VOV4.Jarai-Mơguah hrơi anai, lơ 3/6, ƀơi Hà Nội, Ding jum Bruă hmua hăng Pơđĭ kyar plơi pla jơnum lăng nao rai amăng tivi hăng djop sang bruă amăng dêh čar brơi pơsir tơlơi dŏ gun hăng pơtrut sĭ blơi boh troh đang hmua amăng hrơi blan klin kheng Covid 19. Jơnum anai, pơtum pơčrông sai hơdră brơi hyu blơi boh troh gơnam đang hmua mơ̆ng kual hơmâo klin; pơsir brơi tơlơi dŏ gun pơdŭ pơgiăng gơnam tam mơ̆ng kual hơmâo klin ba nao sĭ mơdrô pơ dêh čar tač rơngiao.

Pơsir tơlơi tơnap tap hơdră mă jia, tañ pơtruh nao rai, ba gơnam nao pơ dêh čar tač rơngiao boh jrang yuan mơ̆ng 2 boh tơring čar Bắc Giang hăng Hải Dương, Ding jum  bruă hmua hăng Pơđĭ kyar plơi pla brơi lu grup khua mua nao tơl plơi pla hmua đang anih pla boh jrang yuan, pơtrut sĭ mơdrô pơdŭ pơgiăng ba nao pơ dêh čar Khač.

Laih dơ̆ng, tui hăng tơlơi krăo lăng bruă mă, sĭ mơdrô boh troh gơnam tam đang hmua djop plơi pla, hơdră ba sĭ mơdrô boh troh đang hmua hơmâo ngă hrom djop sang sĭ mơdrô amăng dêh čar hăng tač rơngiao pioh sĭ mơdrô.

Nay Jek: Pơblang