VOV4.Jarai - Rơnuč thun 2020, nua sĭ eh hlăt mrai amăng tơring čar Lâm Đồng sĭ mơng 110 truh pơ 120 rơbâo prăk sa kĭ, samơ̆ truh ră anai, nua sĭ eh hlăt mrai mơng 180 rơbâo prăk sa kĭ. Anai lĕ tơlơi lăi pơthâo mơng sa, dua anom bruă rông hlăt mrai, sĭ mơdrô hlăt mrai amăng tơring čar brơi thâo: Nua eh hlăt mrai đĭ glăi lĕ yua bruă sĭ mơdrô hlăt mrai glăk gêh gal. Sa, dua boh dêh čar glăk ƀơƀrư̆ pok amăng jang kiăng kơ amuñ sĭ mơdrô gơnam tam, hơdôm anom bơwih ƀong sĭ mơdrô amăng tơring čar ăt glăk hơmâo arăng rơkâo blơi lu tui. Nua sĭ eh hlăt mrai đĭ, ngă kơ mơnuih ngă hmua hơđong amăng bruă tuh pơ alin bơwih ƀong huă, pok prong bruă rông hlăt mrai, pơtrut pơđĭ kyar tơlơi bơwih ƀong huă amăng sang anŏ. Amăng tơring čar Lâm Đồng ră anai hơmâo giăm 15 rơbâo boh sang anŏ rông hlăt mrai, amăng rơbêh 8.700 ektar hmua pla phun kơbuă, truh pơ 70% hmua pla phun kơbuă rông hlăt mrai đơ đam dêh čar; hăng 57 anom bơwih ƀong hrŏm hăng 5 plơi pla phun kơbuă rông hlăt mrai.

Siu Đoan: Pơblang