VOV4.Jarai - Tơdơi kơ hrơi blan hrŏ nua kơtang, nua sĭ suai mrai amăng tơring čar Lâm Đồng đĭ glăi dong, neh met wa pla phun kơbuă rông hlăt mrai hok mơ-ak biă mă, hăng hơđong pran jua bơwih ƀong huă. Rơnuč thun 2020, nua sĭ suai mrai amăng tơring čar Lâm Đồng sĭ nua mơng 110 truh pơ 120 rơbâo prăk sa amăng sa kĭ, samơ̆ truh ră anai, nua sĭ suai mrai truh pơ 180 rơbâo prăk amăng sa kĭ.

Nua sĭ suai mrai đĭ glăi dong

Tui tơlơi pơhing mơng sa, dua anom bruă rông hlăt mrai, sĭ mơdrô suai mrai amăng tơring čar lăi pơthâo: Nua sĭ suai mrai đĭ glăi lĕ yua kơ bruă sĭ mơdrô hrĕ mrai pơ tač rơngiao hơđong. Sa, dua boh dêh čar glăk ƀơƀrư̆ pok amăng jang, hơdôm anom bơwih ƀong sĭ mơdrô amăng tơring čar glăk ba nao sĭ lu ƀiă dong…. bruă suai mrai đĭ nua, ngă kơ mơnuih ƀon sang hơđong tuh pơ alin bơwih ƀong huă, pok prong bruă pla phun kơbuă rông hlăt mrai, pơtrut  pơđĭ kyar bơwih ƀong huă amăng sang anŏ. Amăng tơring čar Lâm Đồng ră anai hơmâo giăm 15 rơbâo boh sang anŏ pla phun kơbuă rông hlăt mrai, đĭ rơbêh 8.700 ektar hmua pla phun kơbuă, dưm dưm 70% hmua pla phun kơbuă amăng đơ đam dêh čar.

Siu Đoan: Pơblang