VOV4.Jarai - Pơphun bơyan pĕ phun tơmun mơkai thun 2021, nua tơmun mơkai tô̆ tơnô̆ trun dô̆ ƀiă hloh kơ 3000 prăk sa kg. Tơlơi anai ngă lu mơnuih ngă đang hmua pla tơmun mơkai ƀơi Gialai lup lăp prăk apah mă bruă, prăk yua pla tơmun mơkai.

15 thun apah lŏn pla tơmun mơkai ƀơi să Ia Mơr, tơring glông Čư̆ Prong, tơring čar Gialai, ơi Bùi Hữu Phước (46 thun, ƀơi să Bình Nghi, tơring glông Tây Sơn, tơring čar Bình Định) brơi thâo, ƀu hmâo đơi ôh nua tơmun mơkai ƀiă kah hăng bơyan anai. Thun anai, nua kơmok pruai hăng gơnam mă yua ngă đang hmua đĭ lu, kiăng tuh pơplai 2 ektar đang tơmun mơkai, ñu yua laih 100 klăk prăk, čan dong mơng sang prăk 60 klăk prăk. Akô̆ bơyan lĕ 7000 prăk sa kg lĕ, tơmun sang ñu akă dưi pơhrui ôh. Krah bơyan, nua trun ƀu hmao thâo trun dô̆ 3000 prăk sa kg, lup hă ƀu tlaih ôh, ơi Phước dô̆ pơmin kơ bruă akă pĕ tơmun. Tui anun mơn, nua akă hmâo đĭ, hơjan ƀu djơ̆ bơyan ngă tơmun ƀơi đang pla čơđang, ñu khom sĭ hăng nua 2.500 prăk sa kg:

 “Hmâo 7000 prăk sa kg lĕ akô̆ bơyan. Ră anai Khač krư̆ bah amăng guai lŏn ia, ƀu dưi sĭ lĕ trun nua 2.500 prăk sa kg. 1 ar đang pla kâo lup 6 klăk prăk. Lup anun ƀu hmâo prăk pioh pla kơ bơyan tơdơi”.

Amai Toán ƀơi đang tơmun ñu pơ̆ să Ia Mơr

Kah hăng ơi Phước, 3 blan rơgao, rơkơi bơnai amai Văn Thị Toán (39 thun) ăt mơ-ĭt mơn 2 čô ană pơ̆ plơi pô Bình Định, nao pơ̆ sa Ia Mơr, tơring glông Čư̆ Prong, tơring čar Gialai apah lŏn pla tơmun. Truh bơyan pĕ tơmun kiăng pơwot glăi ƀong Tết hăng sang anô̆, tui anun mơn rơkơi bơnai amai Toán glăi rơngôt thôt yua kơ nua tơmun trun lu đơi:

 “Kâo yua prăk apah 1 ektar lĕ 160 klăk prăk. Pran mă bruă ră anai ăt lu mơn, đang sang pơhrui hmâo 3000 prăk sa kg lĕ lŭp, huăč 40 klăk prăk sa ektar. Lŭp pran rơkơi bơnai, ană bă lui lơi pơ̆ sang, rơkơi bơnai kâo rai pơ̆ anai mơ̆ prăk pơhrui glăi ƀu hmâo”.

Mơnuih pla tơmun khom pơdŏng rơnưh, ƀong huă dô̆ glăi ƀơi đang tơmun 3 blan kiăng bơwih brơi kơ tơmun mơkai

Ră anai, ƀơi tơring čar Gialai hmâo rơbêh kơ 1000 ektar đang tơmun, lu biă ñu ƀơi hơdôm bôh tơring glông Krông Pa, Phú Thiện, Ia Pa, Čư̆ Prong... Bơyan tơmun juăt ñu amăng 3 blan rơnuč thun, mơnuih pla tơmun khom pơdŏng rơnưh dô̆ glăi kiăng bơwih brơi glêh tơnap biă. Thun anai, nua tơmun trun lu, ngă tơlơi tơnap anun ƀu dưi pơ ala glăi lăp djơ̆. Ơi Nguyễn Tuấn Anh – Kơ-iăng Khua Jơnum min mơnuih ƀôn sang să Ia Mơr, tơring glông Čư̆ Prong brơi thâo:

“Nua kah hăng thun hlâo mơng 6000 truh 7000 prăk sa kg lĕ neh wa mơng hmâo kơmlai. Truh ră anai nua năng ai ñu 2500 truh kơ 3000 prăk sa kg lĕ neh wa yua prăk pla lu biă lĕ, sa ektar lŭp hơdôm pluh klăk prăk. Yua anun tơnap kơ neh wa biă, čang rơmang hmâo hơdră bruă djru ƀơ ƀiă kơ neh wa”./.

Nguyễn Thảo: Čih – Siu H’ Prăk: Pơblang