VOV4.Jarai-Lơ 19/12, ƀơi plơi prong Pleiku, tơring čar Gia Lai, Ding jum Ngă hmua hăng pơđĭ kyar plơi pla, hrom hăng hơdôm tơring čar amăng kual Dap Kơdư jơnum “Bơkơtuai ĕp hơdră pơtrut tui pơphun anih pla pơjing gơnam sĭ mơdrô kiăng pơđĭ kyar sĭ mơdrô kual Dap Kơdư hơđong”. Dêh čar ta ră anai, hơmâo giăm 700 rơbâo hektar kơphê, hnong pơhrui glăi hơmâo 1 klăk 76 rơbâo tơn sa thun, jing dêh čar sĭ mơdrô kơphê dong tal 2 ƀơi rŏng lŏn tơnah.

Khua ding jum ơi Lê Minh Hoan đĭ pơhiăp ƀơi mông jơnum

Amăng anun, 92 % đơ đam lŏn pla hăng 95% hnong kơphê mơ̆ng kual Dap Kơdư. Ƀơi mông jơnum, ƀing khua mua rơkâo kơnuk kơna hăng djop anom bruă ngă gêh găl djru ba djop sang bruă sĭ mơdrô čih anăn djă gru kơnăl si mơdrô hăng pơsit gơnam sĭ mơdrô hiam tŭ yua kơphê jar kmar, boh nik ñu hơdôm anih sĭ mơdrô tơnap kah hăng kual Mi kô̆, dêh čar Mi, dêh čar Japan.

Khua ding jum Bruă hmua hăng Pơđĭ kyar plơi pla, ơi Lê Minh Hoan brơi thâo, pơ anăp anai, Ding jum Bruă hmua hăng Pơđĭ kyar plơi pla pơkra kơčăo bruă phara hăng sĭ mơdrô kơphê jơman ba nao pơ kual Mi kô̆, kiăng pơtong lăng bruă ba kơphê hăng boh troh đang hmua mơ̆ng Việt Nám nao pơ anih sĭ mơdrô pơprong. Djop anom bruă kiăng akŏ pơjing khul ngă hrom sĭ mơdrô kơphê kiăng thâo tong ten anŏ kiăng hăng tơlơi phiăn pơtrun, djơ̆ hăng tơlơi pơkă mă jia mơ̆ng anih anom sĭ mơdrô.

Nay Jek: Pơblang