VOV4.Jarai-Lâm Đồng hơmâo 5 mơta gơnam sĭ mơdrô ngă hrom mơ̆ng bruă čem rông hlô mơnong hơđong nua, kah hăng : ngă hrom sĭ mơdrô ia tơsâo rơmô asăt, bruă ngă hrom rông un, sĭ mơdrô bruă rông mơnŭ, ngă hrom rông hăng sĭ mơdrô mơnong rơmô laih anun sĭ mơdrô bia hruh hlăt suai mrai.

Kiăng pơđĭ kyar rơnoh sĭ mơdrô ngă hrom anai amăng bruă čem rông hlô mơnong pơkra ming gơnam ƀong huă hăng sĭ mơdrô pơ anih anom sĭ mơdrô prong, tơring čar Lâm Đồng hơmâo ngă gêh gal kơ anom bruă, mơnuih ƀôn sang pơkra ming gơnam sĭ mơdrô, čem rông hlô mơnong, kơtưn pơtruh nao rai hăng anih anom sĭ mơdrô hăng sĭ mơdrô čem rông hlô môñg kah hăng sang anŏ rông rơmô pioh sĭ mơnong mơ̆ng HTX Võ Thị Xoan ngă hrom 60 boh sang anŏ rông 600 drơi rơmô, sa thun sĭ mơdrô 200 tơn rơmô hơdip. Kông ty mơnuih ƀôn sang ngă pô Ba Minh ngă hrom sang bruă pla phun kơbuă rông hlăt suai mrai mơ̆ng 50 boh sang anŏ ƀơi Lâm Hà, Đức Trọng, Dam Rông, đơ đam pla 23 ha, dưm amăng 1000 kơthung rông hlăt suai mrai, sa thun sĭ 40 tơn hruh hlăt suai mrai, ba nao pơ anih sĭ mơdrô hơđong tui hră kĭ pơkôl sĭ mơdrô.

Nay Jek: Pơblang