VOV4.Jarai - Mơguah hrơi anai, lơ 15/4 ƀơi Hà Nội, Ding jum ngă hmua hăng pơđĭ kyar plơi pla pơphun jơnum pok pơhai kơčăo bruă pơđĭ tui anŏ klă mơng anom bruă pơjrao hlô mơnŏng djŏp gưl, rơwang thun 2021-2030; pơčrông sai hơdră pơgang klin ngă pơđeh klĭ ƀơi hlô rông. Tơlơi ƀing ta gơñăm nao mơng kơčăo bruă rơwang thun 2021-2030 lĕ anăp nao ngă giong abih bang, ngă kơjăp hăng pơtrut đĭ tơlơi apăn bruă wai lăng hlô mơnŏng mơng djŏp gưl, pơphun ngă bruă pơgang hlô rông klă, tŭ yua; wai lăng anih hơmâo klin, pơgang ba tơlơi suaih pral mơnuih ƀon sang hăng mut hrŏm hăng jar kmar. Bơdjơ̆ nao bruă pơgang klin ngă pơđeh ƀơi klĭ hlô mơnŏng, tui hăng tơlơi pơsit mơng Anom bruă pơjrai hlô, Ding jum ngă hmua hăng pơđĭ kyar plơi pla, klin anai ăt ƀă hyu pơ lu anih mơn. Truh ră anai, klin ngă pơđeh klĭ hlô rông hơmâo ƀơi 781 boh să mơng 149 boh tơring glông, ƀơi 25 boh tơring čar, ƀon prong amăng dêh čar.

Siu H’Mai: Pơblang