VOV4.Jarai - Gơnong bruă đang hmua hăng pơđĭ kyar ƀôn lan tơring čar Lâm Đồng brơi thâo glăk ngă tui kiăng pơđĭ kyar bruă đang hmua hơdjă mơng thun 2020-2025 hăng tơhnal pơkă pơlar lŏn pla hơdjă hmâo năng ai ñu 1.600 ektar. Lâm Đồng ră anai lĕ anih anom ba jơlan hlâo amăng đơ đam dêh čar ta gah ngă đang hmua mă yua bôh thâo phrâo hăng pơđĭ kyar đang hmua tui hơdră phrâo. Amăng anun, đang hmua tui bôh thâo phrâo hmâo giăm truh 62.000 ektar. Bruă đang hmua mă yua hơdră phrâo hmâo năng ai ñu 50 ektar đang añăm pla hăng dlông ia hăng 195 ektar mă yua bôh thâo phrâo mă yua măi mok gah ayuh hyiăng, pơsah, wai lăng mơnong ngă bơbuă. Bruă đang hmua mă yua bôh thâo phrâo ƀơi tơring čar hmâo nua hơnong ñu 180 klăk prăk sa ektar, sa thun. Biă ñu, lŏn pla añăm mă yua măi mok phrâo mơng 400-500 klăk prăk sa ektar, sa thun, pla rai bơnga hmâo mơng 800 klăk – 1 klai 200 klăk prăk sa ektar, sa thun./.

Siu H’ Prăk: Pô pơblang