VOV4.Jarai - Mơguah lơ 15/4, ƀơi tơring čar Ninh Thuận, Ding jum ngă hmua hăng pơđĭ kyar ƀon lan pơphun Jơnum lăng glăi bruă ngă hmua pơdai amăng bơyan puih phang thun 2020-2021; pok pơhai bruă amăng bơyan mơyan thun 2021 ƀơi hơdôm tơring čar ter hang ia rơsĭ kual Tong krah hăng kual Dap kơdư. Tui hăng akŏ bruă ngă hmua amăng bơyan mơyan thun anai, amăng đơ đam kual hơmâo rơbêh 180 rơbâo ektar đĭ 20 rơbâo ektar pơhmu hăng thun 2020; pơhrui dưm dưm rơbêh 61 tă amăng sa ektar, đĭ 0,49% tă sa ektar; đơ đam pơhrui glăi him lăng 1.116 rơbâo tơ̆n, đĭ 132 tơ̆n pơhmu hăng bơyan mơyan thun 2020. Ơi Lê Quốc Doanh - Kơ-iăng Khua ding jum ngă hmua hăng pơđĭ kyar ƀon lan lăi pơtong: Hơdôm kual đang hmua pơdai tơdah kơƀah ia, rơkâo hơdôm plơi pla anun hơdai nao pla phun pơkŏn dong. Anai lĕ hơdôm hơbô̆ bruă ba glăi tŭ yua amăng hrơi blan laih rơgao. Kơ pơjeh phun pla rơkâo mă yua hơdôm pơjeh pơdai phrâo hiam, huă jơman; hơdôm pơjeh sai amăng ƀiă hrơi kiăng kơ pơhlôm brơi ia kah hăng kiăng pơkrem ia yua.

Siu Đoan: Pơblang