VOV4.Jarai-Yak nao amăng hrơi mông pĕ mơkai thun 2021, tŭ tơ anŏ tơmun mơkai trun rơnoh dŏ 3000 prăk đôč 1 kg. Tơlơi anai, ngă kơ lu mơnuih ngă hmua pla mơkai ƀơi Gia Lai huač pran mă bruă, prăk tuh pơ alin đôč. Ră anai, ƀơi Gia Lai hơmâo rơbêh 1000 ha đang hmua pla mơkai, lu biă mă ƀơi tơring glông Krông Pa, Phú Thiện, Ia Pa, Čư̆ Prong….

Mơnuih ngă hmua pơdong atông rơnưh, đih đom pơ hmua amăng 3 blan

pioh wai lăng đang  mơkai

Bơyan phang pĕ mơkai amăng 3 blan rơnuč thun, mơnuih ngă hmua khom pơdong rơnưh dŏ pơ hmua đang kiăng wai lăng pruai kmơ̆k pơgang đang mơkai tơnap biă mă. Thun anai, rơnoh trun lu, ngă kơ tơlơi gleh glar tơnap tap mă bruă ƀu dưi pơ ala glăi ôh. Ơi Nguyễn Tuấn Anh, Kơ-iăng khua să Ia Mơr, tơring glông Čư̆ Prong brơi thâo: ăt hrơi blan anai mơ̆n thun hlâo nua sĭ mơkai mơ̆ng 6000-7000 prăk 1 kg, mơnuih ƀôn sang hơmâo kơmlai ƀiă.

Samơ̆ ră anai, nua mơ̆ng 2.500 truh 3000 prăk 1 kg, lơ̆m 1 ha, lup leč truh hơpluh klăk prăk, anun yơh tơnap biă mă kơ mơnuih ƀôn sang ngă hmua, kiăng hơmâo hơdră djru ba sa črăn đang mơ̆ng  plai ƀiă.

Nay Jek: Pơblang