Ñu lĕ mơnuih arăng đăo gơnang amăng plơi Hiệp Đoàn, să Ea Mdroh, tơring čar Dak Lak, ơi Bàn Tôn Nhất ƀu djơ̆ kơnong hơmâo neh met wa lăng yôm yua pran ba gru amăng tơlơi hơdip mơda đôč ôh mơ̆ ăt yua mơng tơlơi gum pơgôp prong amăng bruă pơtô ba mơnuih ƀôn sang. Mơng bruă pơtô pơblang tơlơi črâo trun, hơdră bruă mơng Ping gah, tơlơi phiăn mơng Kơnuk kơna truh pơ bruă pơtrut pơsur mơnuih ƀôn sang pơhlôm rơnuk rơnua, lui hĭ tơlơi phiăn ƀu klă hiam, pơjing tơlơi hơdip hiam klă, pơ hơpă hơmâo bruă tơnap tap, ƀơi anun hơmâo kru tơkai ñu. Pơlăi nao rai tơlơi găn rơgao mơng ñu, ơi Nhất brơi thâo: bruă mă mơng mơnuih arăng đăo gơnang lĕ lăi pơthâo brơi mơnuih ƀôn sang hluh rơđah, ngă mơnuih ƀôn sang đăo gơnang, kiăng neh met wa thâo gum pơgôp, gir bơwih ƀong huă, wai pơgang plơi pla hơđong mơ-ak.

“Hrŏm hăng grup pơgang rơnuk rơnua, grup wai lăng plơi pla hăng khul Ping gah, kâo hyu pơtrut pơsur ană plơi pla ngă tui djơ̆ tơlơi phiăn hăng wai pơgang rơnuk rơnua amăng plơi pla. Kâo juăt pơtrut pơsur neh met wa, anai lĕ mơnuih djuai ania ƀiă amăng kual anăm hmư̆ tui tơlơi ƀing pô sat. Lơm kâo hyu pơtrut pơsur neh met wa lêng kơ hơmâo abih bang mơnuih ngă tui, ha pran tui Ping gah”.

Tui sit nik brơi ƀuh, amăng hơdôm boh plơi pla hơmâo mơnuih arăng đăo gơnang gir kơtir ngă bruă, hơdôm bruă pơphun amăng plơi pla lêng kơ pơđĭ kyar hơđong kjăp. Ƀing mơnuih arăng đăo gơnang ƀu djơ̆ kơnong pơgôp ngă lar hyu hơdôm hơdră bruă pơprong mơng Ping gah hăng Kơnuk kơna truh pơ rĭm boh sang anŏ đôč ôh mơ̆ ăt djru brơi gưl Ping gah, gong gai hmao tlôn thâo tơlơi rơkâo, tơlơi čang rơmang mơng mơnuih ƀôn sang. Mơng anun, bruă pơplih jơlan gah git gai amra jê̆ giăm hăng tơlơi sit nik ƀơi ƀon lan ƀiă, ba glăi tơlơi mut hrŏm amăng mơnuih mơnam mơng akŏ mơtăm. Ơi Lê Văn Chiến, Khua plơi Hiệp Hòa, să Ea Mdroh, tơring čar Dak Lak lăi pơthâo:

“Mơnuih arăng đăo gơnang amăng plơi pla lĕ ƀing gơgrong phun. Rĭm wŏt hơmâo mông jơnum, pơbưp nao rai mơnuih ƀôn sang mơng Jơnum pơ ala mơnuih ƀôn sang tơring čar, Jơnum min pơ ala mơnuih ƀôn sang să hăng amăng plơi pla hơmâo hơdôm bruă hơget thơ yôm phăn, boh pơhiăp, tơlơi đăo gơnang mơng ƀing gơñu amra djru brơi ƀing gơmơi lu biă. Djru brơi kâo pơgiong bruă jao, tơlơi glăm ba mơng khua plơi”.

Tui yă Nguyễn Thị Thu Hồng, Khua Jơnum min mơnuih ƀôn sang să Ea Mdroh, tơring čar Dak Lak, đơ đam să ră anai hơmâo 19 čô mơnuih arăng đăo gơnang. Ƀing gơñu lĕ ƀing mơnuih tơngan yơr glông mơng gong gai ƀon lan amanăng bruă pơtrut pơsur mơnuih ƀôn sang, wai pơgang rơnuk rơnua hăng pơtrut pơđĭ kyar bơwih ƀong huă-mơnuih mơnam amăng ƀon lan. Mơnuih arăng đăo gơnang ƀơi Ea Mdroh hơmâo ngă tui klă tơlơi glăm ba amăng bruă pôr pơhing, pơtop hrăm tơlơi phiăn, tơlơi črâo trun, truh bruă ngă tui djop tơhan pơkă, hơdră bruă tui tơlơi pơkă. Pơ anăp anai, ƀon lan tŏ tui đing nao ngă tui tơlơi gơgrong mơng mơnuih arăng đăo gơnang pơlir hăng hơdôm jơlan hơdră pơđĭ kyar bơwih ƀong huă, pơhrŏ trun ƀun rin hơđong kjăp, wai pơgang glai rưng, man pơdong plơi pla phrâo hăng wai pơgang rơnuk rơnua-hơđong amăng ƀon lan. Yă Nguyễn Thị Thu Hồng brơi thâo:

“Pơ anăp anai, hăng tơlơi gơgrong hăng tơlơi glăm ba prong biă mă mơng ƀing mơnuih arăng đăo gơnang, Jơnum min mơnuih ƀôn sang să amra pok hơdôm anih pơtop hrăm, pơtô brơi kiăng hrưn đĭ boh thâo kah hăng črâo brơi dong hơdôm boh thâo phrâo, hơdôm tơlơi pơkă phrâo kiăng ƀing gơñu pơblang brơi mơnuih ƀôn sang. Tal dong lĕ amra tŏ tui đing nao ƀiă dong, amra lăi pơthâo ƀing mơnuih arăng đăo gơnang kiăng mơng anun mơnuih ƀôn sang dưi hrăm hăng ngă tui”.

Mơng hơdôm bruă mă tong ten, sit nik amăng plơi pla, ƀing mơnuih arăng đăo gơnang-ƀing mơnuih arăng gơnang nao amăng plơi pla djuai ania ƀiă ƀơi Dak Lak glăk pơgôp pơhlôm kjăp “pran gum pơgôp hăng mơnuih ƀôn sang”-jing atur yôm phăn brơi pơđĭ kyar hơđong kjăp amăng ƀon lan. Ăt mơng pran ngă bruă anun, tơlơi glăm ba hăng pran đăo gơnang anun, pran gum pơgôp djop djuai ania hơmâo hơbôr đĭ kjăp phik, bruă wai pơgang rơnuk rơnua hơmâo pơhlôm hơđong, ngă atur kiăng kual mơnuih djuai ania ƀiă ƀơi Dak Lak tŏ tui hrưn đĭ amăng rơwang phrâo./.