VOV4.Jarai-Hăng pran jua triăng, tŭ añ kơ tơlơi tơnap tap, hur har amăng bruă mă, sĭ mơdrô, ơi Phạm Ngọc Thân dŏ pơ thôn 4, să Tân Hòa, tơring glông Ƀuôn Đôn, tơring čar Dak Lak sa amăng 63 čô mơnuih ngă hmua sĭ mơdrô rơgơi ƀơi dêh čar ta dưi pơpŭ thun 2021. Ƀu kơnong ngă hmua pơkra ming hăng sĭ mơdrô rơgơi đôč ôh, ñu dŏ hơmâo pran jua čơmah, hiam klă djru ba lu sang anŏ mơnuih ngă hmua amăng khul, hrưn đĭ pơklaih ƀun rin hăng djru hrom man pơdong plơi pla phrâo ăt kah hăng djru tơlơi khăp pap kơ mơnuih tơnap tap hloh.

Ayong Hoàng Đức Dũng dŏ pơ thôn 6, să Tân Hòa, hơdor tơngia na nao kơ ơi Phạm Ngọc Thân, yua hơmâo tŭ jum ñu mut mă bruă amăng sang sĭ mơdrô, pơkra ming gơnam man pơdong sang hăng prăk blan apah sa blan truh 6 klăk prăk. Ƀu kơnong dơ̆ anun ôh, ơi Thân dŏ brơi kơ sang anŏ ayong Dũng čan prăk ƀu mă kơmlai ôh pioh rông bê pơđĭ kyar bơwih ƀong huă. Tŭ mă prăk čan mơ̆ng sang anŏ ơi Thân, ñu blơi 8 krop bê tơnô ania ngă djuai ba glăi rông.

Dưi hơmâo ơi Phạm Ngọc Thân djru, lu sang anŏ tơnap tap tơring glông Ƀuôn Đôn hăng kual ieo gah dưi pơklaih mơ̆ng ƀun rin, hrưn đĭ ngă pơdrong

Tơdơi kơ sa thun bê ñu rông hăng pơlar tui blơi đa truh kơ 50 drơi, ñu sĭ bê pơprong, mă prăk blơi sa krop rơmô tơnô ania pioh rông ngă djuai. Tal anai, ayong Dũng rông rơmô ăt tŭ yua mơ̆n. Bruă rông mơnong mơ̆ng ñu hơmâo kơmlai, anun sang anŏ hơmâo prăk tla glăi kơ pô ñu čan laih anun prăk dŏ glăi man pơdong sang 70 met karê, hơmâo prăk rông ană bă hrăm hră pơar:

“Kâo mut mă bruă apah kơ wa Thân ñu rơbêh 5 thun laih. Kâo hơmâo čan prăk sang anŏ ñu 100 klăk prăk blơi bê, giong rông bê tuh ană sĭ hơmâo prăk blơi rơmô dơ̆ng pioh rông kiăng pơsir tơlơi tơnap sang anŏ. Ră anai, prăk pơhrui glăi plai ƀiă mơ̆n. Rơngiao kơ prăk blan rơbêh 70 klăk mơ̆ng wa Thân ñu apah, prăk pơhrui glăi mơ̆ng bruă rông rơmô, bê hơmâo hơdôm hơpluh klăk prăk dơ̆ng, pơ alin hĭ hơmâo mơ̆n sa thun 100 klăk prăk. Sang anŏ gơmơi dưi man pơdong sang, rông ană bă hrăm hră”.

Ơi Tô Văn Liệu, Kơ-iăng Khua Khul ngă hmua tơring glông lăi, hơdôm thun rơgao, khul mơnuih ngă hmua, amăng anun hơmâo sang anŏ Phạm Ngọc Thân ƀu kơnong ngă hmua pơkra ming sĭ mơdrô rơgơi đôč ôh, dŏ jing mơnuih ngă ding kơna mut phung ngă hmua hur har biă mă amăng bruă pơkơtưn ngă bruă amăng Khul mơnuih ngă hmua pơtrun; djru hrom amăng ring bruă, pơtô brơi hơdră mă bruă čem rông hlô mơnong, gum hrom bruă man pơdong plơi pla phrâo; laih dơ̆ng, ñu ăt hur har mơ̆n pơtrut bruă pơtô pla pơjing kơ hơdôm rơtuh čô ding kơna amăng khul ƀơi tơring glông Ƀuôn Đôn; sĭ mơdrô kmơ̆k brơi čan tơdah aka ƀu hơmâo prăk, đơ đa ia jrao hlăt hăng brơi čan mă kơmlai ƀiă ƀudah ƀu mă kơmlai ôh pioh kơ sang anŏ ƀun rin...

Ơi Phạm Ngọc Thân lĕ sa amăng 63 čô mơnuih ngă hmua rơgơi amăng dêh čar tŭ mă hră apah bơni mơ̆ng Khua git gai pơ ala mơnuih ƀôn sang dêh čar

Hơmâo tơlơi djru hrom mơ̆ng sang anŏ Phạm Ngọc Thân, lu ding kơna amăng khul să Tân Hòa hăng kual ieo gah dưi pơklaih mơ̆ng ƀun rin, tăp năng hrưn đĭ ngă pơdrong:

"Ơi Thân djru kơ thôn 4 să Tân Hòa pơdong sang jơnum plơi, ming pơkra jơlan rô nao rai amăng plơi pla.  Laih dơ̆ng djru tơlơi khăp pap kơ lu sang anŏ tơnap tap pơkŏn amăng să ƀudah pơ Ƀuôn Ma Thuôt, akŏ pơjing khul tơnă asơi djru tơlơi khăp pap pơ sang ia jrao prong tơring glông Ƀuôn Đôn pioh kơ mơnuih ƀun rin hơmâo asơi huă; brơi hơdrôm hră hrăm hră čih kơ čơđai muai ƀun rin dưi nao sang hră. Khul mơnuih ngă hmua tơring glông ăt pok prong gru mơnuih mă bruă ba jơlan hlâo djru ană plơi pla, lu sang anŏ ƀun rin ăt djru ba ƀudah tŭ mă tơlơi djru hlom bom”.

Phrâo anai, ơi Phạm Ngọc Thân hơmâo tŭ mă tơlơi apah bơni “Mơnuih ngă hmua pơkra ming-sĭ mơdrô rơgơi dêh čar thun 2021”. Ơi Thân lăi, ñu akŏ pơjing bruă mă dơ̆ng mơ̆ng tah tơkai hơdai tơngan soh, khom nao mă bruă apah, čan prăk hăng ƀơ ƀrư̆ bơwih ƀong huă mơ̆ng bruă pla kơphê blung a, laih anun pla tiu, rông rơmô. Samơ̆ kiăng hơmâo pơblih biă mă, ñu ƀu hŭi ôh lông ngă lăng. Mơ̆ng bruă sĭ mơdrô ia săng, gơnam man pơdong, kmơ̆k pruai hăng ia jrao pơgang phun pla, laih anun pok prong đang hmua pla boh jrang yuăn, man pơdong sang rông čĭm klang črah…

Boh tơhnal, ră anai hơmâo lu sang bruă hăng đang hmua prong, pơhrui glăi 15 klai prăk sa thun. Ngă bruă rah, pơblih tui, lui anŏ hơgĕt ƀu tŭ yua, pơmin djă pioh bruă hơgĕt ba glăi tŭ yua, ơi Phạm Ngọc Thân kiăng pok bruă mă prong hloh. Ñu jưh glăi amăng bruă bơwih ƀong ƀơi sang anŏ, laih anun lir hơbit hăng lu sang anŏ pơkŏn pok bruă ngă kiăng mă yua anŏ gêh găl kual lŏn Ƀuôn Đôn:

“Ƀing gơmơi ăt amra gleng nao kơ bruă djă hnong djru tuh pơ alin kơ mơnuih ƀôn sang ngă hmua. Kâo anăp brơi bruă mă mơ̆ng sang anŏ hăng hơdôm sang anŏ mơnuih ƀôn sang amăng plơi pok prong bruă rông čĭm klang črah, pơkra gơnam mơ̆ng ia bah hruh čĭm klang črah rơgoh djơ̆ tơhnal pơtrun OCOP kiăng ba sĭ mơdrô pơ anom sĭ mơdrô prong ƀơi rŏng lŏn tơnah.

Dua lĕ, kâo ăt glăk ngă hrom anom bruă ngă hmua tơring glông akŏ pơjing khul ngă ƀong hrom ta juăt lăi HTX ngă hmua pơkra ming gơnam sĭ mơdrô, pla boh nhãn boh jrang yuăn amăng hmua mơnuih ƀôn sang hơmâo laih ƀơi să Tân Hòa. Kâo čang rơmang djop bruă amra gêh găl hăng tŭ yua".

Hăng boh tơhnal tŭ yua amăng bruă sĭ mơdrô ăt kah hăng bruă mă djru tơlơi khăp pap, lu thun rơgao ơi Phạm Ngọc Thân dưi hơmâo djop gưl mơnuih ngă hmua ƀơi Dak Lak ƀơk hră apah bơnu yôm; biă mă ñu thun 2021 anai, ñu sa amăng63 čô mơnuih ngă hmua amăng dêh čar, arăng ruah pơpŭ mơnuih ngă hmua rơgơi, dưi hơmâo Khua git gai pơ ala mơnuih ƀôn sang dêh čar ơi Vương Đình Huệ apah bơni hră bơni.

Ñu arăng bơni ƀu kơnong bruă ngă găn  rơgao mơ̆ng tơlơi tơnap tap hrưn đĭ ngă pơdrong đôč ôh, yua kơ pran jua hiam, tơlơi tơpă mơ̆ng ñu djru ba lu mơnuih ieo gah, sang anŏ jĕ giăm amăng plơi pla, yua ñu lăng nao pơ anăp adih hrom hăng gong gai kơnuk kơna ngă bruă djru kual plơi pla gơñu, pơjing anih tơnap tap hrưn đĭ bơwih ƀong huă đĭ tui, jing plơi pla ngă hmua pla lu mơta boh troh rơnoh yôm, pơsir tơlơi ƀun rin hăng ngă pơdrong lăp djơ̆.

Nay Jek: Pơblang