- Kơkuh kơ ayong Rčom Djuk hŏ! Pơpŭ kơ ih hơmâo laih tơlơi truh kih prong amăng thun rơgao, hăng jing khua pơ ala dŏ hlăk ai amăng Jơnum djop djuai ania plơi prong Pleiku, tơring čar Gia Lai.

Khua plơi Rčom Djuk: “Amăng dua thun mă bruă hrŏm hăng ƀing apăn bruă amăng plơi pla, ƀing gơmơi hơmâo lu tơlơi dưi yôm phăn. Sa amăng mrô anun lĕ bruă pơkra ming 1.000 met jơlan glông. Hrŏm hăng anun, ƀing gơmơi hơmâo man pơdong sang jơnum plơi pla, blơi djop gơnam kiăng yua hơmâo loa, amply pioh yua amăng jơnum pơƀut. Laih anun dong, ƀing gơmơi ăt pơtrut pơsur neh met wa gum tơngan hrŏm pơkra ming king ia ngă gêh gal amăng ngă hmua pơdai ia. Lăng nao hrŏm, boh than klah čun rơwang mă bruă 2022-2025 amăng plơi pla ră anai dŏ 2 boh sang anŏ ƀun rin hăng 4 boh sang anŏ giăm ƀun rin, samơ̆ truh abih thun 2024, ƀing gơmơi čang rơmang amra ƀu hơmâo sang anŏ hơpă ƀun rin dong tah.

-Kiăng kơ dưi ba glăi boh than tui anun, ih pô hăng neh met wa amăng plơi pla hơmâo gir run hiưm pă ñu ?

Ayong Rčom Djuk: Ƀing gơmơi hơmâo jơnum pơčrông sai hăng tŭ ư hrŏm hơdră bruă ngă hiưm pă brơi kơ lăp djơ̆ hloh. Blung hlâo, ƀing gơmơi hơmâo ruah mă hơdôm ară jơlan amuñ ngă anun pơkra hlâo, hăng tơlơi gum pơgôp mơng ƀing apăn bruă Ping gah. Sa amăng hơdôm ară jơlan blung a mơ̆ ƀing gơmơi ruah pơkra lĕ giăm 300 met. Tơdơi kơ pơgiong, ƀing gơmơi tŏ tui pơtrut pơsur neh met wa man pơkra hơdôm ară jơlan glông ƀiă, pơhmutu ară jơlan 700 met dong. Hăng pran jua “Ƀing apăn bruă Ping gah ba jơlan hlâo, ană plơi pla kiăo tui tlôn”, ƀing gơmơi hơmâo pơgiong ară jơlan 300 met, hăng tŏ tui dong lĕ amra man pơkra jơlan glông ƀiă.

- Ih lĕ khua plơi dŏ hlăk ai, amăng hrơi blan ngă bruă, amra dong ƀơi anăp lu tơlơi glêh tơnap. Ih dưi lăi pơthâo mơn kơ tơlơi anun ?

Ayong Rčom Djuk: Amăng thun blan ngă bruă, kâo bưp lu tơlơi tơnap tap, sit biă ñu amăng bruă pơtrut pơsur neh met wa mut hrŏm man pơkra jơlan glông. Sa amăng hơdôm tơlơi prong hloh lĕ neh met wa aka ƀu hluh rơđah kơ tơlơi dưi mơ̆ jơlan phrâo ba glăi. Dua dong lĕ tơlơi bơwih ƀong huă mơng neh met wa tơnap tap, yua anun bruă gum pơgôp aka ƀu djơ̆ hăng tơlơi rơkâo. Tlâo dong lĕ neh met wa ăt dŏ tơguăn, čang rơmang kơnuk kơna djru brơi djop tui jơlan hơdră plơi pla phrâo. Samơ̆, ră anai, kơnuk kơna kơnong djru brơi 85%, dŏ glăi 15% neh met wa pơgôp pơhrua dong. Bruă pơtrut pơsur neh met wa gum tơngan hrŏm man pơkra jơlan ăt bưp tơnap tap biă mă.

- Tơlơi tơnap tap tui anun, samơ ih hơmâo gir run găn rơgao kiăng hơmâo tơlơi dưi prong amăng bruă mă ? Tơlơi găn rơgao mơng ih hiưm ñu ?

Ayong Rčom Djuk: Bruă kâo juăt ngă lĕ tŭ mă tơlơi git gai mơng gơnong glông hăng pơtô pơblang brơi neh met wa kiăng ƀing gơñu hluh rơđah. Kâo ăt juăt mut hrŏm hơdôm tal pơtô hrăm yua gưl Ping gah, gong gai pơphun. Yua anun, kâo hluh rơđah ƀiă kơ hơdôm hơdră bruă, tơlơi črâo trun mơng Ping gah hăng Kơnuk kơna, mơng anun dưi pơtô pơblang brơi neh met wa lăp djơ̆ hloh. Hrŏm hăng anun, kâo lêng kơ gir run hơdip ba gru, mơng sang anŏ truh pơ bruă mă, mơng anom mă bruă truh pơ plơi pla. Lơm neh met wa ƀuh ta hơdip hiam hăng gơgrong, ƀing gơñu amra hrăm hăng ngă tui, mơng anun pơjing rai tơlơi hơdip hiam klă amăng mơnuih mơnam.

- Ơ, bơni kơ ih hŏ! Pơpŭ kơ ih hăng sang anŏ čơkă thun phrâo hiam drơi jăn pran jua hăng bơwih ƀong đĭ đăi!