brơi anih sĭ mơdrô, đah gơnam hơmâo sĭ na nao huăi đut hĭ ôh”.

Hrŏm hăng anun, pơtrut pơsur hăng djru neh met wa pơtruh nao rai pơkra gơnam tui tơlơi rơkâo blơi hlâo đah mơng pơhlôm hơmâo anih sĭ gơnam.

Hrŏm hăng tơlơi črâo ba pơkra gơnam, anom bruă ngă hmua tơring čar Lâm Đồng ăt kiăng hmư̆ hing, him lăng hlâo bruă pơđĭ kyar bơwih ƀong huă, nua blơi...đah mơng djru mơnuih ngă hmua ngă bruă klă hloh, thâo pơmin mă pô. Biă ñu, pơtă hlâo hăng djru brơi neh met wa pơtruh nao rai hăng anom bơwih ƀong, anom ngă ƀong hrŏm HTX kiăng hơmâo anih blơi gơnam hơđong.

Quang Sáng: Čih - Siu H’Mai: Pơblang